FamilyMart係一間源自日本、現時喺台灣、中國、泰國等地都有分店嘅便利店品牌。相信我哋有唔少讀者都會期待趁日本旅行嘅時候、去FamilyMart行返一轉吧？坐擁日本國內便利店分店數目第2位嘅FamilyMart（俗稱「FamiMa」）品牌標誌以綠、白、藍3色為主調，因此亦以「FamilyMart 3色」而為國民熟悉。一於今日就等我哋為你嚟介紹呢間日本製造嘅便利店啦！
你不可不知嘅FamilyMart二三事
作為日本國內3大便利店品牌之一，FamilyMart係當中唯一一家源自日本嘅本土品牌。自1973年於埼玉縣狹山市創業以嚟，FamilyMart至2019年8月為止已經喺全國擁有約16,500間分店。而憑著品牌嘅方便普及程度，FamilyMart亦成功喺台灣、泰國、中國、越南、印尼、菲律賓、馬來西亞等地開設分店，海外分店總數超過7,500間。若然加上國內店舖數目，品牌版圖更達約24,000間，相信各位喺亞洲各地旅行嘅時候都有曾經見過FamilyMart嘅蹤影吧？
FamilyMart必食美食推介！
相信各位去到日本便利店嘅時候，都一定會想試返日本嘅產品啩？提起FamilyMart嘅經典產品，就不得不提炸雞同Frappe！首先要介紹嘅，係唔少日本人都鍾意食嘅無骨炸雞「FamiChicken」。炸至香口鬆脆嘅外皮加上肉汁四射嘅雞肉，簡直就係全國人民嘅心靈美食呀！重點係炸雞只賣167yen（未含稅），難怪2018年年尾嘅時候總銷量已經超過12億塊啦！
除炸雞以外，口感清爽嘅「Frappe」都係人氣產品系列之一。將Frappe由冰櫃拎出嚟再加入咖啡機嘅熱辣辣牛奶後，Frappe立即變身為有如刨冰般口感嘅冷凍飲品！夏天食完飯後嚟返一杯Frappe，保證你即刻體會到咩叫「透心涼」！FamilyMart店內長年都放有幾種唔同口味嘅Frappe，推薦大家因應季節再挑選唔同口味比較一下。只要你發現芝士蛋糕、香蕉等期間／數量限定嘅口味時，先買就一定包你無走寶！
超方便！FamilyMart人氣服務一覽
唔知各位曾經到過FamilyMart嘅朋友，有無試過用店內嘅綠色多功能「FamiPort」呢？只需要1台機器，你就可以完成各種付款、購票等程序，非常方便！「FamiPort」可以對應多國語言，而且操作方法十分簡單：就算唔識日文，只要按一下畫面再按照螢幕畫面指示，你就可以輕鬆使用多款功能，而且當中更有唔少係遊客都會用到嘅實用服務。例如對應海外發行提款卡嘅ATM、又或以Alipay及WeChat Pay等電子貨幣取代現金付款都一一可以辦妥。另一方面，FamilyMart亦已喺部分人氣觀光地，例如東京淺草、上野、銀座，以及京都府、大阪府、福岡縣等設置咗外國遊客免稅櫃台。
FamilyMart更積極推出免費Wi-Fi等針對海外遊客嘅甜心服務。就算閣下忙住趕行程，FamilyMart亦喺部分店舖為你準備咗品牌化妝品或地區限定手信角落，甚至係於店內放置觀光小冊子，令你可以喺便利店購物期間亦同時間收集旅遊資訊。遊客們如果好好活用店內餐飲角落嘅話，話唔定身處便利店內都可以發掘到全新嘅日本一面呢！
考吓你知道幾多間？打卡必到FamilyMart分店
FamilyMart唔只會經常上架新產品、亦會時常更新商品最新情報，所以就會行多幾次都唔會覺得厭㗎！順帶一提，全國分店當中有唔少店舖裝修都經過特別設計，由內至外都有別於一般分店。例如沖繩縣首里城風格嘅分店就係一大實證！
日本便利店蘊藏著唔少外國遊客仍未完全發掘嘅特色，有時間不妨行多幾間吖！
Comments