村西透，係開創日本成人影片新世代「禁止播出」嘅先驅。而家日本國民只需年滿18歲以上即可以睇嘅色情書刊（「咸書」），正正就係由佢開拓前身—「封袋書」，可謂喺成人影片業界掀起一股革命嘅先鋒。村西透曾經試過被捕，並於美國被判370年「有期徒刑」等。顛沛離奇嘅前半生加上各種驚滔駭浪嘅經歷，今次被翻拍成劇集《全裸監督》，並於2019年8月8日（四）於Netflix全球獨家上架。
1980年擔任英語教材業務員嘅村西透，喺創下驕人銷售成績後無幾耐就面對公司倒閉。同時，佢親眼目擊妻子外遇，正當佢人生處於最悲慘失意嘅谷底時，村西遇上流氓荒井敏。荒井敏令佢知道有一種暱稱為「封袋書」嘅成人雜誌存存。村西認為蘊藏著無限商機，於是喺出版社社長川田研二嘅幫助下，成立咗專門販賣封袋書嘅公司，並好快就成為業界風雲人物，締造出無數傳奇。
村西由山田孝之飾演，而荒川敏同川田研二，就分別由滿島真之同玉山鐵二飾演。一眾演員彷彿演繹出自己嘅青春故事，幕幕精彩好戲獲得極高評價。喺所有場景拍攝完結、滿島真之發表感言時甚至講咗一句「要返監獄喇？」，意思即係今次拍攝過程極度充實及豐富，完結就好似誇張到要返回沉悶嘅監獄咁！而今次，編輯部就有幸請到喺戲入面體驗狂熱80年代嘅3位，一齊嚟開心暢談呢部喺充滿束縛、綁手綁腳嘅現代日本下掀起風波嘅作品。
ーー《全裸監督》實在係一部非常轟動嘅作品呢。請問你哋3位決定攜手合作共同演出嘅理由係？
滿島：最先係由山田開始吧。
玉山：係啦。
山田：嗯，畢竟年代唔同，所以我其實一開始時都唔知邊個係村西。喺接到呢個工作後，先發現原來呢個故事非常得意，心諗：「呢部作品實際嘅拍攝現場應該會非常有趣，應該會為社會帶嚟一定程度嘅刺激！」於是當下我就覺得一定要接拍。之後就成日走去同Netflix同埋製作人坂本討論要點樣去表現呢部作品。製作會議參加人員大約有12人，無分國籍、年齡、性別，為咗完成呢部作品，我哋開咗好多次會，討論應該用點樣嘅劇本進行拍攝，不過到開始製作劇本時，我就選擇抽身不理，而係專心等劇本完成，盡力演好村西透呢個角色。
ーー各集劇情中收錄咗好多奇聞軼事，當中有邊啲令你特別覺得驚訝或者感動呢？
滿島：村西一開始並唔係話精力充滿、想法開放，生活方式亦都唔係咁特別，不過就係呢點吸引咗我，喺第一、二集當中亦有確實咁表達出一點。村西只係一個業績差嘅SALES，喺能力未覺醒之前經歷咗一段長時間普通養家搵食嘅生活，但呢段經歷就非常重要。如果喺嗰啲一出世已經有上天眷顧、會散發光芒，好似太陽咁嘅存在嘅人，或者會令觀眾認為「呢個人出世嘅時候開始就與別不同」，會覺得係個好遙遠嘅存在；但村西就好唔同，佢係好「貼地」嘅存在，只係普羅大眾嘅其中一人，於是會令觀眾覺得自己可能都會有一日突然嶄露光芒，開啟命運大門。
山田：既然自己嘅門都開咗喇，咁應該都有開啟其他人嘅門嘅才能？
滿島：無錯，就係呢個基本設定吸引到我。
玉山：我就對於完成駅弁（體位）嘅嗰段劇情，覺得相當驚訝。
滿島：嗰段真係好厲害呢！！
玉山：歡笑當中卻有啲悲傷，笑中有淚。或唔定會有人睇到感動流淚吧，畢竟係真實故事改編。
山田：你應該係講梗係第3集嘅劇情吧。
――呢部作品要喺全世界播出，請分享一下你哋而家嘅心情。玉山半開玩笑咁講過「好感度會下降吧。」，喺拍攝時有考慮過個人形象問題嗎？
山田：形象唔係自己創造出嚟，而喺睇嘅人創造嘅。每個人所呈現嘅形象都唔一樣，如果要討厭呢部作品嘅話，我就覺得你要討厭都唔緊要啦。
玉山：但係山田孝之畀人嘅感覺，就係「背叛觀眾」嘅代名詞，唔係嗎？
山田：代名詞（笑）
玉山：我哋喺佢身邊，有時都會覺得「啊，佢喺某方面真係好厲害，果然都係比唔上佢。」，但事實上將呢種諗法放埋一邊嘅演員，意外地其實係好多。舉個例，日本而家嘅文化就係好多人都唔夠勇氣、唔敢嘗試，好似文章寫手工作或者有時都會諗「其實真正想要咁寫，但都係寫得溫和啲比較好吧。」，或者各行各業都有佢嘅難處吧。
我覺得呢啲見唔到嘅敵人係自己製造出嚟，令自己細膽唔敢做。我覺得有咩想做嘅話，數「一、二、三」去做就好！日本而家進入萎縮、艱難嘅時代，但正正就係喺咁嘅時候，先可以拍出呢套作品。就算只係一小部分睇咗劇集嘅人亦好，如果可以令多少少人可以打破框框嘅話，話唔定就可以變成一個更有趣嘅日本。我有少少咁嘅期望呢。
山田：睇咗《全裸監督》後可能會被人話，「萬一令年輕人產生誤會，喺社交網站入面模仿劇集內容嘅話點算！」之類嘅說話，但即使有人咁樣講，我都會話「唔係劇集問題，而係父母要好好同小朋友溝通吧。」（笑）。無論喺乜嘢年代都會發生呢種事，只係而家變得比較容易拎上枱面講。如果我哋太過在意呢啲忌諱而放唔開、唔敢講，咁就絕對拍唔出咁有趣，充滿刺激感嘅作品喇。
滿島：係啊，再加上《全裸監督》係全世界播出。作為日本土生土長嘅我哋，講嘅係日文，身體亦係日本文化同食物養成嘅，所以先會造出日本嘅作品。自己一直希望日本製作團隊、日本演員再加上日本劇本，可以製作出一套面向全世界嘅作品。雖然而家可能只係小小嘅一扇門，但就會令人期待可能會有一番從未感受過嘅新景象。我而家心裡面非常期待播出之後，或者會帶嚟一啲新嘅影響同行動。
劇情內容
公司倒閉、妻子外遇，陷入絕望谷底嘅村西（山田孝之飾）睇到成人影片嘅商機，於是決定同夥伴荒井敏（滿島真之介飾）、川田（玉山鐵二飾）一齊闖天下，一躍成為業界風雲人物。其後卻因為競爭敵手嘅阻礙而陷入窮途末路困境，喺呢個時候，村西面前出現一位女大學生佐原恵美（森田望智飾）。佢係母親嚴格教育之下，長期壓抑咗自己本來嘅性格。兩人命運般嘅相遇，將社會常識從頭到尾徹底顛覆…
- 卡司陣容：山田孝之、滿島真之介、森田望智、柄本時生、伊藤沙莉、冨手麻妙、後藤剛範、吉田鋼太郎、板尾創路、余貴美子、小雪、國村隼、玉山鐵二、中川雅也、石橋凌
- 總導演：武正晴
- 導演：河合勇人、內田英治
- 原著：本橋信宏《全裸監督》(太田出版)
- 劇本：山田能龍、內田英治、仁志光佑、山田佳奈
更多專訪內容 ：https://filmaga.filmarks.com/articles/2921/ (日文)
Comments