位於富山市中心地帶嘅富山市玻璃美術館，係一座展出咗多款日本國內外現代玻璃藝術品嘅設施。美術館主要透過美國現代玻璃藝術大師戴爾・奇胡利(Dale Chihuly嘅作品展、特展及館藏展，向公眾傳達玻璃藝術嘅魅力。
關於富山市玻璃美術館
富山市玻璃美術館位於世界著名建築師隈研吾設計嘅「TOYAMA KIRARI」(TOYAMAキラリ)複合式設施內。TOYAMA KIRARI大樓內部中央有一個非常廣闊嘅開放式中庭空間，而2樓到6樓嘅南區則被規劃為展覽樓層。
富山市玻璃美術館必睇特色
美術館內每個樓層嘅展廳都展出咗精緻現代玻璃藝術。以下就要為大家介紹各展廳嘅特色、必睇重點，以及館內商店及café等設施。
「玻璃藝術花園」：玻璃藝術大師戴爾・奇胡利作品
6樓「玻璃藝術花園」(Glass Art Garden)內展出咗當代玻璃藝術大師戴爾・奇胡利(Dale Chihuly)嘅玻璃裝置藝術品，當中包括《富山・千花》(Toyama Mille Fiori)、《富山・漂浮的船 》(Toyama Float Boat)等5件作品。每個作品都色彩絢爛，保證一定可以吸引您嘅眼球！
「館藏展」：日本國內外現代玻璃藝術品
4樓「館藏展」展出咗富山市30年來收集得來嘅現代玻璃藝術品。入場人士可以有機會欣賞藤田喬平、菅澤利雄等日本當代玻璃藝術家，以及其他日本國內外藝術家嘅作品。由於展覽內容會定期更換，因此依據唔同季節，您可以參觀到嘅藝術家作品亦會有所不同。
「玻璃藝術長廊」：當地當代玻璃藝術家作品
「玻璃藝術長廊」(Glass Art Passage) 屬於公共空間，位於美術館2樓到4樓嘅大廳區以及併設嘅富山市立圖書館內。長廊裡展出咗與富山有關嘅20位玻璃藝術家嘅50件作品。作品類型豐富，涵蓋容器、雕刻等等。
企画展「利諾・塔亞彼耶得拉 A Life in Glass」
曾於2019年10月12日到2020年2月9日期間舉行嘅特別企劃展「利諾・塔亞彼耶得拉 A Life in Glass」內，就展出咗意大利玻璃藝術大師利諾・塔亞彼耶得拉 (Lino Tagliapietra) 嘅80件作品。展品以色彩鮮豔活潑、具有流暢線條嘅作品為主，同場亦有介紹利諾・塔亞彼耶得拉嘅足跡。
富山市玻璃美術館商店及餐廳
美術館2樓有商店以及café「FUMUROYA CAFÉ」。美術館商店內出售展覽目錄、戴爾・奇胡利(Dale Chihuly)作品集（6樓「玻璃藝術花園」展品紀錄），手帕等美術館原創商品，以及玻璃藝術家作品等。
由金澤市老字號「加賀麩不室屋」經營嘅FUMUROYA CAFÉ提供使用北陸傳統食材「麵麩」製作而成嘅日式午餐及甜品。同場菜式包括意粉、炸肉排（カツレツ）、餡蜜（あんみつ）等、將生麩或車麩以現代風格重新演繹嘅多款料理，絕對不容錯過！
富山市玻璃美術館開放時間與票價
富山市玻璃美術館開放時間為9:30〜18:00，週五及週六延長開放至20:00，最後入場時間則為閉館前30分鐘。休館日為每月第一個及第三個週三(如當天為公眾假期則改為翌天休館)、年末年始。展品更換期間亦會休館。
Café及美術館商店營業時間及定休日因實際情況而異，詳情請上官方網站查詢最新消息。
富山市玻璃美術館成人門票為200日圓（包含4樓館藏展及6樓「玻璃藝術花園」） 。「玻璃藝術長廊」為免費參觀。特別企劃展票價則依各檔期展覽而異。（截至2019年9月資訊）。
如何前往富山市玻璃美術館
要前往富山市玻璃美術館，請首先以JR富山站為目的地。您可從JR富山站乘搭富山地方鐵道市內電車環狀線，或前往南富山站前嘅市內電車。
乘搭環狀線從JR富山站出發的話，車程約12分鐘即可抵達距離美術館最近嘅電車站「Grand Plaza前」。從電車站步行2分鐘即可抵達富山市玻璃美術館。
乘搭前往南富山站前市內電車的話，從富山出發車程約12分鐘即可抵達距離美術館最近嘅電車站「西町」。從西町站步行1分鐘即可抵達富山市玻璃美術館。
景點資訊
- 名稱：富山市玻璃美術館
- 地址：〒930-0062 富山縣富山市西町5-1
- 交通方式：JR富山站→[環狀線] 約12分鐘→Grand Plaza前站下車後步行約2分鐘 / JR富山站→[開往南富山站前] 約12分鐘→西町電車站下車步行約1分鐘
- Wi-Fi：有（TOYAMA Free Wi-Fi）
- 語言：英文（※QR Translator支援語言：中文、英文、韓文、法文、德文、義大利文。）
- 購票方式：現場購票
- 信用卡：可使用VISA、MasterCard、JCB、AMERICAN EXPRESS、Diners Club International、銀聯卡
Comments