※2019年12月24日更新※
感謝大家熱情參與本次日本旅遊送禮活動！
FUN! JAPAN在此公布是次活動得獎者如下 ：
暱稱/會員名稱：【L*** K*** Y***】
再次感激大家踴躍參加！
--
出發前必讀！何謂「越前加賀」？
所謂嘅「越前加賀」，即係由跨越福井縣、石川縣縣界嘅蘆原市、坂井市、永平寺町、勝山市以及加賀市嘅４市１町所組成嘅地區統稱。越前加賀位於海拔3,000米高嘅靈峰「白山」與日本海之間，範圍內座擁深受海外旅客歡迎嘅溫泉、美食、絕景，以至歷史、宗教、傳統，無論係初心者定遊日老手都可以喺到搵到盡興而歸嘅觀光元素！喺呢篇文章內，小編就特別精選出2夜1日行程，為大家介紹呢處近年備受注目嘅日本中部地區觀光地！
※本文附帶送大禮優惠活動。記得要睇到最後啊！
【勝山市】現代日本驚現恐龍！？帶你重返中世紀福井恐龍時代
恐龍、恐龍、全部都係恐龍！唔講可能唔知，福井縣其實係日本國內數一數二著名嘅恐龍化石出土地。喺國內首次被發現嘅７種新種恐龍當中，福井縣就佔咗５種，當中福井縣出土嘅恐龍化石數量，福井縣更加佔咗８成！嚟到日本「恐龍王國」，就梗係要去朝拜最具代表性嘅聖地啦！擁有閃閃生輝銀色鵝蛋型外觀嘅福井縣立恐龍博物館被稱為「世界３大恐龍博物館」之一。於2019年錄得總入場人次1,000萬人嘅設施內展出咗化石、標本、立體模型等，忠實重現出恐龍時代環境，保證你有一種有如身處當時、近距離觀光察恐龍嘅感覺！喺館內４４具恐龍全身骨格標本當中，更加有10具係如假包換嘅真．化石𠻹！
想要睇清楚邊啲係「真．化石」嘅朋友，小編就喺呢到畀個特別提示大家：記住留意展板上名稱有無「複製」字樣、又或者睇吓恐龍身上有無鐵支輔助就得喇（有鐵支盲係真．化石）！坊間博物館一般都唔歡迎入場人士觸摸展品，但喺恐龍博物館內就有一處展覽係可以畀大家任摸恐龍大脾骨唔嬲！睇完震撼萬分嘅展品後想醫肚嘅話，館內附設嘅café係好推介。特別推薦大家要點發掘化石造型嘅蛋包飯或小朋友一定大讚可愛嘅小童餐咖哩飯，因為外觀啱晒打卡呃like嘛！如果你夠細心嘅話，你仲會發現蛋包飯內埋住一粒鵪鶉蛋…！？
- 名稱：福井縣立恐龍博物館
- 地址：福井縣勝山市村岡町寺尾51-11 勝山恐龍之森內
- 營業時間：9：00～17：00（設延長開館期間）
- 定休日：每月第2・第4個星期三（如遇假期則順延至翌日休館，暑假期間無休）、年末年始（2019年度為2019年12月31日～2020年1月1日）
- 交通：越前鐵道勝山站徒步約15分鐘
- 官方網站：https://www.dinosaur.pref.fukui.jp/
難得一場嚟到恐龍淵源之地，唔參加一下化石發掘體驗又點算嚟過呢？「勝出恐龍公園」內提供一項充滿特色嘅體驗活動，就係將化石從實際化石發掘工地運送到園內，再位各位遊客親身一嚐發掘化石嘅滋味！據當地員工所講，旅客有好大機會可以發掘到植物或貝殼類化石，過去甚至亦有人曾經試過搵到新品種嘅哺乳類𠻹！
- 名稱：化石發掘体験
- 地址：勝山恐龍之森內 DokiDoki恐龍發掘樂園
- 舉行時間：2019年3月23日（星期六）～11月17日（星期日）
- ※期間內每日最多舉行４次（9:30～、11:00～、13:30～、15:00～）
- ※詳細日程請向官方查詢
- 官方網站：https://kyoryunomori.net/dig_experience/
【坂井市】福井必睇震撼絕景！日本首屈一指觀光勝地—東尋坊
喺恐龍國度一嚐探險家滋味後，下一站盲到就到福井之旅必睇嘅絕色美景。位處縣內北部嘅「東尋坊」，以延綿長約１公里嘅世界３大柱狀節理及縣崖峭壁地形而聞名。穿過一直延伸向海邊嘅懷舊商店街後，眼前立即出現180度無遮擋大海景！如果再小心翼翼地走向懸崖邊，嚟自日本海嘅驚濤駭浪就更加係腳下極近距離！
從展望台上感受完東尋坊震撼景觀後，你可以選擇乘搭觀光船由下而上眺望岩石峭壁、亦可以登上50米高嘅「東尋坊塔」環顧日本海，想從邊種角度感受福井最具代表性嘅絕景，你絕對有權話事！特別係夕陽西下、迷人晚霞時分嘅景致更係璀璨無比。當行到攰時，不妨考慮到展望台旁邊嘅「IWABA CAFÉ」，mark實有「神之席」之稱嘅梳發位、感受臨場感爆棚嘅咖啡一刻。「神之席」經常爆滿，有幸遇上嘅話證明你當日行大運！
- 名稱：東尋坊
- 地址：福井縣坂井市三國町安島
- 交通：越前鐵道三國站轉乘巴士約15分鐘，於「東尋坊」站下車即達
絕大部分到東尋坊觀光嘅遊客，都會順便將車程約5分鐘嘅「三國港」都一齊編入行程。港口城市「三國町」約有1,700年歷史、曾經於約江戶時代末期至明治時代初期繁盛一時。區內有唔少古老建築及區內風貌都得以保存至今，例如「舊森田銀行本店」及「舊岸名家」等日本建築物都歡迎遊客進內參觀。喺老街小鎮閒逛過後，係時候以三國港另一名物海鮮丼填飽個肚喇！小編今次到訪嘅「三國隱居處」係一家開店第2年嘅區內新店，主打餡料多到滿瀉嘅豪華海鮮丼。丼內裝滿咗10種海鮮之外，店主仲精心以貝殼當作和式屏風，無論係味道或係外觀都稱得上做100分！
- 名稱：三國隱居處
- 地址：福井縣叝井市三國町宿3－7－22
- 營業時間：9：00～（午市11：00～14：00）
- 休息日：星期四（如遇假期則順延至翌日休息）
- 交通：越前鐵道三國港站徒步約8分鐘
- 官方網站：https://inkyojo.jp/
【加賀市】美食住宿一網打盡、完全制霸1,300年歷史溫泉街！
行完景點一日，相信大家都行到攰。喺呢個時候，仲有乜嘢比得上浸一次舒舒服服嘅溫泉呢？被選為「加賀四湯」之一嘅「山中溫泉」係一處已開湯1,300年、並相傳係日本俳句詩人松尾芭蕉摯愛嘅溫泉勝地。由於從金澤站、福井站揸車到山中溫泉只需時約1個鐘、交通非常方便，因此現時唔少人都會慕名而來，為求一試對肌肉酸痛、皮膚病、手腳冰冷都十分有效嘅泉水。想要最有效率地遊歷一次溫泉街？就等小編帶你先從大街「蒸氣街道」出發啦！
喺呢條洋溢懷舊氛圍嘅溫泉街上，隱藏咗唔少掃街小食以及手信名店。堪稱為山中溫泉代表美食嘅「肉之Izumiya」可樂餅，就係必食名單之一。咪睇佢只賣120yen，份量十足嘅可妹餅內裡包住熱騰騰嘅大粒薯仔，保證可以令你暖到入心！據講如果係假期的話，可樂餅仲可以錄得每日售出1,000個嘅驚人數字，想要食嘅人記住要中午前後就要搶購喇！除此之外，由古民家改建而成嘅「和酒BAR 緣Gawa」，就為溫泉客提供一處夜晚暢飲美酒嘅好去處。需知道溫泉街內絕大部分店舖於黃昏過後就會關門，所以呢家營業至零晨12點嘅酒順理成章就成為夜鬼們蒲點。
辛苦跑完1日行程，當然要住返間優質溫泉旅館充一充電啦！ 喺10數家旅館酒店林立嘅溫泉匿內，小編特別挑選咗呢間創業800年、至今繼承35代嘅「白鷺湯 俵屋」。旅館房型以4人家庭都住得舒服嘅純和風客室為主，館內設有溪流露天風呂以及包廂大浴場，最適合一邊浸浴一邊享受幸福一刻。晚後再到溫泉街上「山中座」內嘅足湯設施「蘆湯」浸一浸腳，享受埋當地人都一致認可嘅足浴先叫識嘆！順帶一提。溫泉街旁邊長約1公里嘅溪谷「鶴仙溪」亦係一大紅葉勝地。每逢賞楓季節，溪谷都會染成一片火紅。記得唔好錯過呢處縣內紅葉景點喇！
- 名稱：山中溫泉
- 地址：石川縣加賀市山中溫泉
- 交通：JR加賀溫泉站轉乘巴士約30分鐘
- 官方網站：https://www.yamanaka-spa.or.jp/
【永平寺町】潛入禪世界、治癒心靈消除旅途疲勞！
可能大家都試過入住溫泉旅館，但係唔知大家又試過入住禪修旅館未呢？從福井市內出發搭乘巴士，約大約30分鐘即可到達以「禪學」以聞名嘅永平寺町。作為福井3大必到觀光景點之一，永平寺町被連綿山巒包圍、成個小鎮散發住一股嚴肅氣氛。除咗到道元禪師曹洞宗嘅寺院「永平寺」參拜之外，由2019年7月起，各位旅客仲可以到新開張嘅體驗型住宿設施「柏樹關」感受全新下榻體驗𠻹！
以禪畫、墨畫裝飾嘅走廊、綠意盎然嘅露天風呂、眺望永平寺町街景嘅日西合併客房…柏樹關內每個角落都有如禪修世界。安坐房內靜聽潺潺河水聲、又或享用季節時令精進料理，禪町內各式享樂方式任君選擇。當疲憊身驅得到充分休息後，記得仲要為味蕾送上福井縣出產嘅海鮮或品牌和牛等越前傳統料理，慰勞味覺一番呀！
要數一樣永平寺町不容錯過嘅體驗，必定係「坐禪」。對於首次嘗試坐禪嘅初心者，柏樹關特別聘請咗講解員為大家傳授坐禪方法。整個坐禪過程由10分鐘起跳，即使係初心者都可以放心輕鬆參加！安坐榻榻米上暫時遠離手機、都市煩囂，透過飲食及住宿全方位感受禪修世界，都不失為一種增添旅途荃忘回憶嘅方法吖。
- 名稱：柏樹關
- 地址：福井縣吉田郡永平寺町志比6-1
- 交通：越前鐵道永平寺口站轉乘轉前「永平寺門前」式「永平寺」之巴士約15分鐘，於終點落車後徒步約5分鐘
- 官方網站：https://www.hakujukan-eiheiji.jp/
【蘆原市】全面照興漫畫粉絲溫泉達人！每年超過100萬人到訪之蘆原溫泉
唔知各位有無聽過以競技歌牌為主題嘅日本漫畫『花牌情緣』呢？原來超人氣作品真人化電影其中１個取景地，就係福井縣蘆原市！正正就係因為該市場景多次出現於累積入場人次逾400萬人嘅電影及漫畫原著當中，蘆原市現時已一躍成為縣內炙手可熱嘅聖地巡禮景點！
蘆原市一大觀光勝地，就係獲選為「名湯百選」之一、於明治16年（1883年）開湯嘅「蘆原溫泉」。蘆原市溫泉街內共有74處源泉，約有30間旅館林立。如果你正猶豫要點樣盡玩呢處北陸地區人氣溫泉區嘅話，大可以先到車站前嘅足湯設施「蘆湯」。提供3種免費足湯嘅「蘆湯」嘅規模為北陸地方內數一數二龐大，更重要係從鐵路站出發只需行1分鐘就到！足湯營業至晚上11點，小編推薦大家可以趁黃昏時先一邊浸腳一邊眺望夕陽、然後再到旁邊嘅屋台村「溫泉蒸汽橫丁」食過晚飯，入黑後再返到足湯欣賞晚間點燈哦♪
- 名稱：蘆原溫泉
- 地址：福井縣蘆原市
- 交通：越前鐵道蘆原湯之町站徒步約2分鐘
- 官方網站：http://awara.info/
嫌足湯未夠盡興？不如學吓電影一眾主角，換返套「袴」嚟一趟名副其實嘅聖地巡禮啦！如果閣下無一套袴旁身，可以考慮到市內擁有280年歷史嘅「馬忠吳服屋」租借。成個換衫會由職員專業為你服務，過程只需15分鐘起跳（必須預約）即大功告成！於店內欣賞過漫畫作者末次由紀先生親筆簽名、以及原作插畫過後，順便再去埋2019年於「Arata坂」新建立嘅記念碑，實行嚟一趟『花牌情緣』聖地巡禮打卡之旅！「Arata坂」兩旁嘅櫻花林道亦係於作品中登場嘅故事舞台，尤其係櫻花滿開嘅時候，場面無疑係IG影相必到聖地！
結束蘆原市旅程之前，記得要將漫畫內亦有登場嘅「甘黨本陣 嵯峨」「雪人丸銅鑼燒」、又或者內含溫泉水成分嘅化妝水等極具溫泉街特色嘅手信都通通帶埋返屋企喎！
- 名稱：馬忠吳服屋
- 地址：福井縣蘆原市花乃杜1－1－19
- 營業時間：10:00～19:00
- 休息日：星期二、星期三
- 交通：JR蘆原溫泉站徒歩約15分鐘
- 官方網站：https://www.facebook.com/BACHUGOFUKUTEN/
【FUN!JAPAN送禮活動】
越前加賀之旅係咪好吸引呢？如果你眼睛都立即想旅行，而家有機會喇！FUN! JAPAN特別為讀者準備咗※加賀溫泉站出發・福井站解散嘅「東尋坊・永平寺的士觀光行程（定價成人11,800日圓、小童8,300日圓）＋★“越前鐵路1 日無限票＋永平寺特別套票「大本山永平寺參觀套票」（定價2,020日圓），名額只得1組2名咋！想要免費得到咁抵嘅觀光機會，記住透過下面條link踴躍報名喇喎～
※司機隨團出發，免卻交通煩惱！行程當天由 JR加賀溫泉站集合出發、乘坐的士約4～5小時參觀東尋坊及永平寺2大觀光景點後，返回JR福井站解散。
★套票包含越前鐵道1 日無限乘車票及永平寺參拜費用。隨票附送往返「永平寺口站～大本山永平寺」巴士車票。
※本活動截止期限：2019年11月7日
※得獎通知公佈日期：2019年11月15日或之前
※獎品使用期限：2019年11月18日～2020年1月24日 （日本年末年始除外。因預約情況而異，或會出現未能提供所定期間之車票，敬請原諒。）
sponsored by Echizen-Kaga Organization for Promoting Inbound Tourism
Comments