青森縣當地餐廳可以食到海鮮、當地鄉土料理、甜品等美食。以下就為大家介紹到青森旅行必食嘅5種名產美食。
大間鮪魚丼飯
大間鮪魚（吞拿魚）丼係使用大間町捕獲嘅鮪魚製作嘅一道當地料理。大間嘅鮪魚品種係黑鮪魚，喺東京築地市場拍賣中經常拍出高價，所以有「黑鑽石」之美譽。其特色係肉質鮮甜、濕潤細緻、味道濃郁，令人齒頰留香。
口喺大間漁港同大間町崎周邊有很多食肆可以食到鮪魚丼。其中比較出名嘅餐廳係「KAMOME（お食事処かもめ）」、「Omanzoku（大間んぞく）」、「福壽司」。大間鮪魚丼一份價格約為2,300至2,800日圓。（截至2019年9月資訊）
八戸煎餅火鍋
八戸煎餅火鍋係青森縣八戶地區嘅鄉土料理，用魚類、蔬菜等食材煮出高湯，再放入湯汁專用嘅煎餅（おつゆせんべい）。同魚、菜、肉一齊熬煮嘅仙貝，好有咬口，湯汁又入哂味。
八戸煎餅火鍋之所以出名，歸功於地方振興團體「八戶仙貝湯研究所」所舉辦嘅當地美食比評大賽「B-1大獎賽」，被媒體報導過後，成為一道著名美食。
JR八戶線嘅本八戶站周邊有好多可以食到八戸煎餅火鍋嘅餐廳。其中比較出名嘅係「MINATO食堂（みなと食堂）」同「一葉亭（いちば亭）」。八戶仙貝湯嘅價格合理，一份大約600日圓。（截至2019年9月資訊）
味噌咖哩牛奶拉麵
味噌咖哩牛奶拉麵係青森縣嘅靈魂食物，受縣民愛戴30年！喺味噌、醬油或鹽味嘅湯底中加入咖哩粉同牛奶，然後再放上一塊牛油。濃厚嘅味噌同牛油，加上醇厚嘅牛奶同辛辣嘅咖哩，配搭得天衣無縫！
喺青森縣可以食到味噌咖哩牛奶拉麵嘅店唔多，大部分集中於JR青森站周圍。其中最具代表性嘅係發明味噌咖哩牛奶拉麵嘅「味之札幌」。另外，除咗青森縣本店「味之札幌 大西」，仲有由第二徒弟經營嘅分店「味之札幌 淺利」。本店「味之札幌 大西」距離青森站約10分鐘路程，交通便利。拉麵一碗價格730日圓起。（截至2019年9月資訊）
Shamorock雞料理
「Shamorock（シャモロック）料理」使用嘅食材係青森本地雞種「Shamorock雞」(シャモロック)，即係肉質有咬口嘅「橫斑Shamo雞（横斑シャモ）」同肉質柔軟的「黃斑Shamorock雞」（黄斑プリマスロック）嘅混種雞。「Shamorock雞」肉質緊實，食起嚟好有咬口，味道濃厚鮮美。「Shamorock雞」料理有火鍋、炸雞、串燒同親子丼等等，種類豐富。
「Shamorock雞」料理嘅著名餐廳有「誇屋」、「道路休息站 六戶（道の駅 ろくのへ）」。價格因菜式而異，炸雞、串燒單嗌每份約500日圓，親子丼約1,200日圓，而火鍋套餐約5,500日圓起。（截至2019年9月資訊）
蘋果甜品
蘋果係青森縣嘅代表性水果。產量佔日本全國57％，其中「富士」呢個品種嘅蘋果產量約佔47％。而使用青森蘋果製作嘅甜品有好多，例如蘋果派、義式雪糕、和菓子等等。
JR青森站同JR弘前站周邊有好多餐廳可以食到呢啲蘋果甜品。如果想食蘋果派，推薦JR弘前站附近嘅「茶房CoCo」。如果想品嚐濃厚蘋果味嘅義式雪糕，推薦JR青森站附近嘅「Gelato Nature Due」。
蘋果甜品嘅價格因種類而異。蘋果派平均價格約250日圓，但都有啲店只需140日圓，而義式雪糕單球約300日圓。（截至2019年9月資訊）
Comments