神秘的青森縣恐山日本三大靈場之一

恐山係青森縣陸奧市中心嘅一座山，自古以來就係當地居民祈禱死者靈魂安息嘅地方，不過同時亦有旅遊景點、溫泉同住宿設施等。一齊嚟睇吓恐山有幾神秘？

有關青森縣的「恐山」

青森縣嘅「恐山」、滋賀縣嘅「比叡山」，同和歌山縣嘅「高野山」並列為日本三大靈山。恐山唔只係單一嘅山峰，而係劍山、地藏山、雞頭山等8座外輪山，同被以上山脈所包圍嘅盆地之總稱。

恐山嘅巫女「Itako（イタコ）」好出名。「Itako」係指有能力令死者靈魂附身喺自己身上，代替亡魂傳達訊息嘅靈媒。喺夏季同秋季舉行嘅兩大祭典上，會有好多Itako聚集於此，召集死者靈魂，進行「通靈（口寄せ）」。

恐山中心景點「恐山菩提寺」嘅周邊，瀰漫著刺鼻嘅硫磺味，仲可以睇到經常噴出亞硫酸氣體嘅岩石等獨特景觀。其他仲有地獄巡禮、極樂濱同靈泉等景點。

「地獄巡禮」係嚟到恐山必去嘅景點之一。巡禮當中包括血池地獄、重罪地獄、地獄谷、無限地獄、淘金地獄同賭博地獄等等，可以睇到一大片岩石，仲有站立於池塘中嘅菩薩等特色景象。

「極樂濱」係宇曾利破火山口中形成嘅宇曾利山湖之通稱。翡翠綠嘅湖水靚到會令人聯想到極樂淨土嘅白色沙灘，散發一股神秘感！雖然呢個係一個好靚嘅自然景觀，但亦有人覺得睇到令人毛骨悚然呢！唔知你去到，會有咩感受呢？

恐山菩提寺內有4個溫泉，據說係靈泉。以前會有人利用溫泉水淨身後再去廟裡參拜。呢4個溫泉嘅水呈現混濁嘅白色，各有唔同功效。只要係進入恐山嘅人都可以使用呢個溫泉。

既然嚟到恐山，不如體驗一下「宿坊」。宿坊就係係喺寺廟住宿、參與各種寺廟體驗等。有興趣嘅可以去入住「恐山溫泉宿坊吉祥閣」，仲可以透過食精進料理（素食料理）同浸溫泉嚟放鬆一下身心。

但請注意，因為呢度係一個宿坊，所以需遵守許多規則，例如用餐規則、熄燈時間都有規定等等，朝早仲要參加晨早誦經儀式。住宿費方面，住一晚附兩餐費用約12,000日圓。（截至2019年9月資訊）

恐山從5月至10月開山，時間因各個時期而異，5月至10月中旬為早上6點至晚上6點；10月中旬至10月底為早上6點到下午5點。入山費用為大人500日圓。（截至2019年9月資訊）

從JR下北站搭恐山線巴士，車程約45分鐘就會抵達恐山。