【日本青森】一生必去東北地區賞櫻名勝！青森城弘前下町

弘前市係位於青森縣西南部津輕地方嘅主要都市，市內至今仍然保存著多幢極具歷史價值嘅建築物，例如弘前公園內嘅「弘前城」就坐擁東北地區唯一現存天守閣，以及遍佈市內嘅多間寺院或武家屋敷（武士宅邸）。美食方面，當然唔少得青森縣特產「蘋果」以及使用蘋果製成嘅各種當地名物美食啦！

有關青森縣弘前

弘前市位於青森縣西南部津野平原以南。東部可以眺望奥羽山脈八甲田連峰，西部有青森縣最高峰岩木山，北部則有流向中央地區嘅岩木川。弘前擁有豐富觀光景點，當中包括植物園、日本庭園、大自然絕景等等。

弘前一年平均氣溫為攝氏10.2度，係一個比較涼爽嘅地區。6月至9月夏季平均氣溫為攝氏22度，12月至3月冬季平均氣溫為攝氏6度，冷暖溫差較大。

弘前嘅四季變化鮮明，遊客可以喺市內欣賞到四季唔同風景。4月下旬，弘前公園吉野櫻盛開，係日本最佳觀賞櫻花勝地之一；10月左右，就輪到火紅楓葉當主角；1月至2月，則係飽覽白雪覆蓋夢幻美景嘅最佳時機。

弘前嘅景點集中於JR弘前站周邊，以下就為大家介紹部分推薦必去景點以及值得留意嘅祭典活動。

弘前係曾經係津輕十萬石嘅城下町，因此市內有唔少歷史建築物，例如寺廟、神社、武士住宅等，仲有被指定為日本國家重要文化財、座落於弘前公園內嘅「弘前城」。古城除咗擁有東北地區唯一現存嘅天守閣，仲有櫓、城門同橋樑等都一一保留至今。

其他推薦嘅景點，仲包括建於1600年代嘅「長勝寺」、「最勝院」，同埋被譽為東北地區最美之塔嘅「五重塔」等等。

弘前擁有山脈、河川等豐富自然資源，例如「岩木山」、「白神山地」、「孤獨地區水田」等。其中岩木山係青森縣最高嘅山，從山頂可以眺望八甲田連峰同十三湖；而山腳下更有10個溫泉源泉，想要浸返個靚溫泉或者浸足浴都非常適合！

除此之外，白神山地亦係青森縣一大代表名勝。橫跨兩縣嘅廣闊山地內，種有世界上最大規模嘅原始山毛櫸林，同埋多達113科、600種動植物。由於自然資源相當豐富，因此促成白神山地於1993年被登錄為世界遺產。

弘前每年都會舉行各式各樣祭典活動，例如係每年4月下旬至5月初舉行嘅「弘前櫻花祭」就係一大著名盛事。遊客屆時可以欣賞到大約50種、約2,600棵櫻花樹盛開嘅景象，壯麗畫面非常驚豔！

另外，每年8月初舉行嘅「弘前睡魔祭」亦係日本最具代表性嘅象徵活動之一。祭典期間會有80座大大小小嘅立體「睡魔燈籠」花車喺街上巡遊，魄力十足！

弘前出名嘅鄉土料理包括「弘前炸魷魚（弘前いがめんち）」、「味噌烤扇貝（貝焼き味噌）」等使用海產製成嘅美食固然屬必食，不過難得一場嚟到青森，又點可以唔試埋盛產嘅蘋果呢?

有興趣嘅朋友，只要隨便喺JR弘前站附近或者弘前公園附近兜個圈，就可以搵到好多餐廳商店都有賣呢啲當地特產料理同蘋果製品！

弘前嘅住宿設施集中於JR弘前站周邊，以純住宿為主、無餐廳或宴會場等其他設施嘅經濟型酒店「宿泊特化型酒店」數量較多。價錢合理，每晚約5,000至10,000日圓。

如果想入住日式旅館，建議去岩木山山腳下嘅溫泉區。價格約為每晚7,000日圓以上，比JR弘前站附近嘅酒店貴少少。（資訊截至2019年9月）

喺JR新青森站搭JR奥羽本線，約25至40分鐘，就可以抵達JR弘前站！