岡山嘅餐廳除咗可以食到喺瀨戶內海捕獲嘅新鮮海鮮料理，仲有各種各樣嘅鄉土料理、當地特色美食，仲有用當地產牛肉或雞肉等各種食材製作嘅料理。今次為大家介紹去到岡山五大必吃嘅美味料理啦。
蒜山炒麵（ひるぜん焼きそば）
蒜山炒麵（ひるぜん焼きそば）係岡山縣北部蒜山地區嘅著名美食。加入特產嘅雞肉同椰菜，用濃郁、鹹鹹辣辣嘅味噌醬調味炒出一盤令人垂涎三尺嘅炒麵。其名聲大噪嘅原因係喺1950年代後半期，當地有一間名叫「masuya食堂（ますや食堂）」嘅店以秘傳嘅味噌醬烹調出嚟嘅炒麵獲得唔少好評，以此為契機而開始將呢道料理推廣起嚟。
想知道蒜山炒麵有幾特別、幾好味？可以去岡山縣市區嘅「高原亭」、「Yamana食堂（やまな食堂）」、「悠悠」等店試吓。價錢方面，單嗌大約650円、套餐大約850円。另外，各間店嘅調味同配料都有所不同，大家都可以試吓每間店嘅差異呀。（截至2019年9月當前資訊）
岡山散壽司（岡山ばらずし）
岡山散壽司（岡山ばらずし）係一道岡山鄉土料理，喺醋飯上擺滿喺瀨戶內海所捕獲嘅海鮮同當造蔬菜，可以講係一道豪華豐富嘅壽司料理。岡山散壽司嘅歷史可以追溯到17世紀，當時為咗抗議岡山藩主所頒下嘅「一汁一菜（一湯一餸）」節約令，老百姓們開始喺米飯上擺魚類同蔬菜嚟當做「一道餸」嚟享用。
有興趣可以去JR岡山站內嘅「吾妻壽司」同岡山市內嘅「喜怒哀樂」、「夜壽司」等餐廳就可以品嘗得到岡山散壽司，大約1,600円就可以大啖食新鮮美味嘅魚、蝦、貝海產，係咪好抵先？（截至2019年9月當前資訊）
蝦仁炒飯（えびめし）
蝦仁炒飯（えびめし）可以講係岡山代表性嘅西式料理。加入醬汁將白飯同蝦製成炒飯，其最大特徵係呈現黑色嘅成品，原因係醬汁係使用咗焦糖、番茄醬同辛香料調配而成。甜味同辣味嘅比例絕妙，口味溫和唔強烈。
提供蝦仁炒飯嘅店「蝦仁炒飯屋（えびめしや）」喺岡山縣有三間店，仲可以試吓去位於JR岡山站內嘅「Lunch&Beer SUN」。價錢大約700至800円円左右。（截至2019年9月當前資訊）
津山內臟炒烏冬（津山ホルモンうどん）
津山內臟炒烏冬（津山ホルモンうどん）係位於岡山縣北部城下町津山市嘅當地著名料理。炒烏冬裡頭加入牛內臟，用味噌、醬油等醬料調味。牛內臟營養豐富，擁有獨特嘅味道與口感。
喺津山市市內提供內臟炒烏冬嘅店共有20間以上。當中「橋野食堂」、「御好燒三枝（お好み焼き三枝）」同「為食鬼（くいしん坊）」等當地店鋪都好出名。烏冬嘅價錢一底約800円左右、加底大約900円。（截至2019年9月當前資訊）
Shino烏冬（しのうどん）
Shino烏冬（しのうどん）係倉敷市玉島地區流傳嘅著名烏冬料理。據聞係18、19世紀玉島嘅圓通寺有一位僧侶喺修行時食過嘅烏冬。麵條闊2厘米、長度居然到達一米以上，又粗又長嘅麵條係其最大特色。另外，依唔同店所熬煮同調味出嚟嘅湯頭都有唔同味道同風格，各有特色。
想食Shino烏冬就去玉島地區搵啦，例如有「國民宿舍 良寬莊」提供Shino烏冬嘅寄世鍋（寄せ鍋）、「手打烏冬 藏」則可以食到咖哩口味嘅Shino烏冬，無論邊間店都相當受歡迎。價位依菜式有唔同，但一碗烏冬大概1,000円左右。（截至2019年9月當前資訊）
Comments