佐渡金礦位於新潟縣佐渡島上，係一座歷史悠久嘅金銀礦場，廣闊佔地內佈滿礦山遺跡，採礦設施及冶煉設施。與此同時，金礦亦係一個極具歷史價值嘅遺跡，於2010年更作為「佐渡礦山遺產群」被聯合國教科文組織列為以金礦為主嘅世界遺產候選！
關於佐渡金山
佐渡金礦係日本最大嘅金銀礦。礦脈從東向西延伸約3000米、從北向南延伸約600米、深約800米。據聞自1601年開採近400年來，黃金總開採量已達78噸、銀則有2,330噸。
佐渡金山必睇必玩特色
佐渡金山最受歡迎嘅特色，就係遊客可以實際走入坑道、深入地底參觀。您亦可以參加體驗貼金箔嘅工作坊，又或品嚐加入咗金箔粉嘅料理𠻹！
佐渡金山坑道遊覽路線
佐渡金礦一共設有兩條路線供遊客參觀隧道內部，分別為「宗太夫坑江戶金山繪卷路線」與「道遊坑明治官營礦山路線」。宗太夫坑江戶金山繪卷路線係一條於1600年代初挖出嘅坑道，沿途展出咗原吋大人型模型，將昔日採礦場景重現眼前。
另一方面，道遊坑明治官營礦山路線則於1899年挖成。遊客於坑道可以參觀到日本最大嘅金礦遺址以及佐渡金山象徵「道遊之割戶」。道遊之割戶即係從礦山開山到閉山期間嘅採礦遺跡。參觀期間您亦可以抬頭望望因人工開採而呈現V形嘅礦山頂部，壯觀景色令人嘆為觀止。
於展示資料室內親手觸摸金條！
佐渡金礦內設有兩個材料展覽室。第一展示廳內用上西洋鏡，向遊客以深入淺出嘅方式重現出開採金礦石時製造硬幣嘅過程；而第二展覽室內，則不容錯過內裡展出嘅純金條。您更可以嘗試親手觸摸金條，挑戰將金條從展示櫃小孔拎走𠻹！
到工作坊體驗貼金箔或製作銀飾黏土
體驗工作坊提供兩種體驗予遊客參加。第一種體驗為貼金箔，只要將金箔簡單貼到器具上，就可以製作出尊屬自己嘅獨一無二作品，相當難能可貴！
而第二個體驗，則係烘烤黏土並將黏土製作成銀飾。遊客將內含銀成分嘅粘土填滿於各種形狀嘅特殊模具後風乾並烘烤，銀飾即大功告成，保證一定可為您嘅旅程留下難忘實體回憶！
金山茶屋金粉料理
參觀完礦山後，不妨順便到金山茶屋品嚐加入咗金粉嘅料理吖！例如「金山蕎麥麵」上面就放著混有金粉嘅海藻，「金山咖哩」則以白飯堆積出「道遊之割戶」形狀。 除此之外，以佐渡海域海鮮製成嘅特製海鮮丼、「 金山Champon」（什錦麵）亦係推介必食。要注意，特製海鮮丼數量有限，如果想要食到限定美食，儘早去餐廳霸位是常識吧！
佐渡金山營業時間與票價
佐渡金山營業時間因季節而異，4月到10月為上午8:00至17:30，11月至3月則為8:30到17:00。最後入場時間均為營業結束前30分鐘。全年無休。
佐渡金山參觀費用為成人900日圓（宗太夫坑江戶金山繪巻路線與道遊坑明治官營礦山路線各自收費）。如果同一日參觀以上兩條路線，則建議購買套券，費用為成人1,400日圓。（截至2019年9月資訊）
前往佐渡金山嘅交通方式
遊客有幾種方法可以到達佐渡金山所在嘅佐渡島，其中編輯部會建議您從渡輪航班較多嘅新潟市新潟港出發。從新潟港乘搭噴射水翼船前往佐渡島兩津港，約需1小時5分鐘；乘搭汽車渡輪則需2小時30分鐘。從兩津港出發轉乘當地巴士到距離佐渡金山最近嘅巴士站，大約需1小時10分鐘。
景點資訊
- 名稱：佐渡金山
- 地址：〒952-1501 新潟縣佐渡市下相川1305
- 交通方式：新潟站→[路線巴士]約15分鐘→新潟港→[佐渡汽船噴射水翼船]約1小時5分鐘，或[佐渡汽船汽車渡輪]約2小時30分鐘→兩津港→[當地巴士]約1小時10分鐘→佐渡金山
- Wi-Fi：有（Sado City Free Wi-Fi）
- 語言：有中文、英文導覽手冊
- 英文（館内導覽）
- 英文（資料館：掃描QR Code讀取導覽介紹，提供中文、韓文版本）
- 購票方式：現場購票
- 信用卡：可使用VISA, MasterCard, JCB, AMERICAN EXPRESS, Diners Club International, Discover, Union Pay
Comments