講到邊到係夢想王國，就會諗起東京迪士尼度假區。除咗大人小朋友都鍾意嘅東京迪士尼樂園，同埋東京迪士尼海洋之外，喺度假區入面嘅迪士尼酒店，亦係充滿夢想同埋驚喜。其中包括可以同迪士尼明星見面嘅「Disney Ambassador® Hotel (迪士尼大使®大飯店)」、喺正東京迪士尼海洋嘅「Tokyo DisneySea Hotel MiraCosta (東京迪士尼海洋觀海景大飯店)」同埋喺東京迪士尼樂園正對面嘅「Tokyo Disneyland Hotel (東京迪士尼樂園大飯店)」，仲有比較經濟實惠型嘅「Tokyo Disney Celebration Hotel® (東京迪士尼樂祥飯店®)」。今次，FUN! JAPAN團隊要帶大家來參觀吓客房數多達706間嘅「Tokyo Disneyland Hotel」。
地理位置極佳 東京迪士尼樂園近在咫尺！
乘搭JR京葉線快速抵達舞濱站時，就可以見到東京迪士尼樂園園區，同埋一整排維多利亞風格設計嘅建築，呢個就係「Tokyo Disneyland Hotel (東京迪士尼樂園大飯店)」喇，出咗舞濱站步行大概8分鐘就到，由酒店行去東京迪士尼樂園，都唔使1分鐘，地理位置極佳。
米奇米妮歡迎你 Welcome to Tokyo Disneyland Hotel
搭電車嚟嘅客人，一到飯店就會見到張開手嘅米奇同埋米妮嘅造型樹迎接大家光臨，中庭廣場嘅涼亭都係超級適影靚相，仔細觀察仲可以見到隱藏嘅米奇啊～
由機場搭機場巴士嚟嘅人，就會喺酒店正門落車，而正門前面就係「幻想曲廣場」，有魔法師米奇同埋佢個拍擋(?)，栩栩如生嘅掃巴喺到迎接客人。
裝修富麗堂皇 令人嘆為觀止
落車後，行入酒店，就可以見到樓梯上面嘅愛麗絲磁磚壁畫，行上樓梯，樓底成30米高嘅酒店大堂就會出現喺您眼前，華麗嘅燈飾同噴水池，仲有復古嘅箱型電梯都當壯觀。
客房房型種類多 充滿迪士尼特色
Tokyo Disneyland Hotel (東京迪士尼樂園大飯店)嘅客房總數多達706間，喺訂房時可以揀睇到東京迪士尼樂園園區景色嘅「樂園景觀」客房，或者係正對東京迪士尼樂園嘅「樂園全景觀」客房。另外，酒店入面嘅設計都充滿心思，好多地方都隱藏咗迪士尼明星嘅身影，大家有機會可以同米奇「捉迷藏」。最特別嘅客房種類係有4種唔同嘅「迪士尼明星房」，一打開房門，就好似走入咗經典場景咁，體驗到劇中主角的嘅世界觀。詳細客房介紹請按此
園區內未買夠？！返到酒店繼續買
酒店入面附設嘅迪士尼小舖「迪士尼精品店」，喺迪士尼酒店入面規模最大嘅一間。除咗東京迪士尼度假區嘅商品之外，仲有酒店嘅獨家商品，更加有要酒店客人先買到嘅限定公仔與tote bag組合！
酒店內已附設商品豐富齊全嘅便利店
酒店內有附設便利店，叫「鏡緣禮品店」，不單止有飲品、零食賣，仲有紙尿布、嬰兒食品同埋手信禮品等。而最特別嘅係，呢度賣嘅大部份商品，都係有迪士尼明星嘅圖案。
自助退房超方便 唔使排隊等候
以前，迪士尼酒店曾經會提供住客專屬房卡，退房之後可以帶返屋企做紀念。不過而家酒店嘅門鎖都更新咗，已經停止咗呢項服務。但係，如果你有預先登記咗「快速退房」嘅話，退房嘅時候，只需要將房卡放入指定嘅卡箱，就完成退房！係咪勁方便呢～
酒店資訊
- 酒店名稱：Tokyo Disneyland Hotel (東京迪士尼樂園大飯店)
- 地址：千葉縣浦安市舞濱29-1
- 客房數：706間
- 交通方式：從JR舞濱站步行約8分鐘/從迪士尼度假區線‧東京迪士尼樂園站步行1分鐘
- Wi-Fi：有
- 語言：英文、中文、日文
- 信用卡：可使用信用卡
- 入住／退房時間：15:00／12:00
Comments