青森縣「古川市場」必食自助海鮮料理？

「古川」作為「青森縣民的廚房」，人潮經常絡繹不絕。古川市場內嘅店鋪販售喺陸奧灣捕獲嘅新鮮海產，好推薦大家喺度品嚐當地使用新鮮海鮮食材製作嘅名產美食。店鋪營業時間從清晨5點開始，可以早啲起身，散完步去「拆」返餐好嘅！

日本青森縣「古川市場」

青森縣嘅「古川市場青森魚菜中心」距離青森站僅5分鐘路程。自1960年代開業以來，市場內約有30間鮮魚店同熟食店。自2010年東北新幹線新青森站開通後，古川市場舉辦嘅名物美食「NOKKEDON」（のっけ丼）企劃也大受歡迎。

古川市場嘅名產美食「自助海鮮丼（のっけ丼）」係一個自助式丼飯料理，可以喺白飯上任意添加自己鐘意嘅海鮮食材。購買餐券後（5張券售價650日圓、10張券售價1,300日圓），就可以同店家兌換一碗白飯。拎住丼飯碗，就可以去各間店揀自己鐘意嘅魚生同各種餸菜之後，就完成一份屬於你自己、獨一無二嘅丼飯喇！

春季到夏季有鮟鱇魚、鱒魚、扇貝同蠔等食材。夏季到秋季有比目魚、海膽、柴魚等。秋季到冬季有秋刀魚、沙甸魚、三文魚同吞拿魚。冬季到春季有吞拿魚、鱈魚、油甘魚、蟹、河豚、八爪魚等。

裝好自助海鮮丼（のっけ丼）後，可以喺市場內嘅休息區悠閒地享用。如果唔夠喉，仲可以即刻加購餐券。現場仲有賣味噌湯、醃漬物同生啤。自助海鮮丼嘅販賣時間為7:00至16:00，唔提供外賣服務。

營業時間為清晨5點到下午6點。每月逢星期二，1月1日及1月2日休息。

從東京去古川市場，可以從東京站搭東北新幹線，約3小時20分鐘後於新青森站落車，轉搭5分鐘JR電車，於青森站落車後行約5分鐘就到古川市場。