位於東京都池袋嘅SUNSHINE水族館將於2019年9月27日至11月4日期間限定，喺夜晚18時半至22時舉行「夜間特別營業」，主題為「性福滿溢展」。
猶如蒲夜場嘅水族館
一聽個名就知道好有噱頭嘅展覽，其實係館長好用心良苦，想大家好奇心驅使下去了解「生物嘅多元性」。夜間特別營業嘅水族館，整到成個夜場咁樣，令大家入場就進入夜生活氣氛。今次嘅展覽分咗兩大區域，分別係「夜晚嘅歡樂街」同埋「好有氣氛嘅房間」，仲有可以親身體驗嘅「偷窺BOX」同埋「觸摸BOX」，而且每個入場者都會送一份「性福滿溢」嘅禮物。將水族館變成夜場，除咗可以認識海洋生物生態之外，仲可以影靚相，真係非常有心思。
多樣性嘅海洋生物
我地先一齊嚟預習一下其中一部份嘅海洋生物性：
愛我就飲哂佢大作戰：兵鯰魚 (Corydoras)
兵鯰魚嘅雌性係會飲雄性嘅精子！？據說飲咗之後，經過消化器官再排出，會容易啲令喺雌性腹鰭嘅卵子受精……
華麗嘅性別轉換 ：瘤鯛(金黃突額隆頭魚)
瘤鯛，又叫金黃突額隆頭魚，佢地嘅特性係喺群族之中最大嘅雌性會轉性成為雄，而隨住雄性成長，先會發育到平時睇圖片那種個額頭腫起哂咁樣嘅瘤鯛！
愛到忍唔住咬你：豹紋鯊
豹紋鯊外表可愛，但佢嘅交尾活動就非常激烈，雄性會咬住雌性嘅胸鰭，令雌性郁唔到，先至開始佢地嘅交尾行為。有時甚至會因為夜間運動太激烈，令雌性受傷…。
送神秘禮物 仲有打卡位
展覽會會喺星期五、六晚七點半開始，有職員夜話，講吓海洋生物嘅夜生活。而平日亦都有豐富嘅夜生活：包括可以摸鏢本嘅「觸摸BOX」 ，同埋可以睇蟹行房嘅「偷窺BOX」。另外仲有內容保密嘅「性福滿溢封頁」送畀每個入場人士。當然唔少得有影相位畀大家打卡。
大家有無興趣去體驗吓呢個另類嘅夜生活呢？
活動資訊
- 設施名稱：SUNSHINE水族館
- 活動名稱： SUNSHINE水族館 夜間特別營業「性福滿溢展」
- 活動日期：2019年9月27日（五）〜11月4日（一）※10月17日（四）為休息日
- 營業時間：18:30 〜 22:00 ※關門前1小時停止入場
- ※活動期間中，水族館普通開放時間為9:00至18:00 (17:00停止入場)
- 地址：東京都豊島区東池袋3-1 SUNSHINE CITY內SUNSHINE水族館本館
- 入場費：中三以上2,200円、小學生至中三學生1,200円、兒童 700円、PAIR票3,500円 (4歲以下無需購票)
- 官網網址：https://sunshinecity.jp/aquarium/
Comments