富山縣當地餐廳提供各式各樣嘅日式美食，包括喺富山灣捕獲嘅海產所製作嘅海鮮料理、當地料理、和菓子等等。今次為大家推介5種富山特色美食啦。
富山黑拉麵（富山ブラックラーメン）
「富山黑拉麵」嘅特色係黑色湯頭。富山黑拉麵嘅來源係因為富山於第二次世界大戰遭受空襲後，參與重建工程嘅工人為補充因汗所流失嘅鹽分，所以喺拉麵嘅湯頭中加入咗濃度較高嘅醬油。鮮甜高湯同濃醇醬油嘅平衡拿捏得啱啱好，好味到一食就會上癮。
富山站附近有好多可以食到富山黑拉麵嘅店。其中有著名嘅黑拉麵發源店「西町大喜」、喺Tokyo Ramen Show（東京拉麵秀）上五度獲得第一名嘅「麵家IROHA（麺家いろは）」。價錢每間店略有不同，約為650至900円。（2019年9月資訊）
白蝦（シロエビ）
白蝦係富山嘅特產，喺富山灣可以大量捕獲。透明嘅身體帶有一點粉紅，有「富山灣的寶石」之稱。使用白蝦嚟製作嘅料理有好多種，其中特別出名嘅係經常喺電視節目上出現嘅「白蝦漢堡」。酥脆炸白蝦同自家製沙律醬（Tartar sauce）簡直係完美嘅搭配呀！
白蝦漢堡可以喺「道之驛 Kamon Park 新湊（道の駅カモンパーク新湊）」餐廳食到。喺日式炒麵上放上白蝦嘅「射水日式炒麵（いみず焼きそば）」、八爪魚同白蝦為組合嘅絕品美食 「海君章魚燒（シーちゃんたこ焼き）」都係人氣之選。價錢方面，可以參考一個「白蝦漢堡」大約為420円。（2019年9月資訊）
螢光魷魚（ホタルイカ）
「螢光魷魚」係富山灣捕撈到嘅海產之一，其特色係體型較大，食落順滑嘅口感，從3月到5月為當造時期。螢光魷魚嘅料理方法有好多種，最主要嘅方法係「煮」，即係將整隻魷魚放入滾水烹煮。另外，魚生、天婦羅，或者沾混合味噌同黃芥末嘅醬料食嘅「辛子酢味噌」都好受歡迎。
螢光魷魚料理喺富山站周邊嘅高級日本料理餐廳、居酒屋等可以食得到，其中特別出名嘅店係「魚處八橋（魚処やつはし）」 、「割烹小川」螢光魷魚價錢因應每間店而唔同，單嗌約650円，價格合理。（2019年9月資訊）
鰤魚涮涮鍋（ぶりしゃぶ）
富山縣冰見市以喺波濤洶湧嘅日本海生長、富含油脂嘅「冰見寒鰤」聞名。冰見寒鰤喺日本全國都非常出名，被視為高級品牌食材。每年11月至隔年2月係當造季節，呢個時期捕獲嘅鰤魚脂肪同肉質扎實程度達最佳平衡點。
同樣地鰤魚都有多種食法，例如有魚生、蒸煮料理、鹽燒料理等，其中最推薦嘅係將切成薄片嘅鰤魚放落日式高湯中烚一烚嚟食嘅「鰤魚Shabu（涮涮鍋）」。
提供鰤魚涮涮鍋嘅餐廳當中，以冰見市嘅「Himi濱（ひみ浜）」同「割烹 扇」特別出名。食鰤魚涮涮鍋嘅預算介乎喺6,000至10,000円之間。 （2019年9月資訊）
三角豆沙包（三角どらやき）
岩瀬地區著名嘅和菓子——「三角豆沙包」，發源於昭和8年創業嘅和菓子老店「大塚屋」。三角形嘅獨特形狀係以日本海嘅海浪為設計意念。外皮雖薄但好有彈性，內餡係滿滿嘅紅豆蓉。
另外，「三角豆沙包」唔只喺大塚屋有賣，面向岩瀨運河嘅複合式設施「岩瀨Kanaru會館（岩瀬カナル会館）」都可以買得到。1個約200円，非常經濟實惠。（2019年9月資訊）
Comments