喺新潟當地餐廳可以食到使用當地產稻米、海鮮、蔬果等各種新潟特產作為食材嘅料理。從古時流傳至今嘅鄉土料理、點心、到無適外表定味道都有特色嘅當地美食一應俱全，種類豐富多元。以下就同大家介紹5款新潟嘅當地美食啦。
輪箱飯（わっぱ飯）
「輪箱飯」（わっぱ飯）係新潟縣嘅鄉土料理之一，由新潟市嘅日本料理店「輪箱飯 田舍家（わっぱ飯 田舎家）」所發明。喺「Wappa（わっぱ）」中放入以淡淡嘅日式高湯炊煮嘅米飯，上頭鋪滿新潟當造時令食材一齊蒸熟。所謂嘅「Wappa（わっぱ）」就係將薄薄嘅杉木片彎曲製成圓筒形嘅便當盒，裡頭所放嘅食材因店而異，但共通點都係將新潟當造新鮮食材擺滿滿，例如有三文魚、蟹、三文魚籽等等。清淡嘅杉木香氣襯托之下，多種海鮮充滿豐富嘅鮮甜味喺口中蔓延，係種優雅嘅味道。
輪箱飯嘅餐廳喺新潟縣各地都有，當中最具知名度嘅創始店「輪箱飯 田舍家（わっぱ飯 田舎家）」，另外仲有「明神蕎麥 KIRIYA 新潟店」，價位均落喺1,000〜2,000円左右。（截至2019年9月資訊）
片木盒蕎麥麵（へぎそば）
「片木盒蕎麥麵（へぎそば）」源自紡織業風光一時嘅新潟縣十日町、小千谷，即係喺蕎麥麵中添加一種名為「鹿角菜（フノリ）」嘅海藻，並將麵條分成一口份量，盛裝喺一種叫「Hegi（ヘギ）」嘅木製容器中。麵條口感滑溜順口，又有咬口。
片木盒蕎麥麵嘅靈感來自製造織物時會添加一種「鹿角菜（フノリ）」而製成嘅粉漿。將呢種喺十日町、小千谷日常隨手可見嘅材料「鹿角菜」靈活運用喺蕎麥麵而製成嘅食品。
新潟縣到處都可以食到「片木盒蕎麥麵」，其中以十日町「小嶋屋總本店（小嶋屋総本店）」同小千谷嘅「小千谷名物 片木蕎麥麵 WATAYA（小千谷名物 へぎそば わたや）」較為出名。
片木盒蕎麥麵單點一份約800円。搭配其他料理套餐，價位約1,000～2,000円。（截至2019年9月資訊）
炸半雞 （半身揚げ）
「炸半雞（半身揚げ）」係將半隻雞用咖哩粉同鹽調味後，成隻豪爽地拎去油炸，係新潟代表性嘅當地美食。呢道料理嘅起源係新潟市嘅「雞肉專賣店 Sekitori（鳥専門店 せきとり）」前一代店主喺路邊擺檔時發明。酥脆嘅外皮、鮮嫩多汁嘅雞肉、再加上辛辣嘅咖哩香氣，一上枱就散發一股令人難以抗拒嘅惹味！另外，由於係炸半邊雞，所以可以食到雞髀肉、雞胸肉、雞柳等各部份，一次過食到唔同口感都係呢道料理嘅魅力之一。而且價錢實惠、份量夠，就算攤凍咗咖哩味仲係好出色，所以大受好評，傳遍新潟縣各地。
想試炸半雞，可以到「雞肉料理專賣店 Sekitori（鳥専門店 せきとり）」、「雛雞金子 今町店（ひな鳥金子 今町店）」等等新潟縣內大多數餐廳都可以食到。 一份價格約600円。（截至2019年9月資訊）
新潟濃厚味噌拉麵 （新潟濃厚味噌ラーメン）
「新潟濃厚味噌拉麵（新潟濃厚味噌ラーメン）」起源於新潟市嘅拉麵店「KOMADORI（こまどり）」。湯頭使用多種味噌調和，突顯出味噌風味又齒頰留香，再搭配有咬口嘅粗麵，令呢拉麵更加美味。
另外，為咗令客人能夠調整湯頭濃度，店家會提供味道較為清淡嘅高湯「稀釋用高湯（割りスープ）」。呢個風格喺一般拉麵店頗為少見，因第一代店主去送外賣時，固定會隨身攜帶裝有稀釋用高湯嘅咖啡杯，因而演變成店內都咁做嘅傳統。
新潟濃厚味噌拉麵可以喺新潟市為主嘅拉麵店品嘗得到。當中較為出名嘅店有「KOMADORI（こまどり）」同「東橫」等，根據食店不同，拉麵嘅口味同配料各有特色。價格約700〜1,000円。（截至2019年9月資訊）
竹葉糰子（笹だんご）
「竹葉糰子（笹だんご）」係一種和菓子，將加入艾草嘅糯米糰用竹葉包覆蒸熟。清爽嘅竹葉香氣、加上艾草特有嘅氣味，搭配上糯米糰中紅豆餡細緻高雅嘅甜味，係一個完美嘅配搭。
順帶一提，竹葉糰子利用竹葉擁有防腐同抗菌嘅效果，適合長期保存不變質，自古以來就有人食用，已有悠久嘅歷史。
另外，竹葉糰子可在新潟縣內眾多和菓子店買到。當中較為出名嘅店有老店「田中屋本店」同「童心菓匠 丸屋本店」。一個竹葉糰子大約200円，相當便宜。另外，仲有5個裝或10個裝嘅手信伴手禮盒裝添。（截至2019年9月資訊）
Comments