高野山：擁有約1200年歷史嘅日本佛教聖地

位於和歌山縣高野町嘅高野山，係日本佛教真言宗嘅開山始祖「弘法大師空海」所開創嘅日本佛教聖地。高野山有好多寺廟聚集，到處都充滿咗日本感覺嘅風景。另外，喺被稱為「宿坊」嘅寺廟入面住宿，亦係一個人氣熱門嘅旅遊體驗。

高野山小檔案

高野山係海拔1,000米嘅山群總稱。被呢啲山群環繞嘅地方，東西約長6公里、南北約3公里、喺海拔800米嘅盆地入面，有117座寺院，仲有傳統紀念品店，用餐地方等，好多可以感受到歷史嘅建築物。（截至2019年9月資訊）

另外，高野山真言宗嘅總本山入面嘅「金剛峰寺」、「慈尊院」、「丹生官省符神社」、「丹生都比賣神社」被登錄為世界遺產。高野山仲獲得日本版《米芝連綠色指南》三粒星。

高野山海拔好高，平均氣溫10.9°C，全年氣候涼爽。冬季寒冷，溫度會低過零度。如果想前往高野山觀光，建議揀天氣比較好嘅春天至秋天期間。每個季節都有唔同美景可以欣賞，例如春天嘅櫻花、夏天嘅深綠同秋天嘅紅葉。

雖然冬天非常嚴寒，但係就可以欣賞到積雪後嘅參道同寺廟，係非常夢幻嘅美景。

高野山有好多景點，例如寺廟、歷史建築同自然風景。以下列出一啲特別推薦嘅景點同埋推介遊玩方式。

高野山有好多歷史悠久嘅寺廟，例如，「奥之院」參道兩旁有超過20萬座歷代大名嘅墓石同慰靈碑，亦有弘法大師於816年建造嘅「金剛峰寺」等。

其中推介必到嘅係「金剛峰寺」。首先，令人感到厚重嘅主殿建築，係非常美嘅傑作。內部仲可以睇到，紙拉門上繪有松鶴嘅優美「襖繪」(屏障畫)。

另外，寺院境內仲有好多值得睇嘅景點，包括日本國內規模最大嘅石庭、具有日本哀美嘅枯山水砂石嘅「蟠龍庭」，仲有傳統茶室、鐘樓等。

高野山係熱門行山遠足嘅地方，一共有7條朝聖嘅山路，由各地通往高野山。例如，「高野山町石道」約22公里，道路上有180根石柱為地標。沿途有神社寺廟、歷史古蹟同觀景台。

另外，「女人道」係連接高野山7個入口、沿著周圍山脈嘅山脊而建，大概6.9公里嘅步道。喺高野山，一直到1872年解除女性禁令之前，各個登山口都設置咗「女人堂」，要求女信徒到此止步。目前只剩下不動坂口嘅「女人堂」有保留落嚟。

高野山有好多出名嘅美食，例如燒麻糬同芝麻豆腐。特別推薦「精進料理」 (即素食料理)。

「精進料理」係基於佛教戒律，唔使用任何海鮮或肉類，而以穀物同蔬菜等植物食材為中心。使用當季食材、強調色彩平衡，用細碟仔嚟裝各式各樣嘅菜式。

「精進料理」除咗喺日式餐廳可以食，如果提前預約，亦可以喺寺廟中嘅宿坊食到。價格約為1,000〜6,000日圓。（截至2019年9月資訊）

高野山上共有117座寺廟。而117座寺廟當中，有52座寺廟被稱為「宿坊」，附設畀參拜民眾同信徒住宿嘅設施。

擁有傳統風格嘅宿坊「無量光院」、擁有幽美日式庭園嘅「赤松院」、擁有高野山唯一天然溫泉嘅「福智院」等。

另外，喺唔同嘅宿坊亦會有唔同特別體驗。例如，可以參加每日朝早僧侶喺御本尊面前讀經同禮拜嘅「朝勤」，又或者體驗真言宗冥想法嘅「阿字觀」等。

住宿費用每晚約1萬至2萬日圓。（截至2019年9月資訊）

由大阪・京都出發去高野山，可以由日本主要國際機場之一「關西國際機場」前往高野山入口—高野山纜車「高野山站」。

首先，由關西國際機場搭乘南海電鐵「特急Rapi:t號」，車程約30分鐘，就可抵達南海電鐵「天下茶屋站」。於南海電鐵「天下茶屋站」轉乘「特急Koya(こうや)號」，車程80分鐘可抵達高野山纜車乘車處「極樂橋站」。再轉乘高野山纜車，約5分鐘可抵達「高野山站」。

名稱：高野山（高野山纜車高野山站）
地址：〒648-0211 和歌山縣伊都郡高野町高野山國有林
Access：關西國際機場→[南海電鐵特急Rapi:t號]約30分鐘→天下茶屋站→[南海電鐵特急Koya(こうや)號]約80分→極樂橋站→[高野山纜車]約5分鐘→高野山站
Wi-Fi：有（Koyasan Free Wi-Fi, WAKAYAMA FREE Wi-Fi）
語言：中文、英文、法文
信用卡：可以使用VISA, MasterCard, JCB, AMERICAN EXPRESS, Diners Club International（依設施而異）