帶大型行李上JR，無預約要多付錢！
咩話！下年去日本旅行嘅時候，攜帶大型行李嘅話要事先預約？日本政府近期積極咁加強安全措施。而日本JR鐵路公司亦喺2019年8月29日發表，明年5月起將會有攜帶行李預約嘅新制度，如果無事先預約，可能要俾多啲錢！所以如果正在計劃2020年去日本旅遊嘅朋友仔要留意啦～
特大型行李預約制
為咗加強安全措施，日本JR東海、JR西日本、JR九州鐵道公司宣布，預計將於2020年5月開始實施「特大型行李預約制」，亦即係話搭東海道、山陽、九州新幹線時，如果攜帶長闊高3邊總計超過160厘米嘅特大型行李時，必須事先透過網路、售票機或售票窗口預約，如果無先預約就將行李拎上車嘅話，就要支付1000日圓嘅手續費（大家唔好花咗冤枉錢啊！）
唔可以帶總邊長超過250厘米嘅行李上車
唔單止咁樣，呢3條新幹線而家已經實施咗，長闊高3邊總和超過250厘米嘅行李唔可以帶上車，預計之後亦會維持呢個政策。雖然可能會有人覺得好麻煩，但呢種預約制度亦都確保咗會有位放行李，預計將放喺車廂後面有附鎖嘅專用區，諗深一層其實係造福遊客！另外，如果帶型行李，但都想放喺最後面嘅行李置放處時，亦係要事先預約。
日本假期調動
除咗有關行李嘅新規定之外，唔少去日本嘅遊客為咗避開人潮，會留意日本嘅假期，而2020年亦因應東京奧運，同埋新天皇即位等，連假期都有一啲小變動。
例如：東京奧運開幕禮將於日本2020年7月24日舉行，而閉幕禮則於8月9日舉行，開幕禮前一日、當日，以及閉幕禮當日、隔日均為假期，所以就將「海之日」、「運動之日」及「山之日」等等配合東京奧運搬咗日子。
2020年日本假期表
計劃下年要去日本旅遊嘅朋友們，要留意多啲新制度，同埋避開日本假期，做好功課先出發，咁先玩得扺嘛～
圖片來源：pixabay
© 妞新聞 www.niusnews.com
Comments