唔食得架！醬料＆料理造型文具！好似寫字都會聞到食物味咁~

日本文具嘅創意真係可以話世界公認。最近日本設計品牌Geodesign推出咗幾款「醬料造型」嘅螢光筆，唔但止外型好逼真，商品擺賣嘅時候，仲要專登佈置成真係嘢食咁嘅樣，以假亂真嘅程度令網友們都驚呼：「太似啦！」今次小編為大家整理咗Geodesign嘅造型文具，大家小心唔好撈亂，文具唔食得架！

醬料螢光筆

首先推出嘅就係呢款用咗三種唔同醬料為外型嘅三色螢光筆。分咗紅色嘅辣醬味，黃色嘅黃芥末味，同埋充滿南國風情嘅藍夏威夷味！而且仲可以配埋壽司成日見到嘅拌碟藍，其實係日本考生好常用嚟背書背生子嘅「遮色片」！用辣醬口味嘅螢光筆間起重點，之後再用遮色片擋住，重點地方就會反黑，方便大家可以背內容！

再嚟仲有呢款造型超逼真嘅「筷子筆」！雖然真係好似即用筷子，但千祈唔好真係拆開佢呀！將普通嘅原子筆化身成餐桌上不可或缺嘅餐具，雖然其實一開筷子套就會穿崩，但呢個創意文具亦增添咗好多樂趣！

再來係呢款放喺納豆盒入面嘅萬字夾！作為日本傳統食物，納豆喺日本人心目中有極重要地位，Geodesign亦都無放過呢個機會！唔好以為佢只係普通嘅萬字夾，隨包裝附送嘅「納豆醬料」其實係磁石，只要拎起嚟，所有萬字夾都會吸上去，完美重現納豆黏痴痴嘅情景！呢個咁有趣嘅設計，係咪好令人佩服呢～

跟住要介紹嘅係偽裝（？）成玉子燒同壽司卷嘅毛巾！雖然呢種設計已經唔深見，但亦都好少做到咁高像真。不論入面嘅商品，等係外面嘅包裝都一絲不拘，栩栩如生，精緻程度令人睇到會以為真係店入面嘅嘢食。（包裝貼上面仲要寫住「不要冷藏」，太可愛啦XD）

最後係呢款粉色好可愛嘅「日式魚蛋MEMO紙」！！張MEMO紙做成日式魚蛋嘅造型，一片一片撕落嚟嘅時候，就會覺得自己好似將魚蛋卷前片咁，好治癒！連下面墊住嘅木板都一齊放埋入去影造型照，呢啲小心思真係令人會心微笑。（當然要加埋筷子筆一齊享用！）

日本品牌成日都推出有趣造型嘅文具雜貨，令文具迷都忍唔住大讚佢地嘅創意，同時獻上銀包！唔知道腦洞大開嘅日本品牌，之後仲會研發出乜嘢有趣商品呢，等我地拭目以待吧！