位於沖繩縣那霸市嘅「沖繩縣立博物館・美術館」，係一間將博物館與美術館合併設立、相當罕見嘅設施。透過各式唔同主題嘅展覽，遊客可以喺館內學習並鑑賞沖繩嘅自然、歷史、文化與藝術。
關於那覇沖繩縣立博物館・美術館
「沖繩縣立博物館・美術館」嘅獨特造型設計，靈感其實係來自沖繩城堡，當地人都會稱設施為「Okimyu」。博物館擁有沖繩縣內最多收藏展品數量，截至2018年，博物館共有10萬件、而美術館則有約5,100件收藏。各個展示室會透過定期更換展示內容，同時亦加添新增內容，依序向大眾介紹館內嘅收藏品。
沖繩縣立博物館・美術館特色
「沖繩縣立博物館・美術館」唔單只設有室內展示區，遊客仲可以到室外鑑賞沖繩傳統民家、高倉(高架式倉庫)、雕刻作品等，內內外外都相當有睇頭。
除咗展覽區，館內亦設有café、縣民藝廊、工作室等空間。其中「資訊中心」就歡迎遊客閱覽並觀看與沖繩相關嘅資料及映像；而「博物館商店」內則展出咗周邊商品及傳統工藝品等，記得睇埋先好走人喔！
以下就要為大家介紹主要景點「博物館・美術館區」內嘅展覽特色。
博物館區：了解沖繩自然・歷史・文化
喺博物館區內，您可以參觀到介紹沖繩嘅常設展覽，以及與日本國內外自然史或歷史等有趣主題嘅特別展・企劃展等。
博物館常設展覽內容非常豐富。首先，喺「綜合展示」區內您可以了解到琉球群島起源，認識從史前時代到現代嘅沖繩自然、歷史及文化；而「部門展示」區則分為考古學、自然、美術工藝、歷史及民俗共5個主題，您可以欣賞到眾多珍貴展品，例如自然標本、考古資料、美術工藝品、歷史及民俗資料等。
另外，請您亦唔好錯過「交流體驗室」，事關您可以喺內裡實際觸摸到與博物館常設展覽內容有關嘅沖繩玩具及樂器！現場提供簡體中文、繁體中文、英文、韓文等多國語言專用APP，方便遊客查看解說及使用方式，記住要多多試用喇！
美術館區：以展覽沖繩近現代美術作品為主
嚟到美術館區收藏展藝廊及企劃展藝廊，您可以欣賞到各式藝術品。特別係收藏展藝廊嘅展品內容除咗以沖繩及與沖繩相關嘅藝術家作品為中心，同場仲有日本及亞洲其他國家嘅近現代藝術品。展品內容因主題而異，種類相當多元化，從繪畫、雕刻、版畫到攝影都包羅萬有。
參加超值活動，拎走限量贈品！
前往參觀「沖繩縣立博物館・美術館」時，如果出示「沖繩美麗海水族館」或「首里城公園」嘅票尾，您即可以參加扭蛋拎走限量商品（一張票尾可以玩一次扭蛋）！獎品種類相當豐富，有繪製沖繩地圖嘅帆布包、首里城明信片、水族館貼紙和筆記本等等。
順帶一提，「沖繩美麗海水族館」或「首里城公園」票尾亦可換取博物館常設展及美術館收藏展門票優惠，因此請記得將票票保存好喇！
沖繩縣立博物館・美術館營業時間與票價
「沖繩縣立博物館・美術館」營業時間因開館日而異，週二、週三、週四、週日為9點到18點；週五及週六為9點到20點，每日最後入場時間皆為閉館前30分鐘。
逢週一為休館日，如遇公眾假期或正值每年6月23日時則照常開館，翌日休館。此外，維修期間、日本新年期間亦會休館。
門票方面，博物館常設展成人票價為530日圓、美術館常設展成人票價為400日圓。企劃展、特展則收取特別票價。（資訊截至2019年8月）
前往沖繩縣立博物館・美術館嘅交通方式
如欲前往沖繩縣立博物館・美術館，您可以從「那霸機場站」乘搭沖繩都市單軌電車「Yui Rail」或巴士。
搭乘「Yui Rail」的話，您需要先前往「OMOROMACHI站」（車程約19分鐘），落車後徒步約10分鐘即可抵達沖繩縣立博物館・美術館。
搭乘巴士的話，您需要先前往「OMOROMACHI三丁目」巴士站（車程約30分鐘），落車後徒步約5分鐘即可抵達沖繩縣立博物館・美術館。
景點資訊
- 名稱：沖繩縣立博物館・美術館
- 地址：〒900-0006 沖繩縣那覇市OMOROMACHI 3-1-1
- 交通方式：那覇機場站→[沖繩都市單軌電車 Yui Rail]約19分鐘→OMOROMACHI站...徒步約10分鐘、那覇機場站→[琉球巴士]約30分鐘→OMOROMACHI3丁目巴士站...徒步約5分鐘
- Wi-Fi：無
- 語言：中文、英文、韓文（館内導覽手冊）；中文、英文、韓文、西班牙文（語音導覽）
- 購票方式：現場售票處
- 信用卡：可以使用Visa、Master Card（僅限博物館商店）
Comments