喺日本愛媛縣嘅松山市，可以食到瀨戶內海捕獲嘅海鮮所製作嘅料理、鮮甜美味嘅水果，仲有傳統和菓子等各種美食。以下為大家介紹去到松山市嘅餐廳，推薦必嗌嘅5種美食！
１）松山醋（松山壽司）
「松山醋」壽司飯係自古以來有喺喜興之事或有來賓時，用嚟招待客人嘅一種鄉土料理，所以亦被稱為「Moburi飯（もぶり飯）」。
松山醋壽司飯即係將瀨戶內海產小魚熬煮出嘅日式高湯同甜醋加入飯中攪拌，再加入切成薄片嘅星鰻同當造季蔬菜再攪混。之後，再放上雞蛋絲同當造小魚就大功告成！呢首料理嘅外觀色彩鮮艷，就咁睇個賣相都好吸引人。味道方面，可以品嚐到適度甜味嘅醋飯加上各種美味食材嘅完美融合。
提供松山醋壽司飯嘅店散佈喺市區內，其中以「日本料理 壽司丸 本店」、溫泉旅館「道後溫泉FUNAYA」內嘅「餐廳 葵苔」等特別出名。單嗌約1,000円，套餐約1,500〜2,500円。（截至2019年8月資訊）
２）北條鯛魚飯
「北條鯛魚飯」係位於松山市北部，北條地方嘅特產，將整條鯛魚、米飯同昆布一齊蒸煮嘅料理。除咗鯛魚肉，滲入鯛魚味同昆布味嘅飯都好好味。北條鯛魚飯之所以作為當地美食而咁出名，係因為有古時皇后喺北條地區食咗鯛魚飯後非常高興嘅傳說，所以鯛魚飯從古時一直流傳到而家。
鯛魚飯其實有兩種：將松山市嘅鯛魚一整條同飯一齊蒸煮嘅係「北條鯛魚飯」、將宇和島市嘅鯛魚生片放喺飯上嘅係「宇和島鯛魚飯」。而喺松山市，有餐廳仲會同時提供呢兩個地域嘅鯛魚飯添！
北條鯛魚飯可以喺北條地區或松山市中心嘅餐廳食到，出名嘅店有「和食處 秀」、「松山鯛魚飯 秋嘉」。單嗌價錢唔貴，約1,000円樓下就食到；套餐嘅話約1,300〜2,300円。（截至2019年8月資訊）
３）五色素麵
五色素麵即係黃、綠、啡、紅、白5個顏色嘅素麵。靈感來自五色紗線，係18世紀以來開始生產、歷史悠久嘅松山著名特產。除咗白麵條，仲利用雞蛋、抹茶、蕎麥粉同梅子肉等天然食材嚟為素麵上色，變成5隻顏色嘅麵。
想食五色素麵，推介去「鄉土料理 五志喜」，仲有僅於7月至8月營業嘅「上林水之元 流水素麵」餐廳。流水素麵約600円，搭配其他料理嘅套餐約1,300〜2,000円。（截至2019年8月資訊）
４）柑橘製品
愛媛縣擁有日本數一數二的柑橘產量。因為陽光嘅照射、溫暖嘅氣候、受海風吹拂服而富含礦物質嘅土壤等適合柑橘生長條件，因而喺度栽培眾多唔同品種嘅柑橘。而喺松山中、漂浮喺海上嘅中島上種植咗好多柑橘，作為「柑橘之島」非常出名。
另外，當地仲有好多各式各樣嘅柑橘加工製品，例如有罐頭柑橘、果醬等基本商品，仲有飲得嘅啫喱型柑橘「Chu Chu啫喱」等獨製商品。
喺「noma-noma」、「愛媛果實俱樂部 柑橘之木」等店，都有賣新鮮柑橘果汁同柑橘甜品，唔使500円就可以試得到。又可以買啲柑橘製品嚟手信吖。（截至2019年8月資訊）
５）Taruto（果餡餅）
喺松山市出名嘅和菓子有「Taruto（果餡餅）」，係將柚子味嘅紅豆泥作內餡，再捲上綿密柔軟嘅海綿蛋糕做成蛋糕捲形狀和菓子。柚子嘅清新味道，加上甜度恰到好處嘅紅豆泥同柔軟嘅海綿蛋糕，簡直係完美嘅搭配呀！另外，松山嘅「Taruto（果餡餅）」亦被稱為「の字型嘅Taruto」，因為蛋糕包餡捲起嚟嘅形狀睇落就好似日文「の」字咁。
「Taruto（果餡餅）」係松山城藩主松平定行喺17世紀從葡萄牙人學做洋菓子（西洋甜點）之後，考慮將日式風味嘅內餡加落捲蛋糕，而設計成現時嘅糕點。
想買「Taruto（果餡餅）」，可以去「一六本舗」、「六時屋」等和菓子店，一個售價約為120円，價格實惠。另外，「一六本舗」經營嘅餐廳「一六茶寮」內，仲可以試到「一六Taruto」嘅銘菓，甚至有「一六Taruto天婦羅」，跟嘢飲嘅和菓子套餐大約600円內。（截至2019年8月資訊）
Comments