愛媛縣大洲市：發展繁榮嘅大洲城城下町

大洲市位於愛媛縣西部並以大洲城為中心，市內保留著多個極具歷史風情嘅老街區。除咗流經市中心嘅肱川、環山大海等豐富自然景觀之外，大洲市亦以「肱川拉麵」、「大洲煮里芋」等多款名物美食見稱。

關於大洲

大洲嘅觀光地區可分為沿著肱川流域嘅河邊、肱川、大洲、長濱共四個地區。上流域嘅河邊及肱川地區為山林地帶；中流域大洲地區係以大洲城為中心嘅市中心街區；下流域長濱地區則係面向大海嘅漁港。

另外，肱川亦有「鵜飼」之稱。當地漁業自古以來會馴養鵜（鸕鶿）作捕魚之用，因毎年夏天都會喺肱川舉行鸕鶿捕魚而得名。

大洲每個地區都各有歷史相關景點及風景名勝。以下就要為大家介紹各地區嘅推薦景點。

河邊地區內共有八座日本國內相當罕見嘅有蓋木造橋，遊客亦可到區內博物館等觀光景點了解河邊地區歷史。

由傳統有蓋木造橋與四周樹木及溪流交織而成嘅風景畫係河邊地區必睇景點。另外，您亦可到「龍神橋」觀賞前方落差達15米嘅「三杯谷瀑布」絕景。

遊客可於肱川地區內欣賞到四季花卉，其中又以春天花卉種類特別多，例如「鹿野川」有大約3,000棵櫻花綻放、「丸山公園」則有大約3,000朵石楠花以及其他多元化品種。

此外，區內亦以風為主題嘅「風之博物館」、展出浮世繪師「喜多川歌麿」雕刻木板嘅「歌麿館」等文化設施。

大洲地區內保留著大洲城及城下町原始風貌，最適合於街上體驗懷舊散策。大洲城內嘅四樓四層構造復原重建天守散發出雄偉氣勢、令人印象深刻；而城內四棟監視及防御用嘅建築物，則係日本國家重要文化財。

大洲城周邊地區林立嘅武家宅邸及商家等歷史建築物亦相當有參觀價值㗎！

肱川地區內有多個歷史悠久寺廟、傳統宅邸建築及公園等景點。

其中又以長濱大橋為必睇景點之一。被稱為「赤橋」嘅赤紅色大橋上設有行人通道，每逢星期六、星期日、或公眾假期下晝1點都會舉行大橋開合儀式。夏天時橋樑更會舉行夜間點燈活動，係只有夏季先有機會睇得嘅夢幻風景！（資訊截至2019年8月）

大洲流傳著多款地道料理，當中包括以里芋(日本芋頭)、蒟蒻、雞肉等熬煮而成嘅鄉土料理「大洲煮里芋」，以及各種使用栗子或淡水魚等當地特產製作而成嘅料理。肱川町地道拉麵「肱川拉麵」亦係一大推薦，運用肱川清流製成嘅幼麵配上鮮味清爽嘅湯底，自問係拉麵迷嘅您一定要試！

各地區內亦遍佈多間餐廳，尤其集中於大洲地區市中心。

大洲唔同地區嘅住宿設施都各具特色。

河邊地區住宿設施多建於溪流沿岸，當中部分為由廢棄校舎改建而成、重現出日本傳統建築哲學嘅住宿設施。

肱川地區內有好幾家環抱綠色大自然嘅日式住宿設施及溫泉旅館。

大洲地區住宿設施主要分佈於市中心，價格大約每晚5,000日圓〜10,000日圓之間，當中大部分為以住宿為主嘅經濟型酒店，亦有部分為旅館。

長濱地區沿岸林立著好幾家民宿，部分以優質料理聞名、部分則以悠久歷史見稱。（資訊截至2019年8月）

一般遊客多以「JR伊予大洲站」作為大洲觀光據點。由愛媛中心地「松山市」出發，於「JR松山站」乘搭特急電車約35分鐘即可抵達「JR伊予大洲站」。車站旅遊詢問處駐有識講英文嘅工作人員，同場亦設有具備傳譯及翻譯功能嘅平板電腦，搜集旅遊資訊夠晒方便！

由於「JR伊予大洲站」距離各觀光景點都有一段距離，因此建議使用鐵道、市内循環巴士「Gururi n ōzu (ぐるりんおおず)」、伊予鐵道巴士等交通工具前往各景點。