「琉球村」距離沖繩那霸市約1小時車程。「琉球」即沖繩舊稱，而「琉球村」就係一座重現出古老沖繩村落嘅主題公園，近年越嚟越多遊客都會將佢放入必玩行程！嚟到園區，您除咗可以體驗陶藝、織品等沖繩文化，仲可以欣賞舞蹈、EISA太鼓舞 (エイサー)等沖繩傳統藝能文化。以下，本文就要為大家介紹琉球村特色及推薦玩法！
琉球村特色之一：體驗內容超級豐富！必試傳統服飾打卡影相！
琉球村設有織品製作、炸冬甩波（沙翁）等共25項沖繩文化體驗，其中最推薦嘅，就有正宗「琉球傳統服飾租借服務」。遊客可以穿著琉球王朝時代、只有皇室貴族先有資格著嘅華麗傳統服飾影相打卡留念。20分鐘換衫時間加上60分鐘散步時間收費4,000日圓（已包含攝影費用；最終接待時間為下午4點、需事先於官網預約），您可以選擇自己喜歡嘅服飾圖案，工作人員亦會幫您梳出最正宗嘅髮型㗎！
另外，遊客亦可到「三味線教室」實際體驗彈奏三味線。老師會教您簡單曲目，三味線真實音色絕對能夠療癒您心！（體驗所需時間約30分鐘、最終接待時間為下午4點、費用1,000日圓、需事先於官網預約）。
同場您仲可以體驗埋製作炸冬甩波「沙翁 (サーターアンダギー) ,500日圓（※）」、「南國琉球甜品巴菲 2,000日圓（※）」等各式各樣沖繩嘅代表性甜品點心𠻹。
（※）製作體驗並非每日舉行；如欲參加需事先於官網預約。
琉球村特色之二：最原汁原味！壯觀巡遊表演祭典與眾同樂
琉球村第二個必睇特色，就係每日舉行嘅傳統藝能表演。其中最吸睛嘅「道JUNE (道ジュネー)」透過巡遊隊伍將琉球舞蹈、琉球古武術、民謠、EISA太鼓舞等一一呈現觀眾眼前，到最後壓軸時更會上演連串唱歌跳舞表演，將氣氛帶到最高潮！巡遊表演每日分別於早上10點及下午4點舉行，萬勿錯過！
沖繩傳統藝能之一嘅「EISA太鼓舞 (エイサー)」亦係一大推薦。「EISA」即舊曆盂蘭盆節舉行嘅沖繩傳統祭典，舞者會喺太鼓及三味線伴奏下隨哨笛起舞，強而有力嘅鼓聲於觀眾心坎迴盪，令人印象深刻。表演每日設有早上9點20分～、中午12點～、及下午2點共三場，請各位一定要嚟欣賞如此充滿沖繩特色嘅傳統藝能表演啊！
琉球村特色之三：參觀古民家建築、爆買手信、品嚐美食
琉球村內有多幢從沖繩各地遷移得來嘅珍貴古民家建築，村內重現出昔日沖繩樣貌。園區內共有10棟古民家，其中8棟被指定為日本國家有形文化財，部分建築更已有百年以上歷史。
位於入口處旁邊嘅「沖繩站Chanpuru (沖縄の駅ちゃんぷるー)」內設有提供沖繩料理、沖繩炒麵、豬肋排麵嘅餐廳「Kijimuna食堂 (きじむあな食堂)」，同場亦有出售沖繩炒麵、海葡萄、泡盛等沖繩獨有特產。設施採用圓頂型密封設計，就算落雨天都唔使驚淋濕！
前往琉球村嘅交通方式
車
那覇機場→國道58號線向北約30公里
巴士
那覇→［沖繩巴士・琉球巴士］開往名護方向，約1小時→琉球村前巴士站…徒步即達
相關資訊
- 名稱：琉球村
- 地址：〒904-0416 沖繩縣國頭郡恩納村字山田1130
- 開放時間：早上9時～下午6時（最終入場為下午5時30分）、2019年10月後，開放時間為早上9時～下午5時30分（最終入場為下午5時）
- 休息日：無休
- Wi-Fi：圓頂設施內、體驗區內才有免費Wi-Fi
- 語言：設有日文、繁體中文、簡體中文、英文、韓文導覽手冊
- 票價：1200日圓（2019年10月1日以後為1300日圓）
- 信用卡：可以使用
Comments