座間味島酒店推薦：將慶良間藍絕景盡收眼底！

如果您正物色緊座間味島嘅酒店，編輯部會建議您選擇一個方便前往海邊嘅地方。座間味島四周被清澈蔚藍海水環繞，海水顏色有「慶良間藍(Kerama Blue)」嘅美譽。遊客可以喺島上享受沙灘海水浴或近海潛水等各種海上活動。今次小編就會為大家介紹座間味島上嘅住宿設施類型、地點，以及特別推薦嘅酒店！

座間味島酒店及旅館

座間味島上除咗民宿，仲有多間酒店、公寓式酒店等各類型住宿，而大部分住宿設施都集中於離島玄關口「座間味港」嘅周邊。

另外阿真地區內亦有幾間公寓式酒店及民宿，阿佐地區沿海則有海景酒店及民宿林立。

上述設施住宿費用每晚約為5,000日圓〜2萬日圓。（資訊截止2019年8月）

「白濱島度假酒店」係座間味港附近唯一一間酒店。住客可以享受到公寓式酒店般嘅氣氛，整體環境非常舒適放鬆。酒店共設有8間和室、25間西式客房，西式客房數量相當充足。

您可以於早餐及晚餐時段內、喺酒店餐廳享用日式料理。尤其係晚餐，您更有機會品嚐到使用新鮮魚類及當地出產蔬菜製成嘅沖繩料理。

酒店三樓設有居酒屋，營業時間為晚上6點到11點。店內提供各式沖繩料理，例如採用豆腐及當地苦瓜炒成嘅「沖繩炒苦瓜」、將海藻「海蘊 (もずく)」加入豉油及砂糖後浸泡於醋內製成嘅「醋拌海蘊」等。種種料理都同沖繩「泡盛」酒非常之夾㗎！

「白濱島度假酒店」距離座間味港最近嘅村莊僅需約3分鐘車程，從港口乘搭酒店接駁巴士即可抵達。村內有超市及餐廳，從酒店徒步即可輕鬆購物或用餐。

另外，酒店前往島上海灘嘅交通亦非常方便。酒店距離座間味島主要海灘「古座間味海灘」僅約20分鐘路程。

「白濱島度假酒店」提供無人島遊覽或潛水等各種海上活動，當中又以搭船遊覽位於座間味島與阿嘉島之間嘅無人島「嘉比島」為一大重點觀光活動。「嘉比島」係一座擁有極高透明度蔚藍大海及白色沙灘嘅島嶼，喺遊覽過程中，您可以順便體驗浮潛、乘搭玻璃船欣賞海中世界等樂趣，惟玻璃船需另外收費。