識名園係位於沖繩縣那霸市嘅皇家花園，亦係縣內觀光價值極高嘅名勝景點。庭園於2000年作為「琉球王國城跡及相關遺產群」被列入聯合國世界遺產，遊客喺園內可以欣賞到櫻花及梅花等季節性花卉，又或家屋、石門等建築物。
識名園小檔案
建於1799年嘅識名園屬於琉球王室庭園，主要被用作國王別墅及接待外國使節等活動。雖然園內大多數建築物都喺1945年沖繩戰爭中被摧毀，但從1970年代後期到1990年代期間得以恢復重建，成為現時樣貌。
此外，識名園亦係一座融合咗中式、日式以及琉球風格嘅「廻遊式庭園」。廻遊式即一種庭園建築風格，旨在為方便入場人士鑑賞池塘周圍風景。識名園池塘周邊建築物及植物林立，遊客可以輕鬆欣賞到日本四季變化嘅景觀。
識名園必睇特色
識名園以自然景觀聞名，例如圍繞於「心字池」周邊嘅建築物及植物就係一大特色。以下將為大家介紹園內部分必睇景點。
從正門到「心字池」嘅美景
穿過識名園正門後，您會嚟到一條使用珊瑚及貝殼為原料、以「琉球石灰岩」鋪成嘅石造步道。步道周圍種有櫻花及梅花，亦有琉球松樹及水茄苳等沖繩特有植物。
傳統建築風格「御殿」
心字池池畔嘅「御殿」係一棟傳統房屋，曾經被用作迎賓館使用。其特徵為琉球特有嘅紅瓦屋頂以及與周遭綠色植物呈現出嘅迷人視覺對比。古老建築佔地面積約160坪，內部為廚房及茶室等共15間客房，遊客更可以走入內部參觀。記住一定要把握近距離欣賞沖繩獨特建築風格嘅難得機會喇！
於識名園水池源源不絕湧出嘅「育德泉」
「育德泉」係流經識名園嘅水源之一，直至現時仍有湧水不斷湧出，非常珍貴。呢到係一種名叫「Shimachisujinori」、被列入為天然紀念物嘅藻類嘅發源地，而育德泉本身亦被指定為日本國家天然紀念物之一。
可以眺望那霸市街景嘅「觀耕台」
「觀耕台」係識名園內視野最好嘅展望台，遊客可以喺到眺望沖繩本島南部街景及田園景觀。觀景台附近設有香蕉園，您亦可以順道參觀梅或香蕉嘅栽種過程。
識名園開放時間及票價
識名園營業時間因各季節而異。4～9月為上午9時～下午6時、10～3月為上午9時～下午5時30分，最後入場時間則為營業結束前30分鐘。休園日為星期三（若星期三為本國定假期或「慰靈之日」(6月23日)時，則順延至翌日休息）。
識名園門票定價為成人400日圓。（2019年8月資訊）
如何前往識名園
編輯部建議遊客乘搭巴士前往識名園。當地有好幾條巴士路線都開往識名園，以下就為大家介紹最簡單嘅一條路線。
首先，從沖繩那霸機場乘搭「沖繩都市單軌電車」約12分鐘前往「沖繩都市單軌電車 縣廳前站」，然後從「沖繩都市單軌電車 縣廳前站」步行3分鐘到「縣廳北口」巴士站，轉乘「那霸巴士4系統」前往「識名園前」巴士站，巴士車程約20分鐘。最後從「識名園前」巴士站步行1分鐘即可抵達識名園。
景點資訊
- 名稱：識名園
- 地址：〒902-0072 沖繩縣那霸市字真地421-7
- 交通方式：沖繩那霸機場→[沖繩都市單軌電車線Yui-Rail]約12分鐘→縣廳前站→步行約3分鐘→縣廳北口巴士站→[那霸巴士4號系統]約20分鐘→識名園前巴士站…步行約1分鐘
- Wi-Fi：有
- 語言：英文
- 購票方式：現場購票
- 信用卡：不可使用
Comments