渡嘉敷島酒店推薦：海水透明度極高嘅阿波連海灘及渡嘉志久周邊地區

如果您正物色緊渡嘉敷島上嘅住宿，編輯部特別推薦「阿波連海灘」、「渡嘉志久海灘」等風景宜人嘅海灘周邊。本文將為大家介紹渡嘉敷島住宿嘅特徵，以及方便前往海灘嘅酒店。

渡嘉敷島酒店及旅館

渡嘉敷島嘅住宿設施大致分佈於島上三個區域。

首先係阿波連海灘周邊地區，區內有多間民宿、度假酒店及裝潢時尚嘅公寓式酒店。

第二個係渡嘉志久海灘周邊地區，住宿設施雖然唔多，但酒店及公寓式酒店地理位置極佳，大大個海景就喺您眼前！

第三個係渡嘉敷港周邊地區，雖然海灘欠奉，但就有多間民宿、公寓式酒店及簡易旅館。

渡嘉敷島住宿價位約為每晚5千日圓到3萬日圓之間。（2019年8月資訊）

「渡嘉敷海洋度假村」面向渡嘉志久海灘，係渡嘉敷島上地理位置最好嘅度假村。除咗住宿，酒店亦有提供海上運動體驗、物品出借，方便住客嘅貼心服務亦係呢間度假村嘅吸引之處之一。

「渡嘉敷海洋度假村」客房最大嘅賣點，就係坐擁無敵海景！眼前白色沙灘以及蔚藍大海嘅強烈對比叫人著迷，而和室及西式客房兩種客房嘅空間都採用簡潔設計、環境清潔。值得留意嘅係，部分房間並唔能夠睇到海景，訂房時記住多留意。

住客可以到度假村內嘅餐廳享用自助式早餐及晚餐。晚餐提供多達20種菜餚，您可以品嚐到慶良間群島近海捕獲嘅「鮪魚」、海藻「海葡萄」等新鮮海鮮，又或採用由當地出產蔬菜製成嘅料理、沖繩產水果等。

另一方面，度假村內嘅午餐菜式則有別於早餐、晚餐，歡迎客人單點。您可以喺到品嚐沖繩名物美食，例如沖繩鄉土料理「沖繩蕎麥麵」、使用沖繩當地苦瓜及豆腐製成嘅「沖繩炒苦瓜」、將墨西哥塔可餅食材放於白飯上嘅「塔可飯」等。

「渡嘉敷海洋度假村」全年提供各式各樣嘅活動體驗、內容豐富多元，當中包括香蕉船及水上摩托車等海上運動，又或可以近距離欣賞熱帶魚嘅浮潛等，保證您可以喺清透透明嘅大海玩得盡興！

渡嘉志久海灘更係海龜棲息地。如果幸運的話，您仲可以同海龜一齊游水𠻹！

「渡嘉敷海洋度假村」每日提供2班接載住客到阿波連海灘嘅免費接駁巴士。如果行去海灘要40分鐘，所以記得多多善用接駁巴士喇！想要搭巴士嘅住客，請於出發前30分鐘向酒店櫃台人員預約。