北九州市漫畫博物館滿足你小宅宅的心

位於北九州市嘅北九州市漫畫博物館收藏及展示當地漫畫家嘅作品及相關資料。館內仲會舉辦各種主題嘅特別展覽，等觀眾可以從各方面了解漫畫嘅歷史同魅力。

北九州市漫畫博物館的簡介

北九州市漫畫博物館位於聚集遊戲同動漫商店嘅商業設施「Aruaru City」嘅五樓同六樓。館內展出好多同北九州相關嘅知名漫畫家作品，例如松本零士、渡瀬政造、畑中純同北條司等等，仲有同漫畫製作相關嘅資料。

北九州市漫畫博物館嘅常設展區同特展區有唔同主題嘅展覽及閱覽區可以自由睇漫畫。另外，仲有漫畫教室、漫畫家脫口秀等活動。以下為大家導覽館內的必看特色。

五樓嘅入口有由工作人員扮演成「銀河鐵道999」內出現嘅人物「梅德爾」，企喺入口迎接大家進入漫畫嘅世界。另外，館內仲有「宇宙海賊船長哈洛克」主角真人大小嘅模型，可以同佢影張相留念呀。

五樓嘅特展區時常會舉辦原創企劃展、巡迴企劃展等。展示內容因主題而異，可以睇到知名漫畫嘅手稿，仲有模型、人偶等貴重嘅展示品。

六樓嘅常設展區，按主題分幾個唔同嘅展區。例如「從北九州出發前往銀河～松本零士嘅出身地～」呢個展區介紹松本零士嘅生平同作品。喺「漫畫的七個不可思議」區域可以睇到漫畫嘅製作流程；而「漫畫時光隧道」區內則可以睇到漫畫與日本社會歷史。

喺六樓嘅閱覽區，有大約5萬本漫畫單行本任你睇到飽。咁難能可貴嘅機會，你一定唔可以錯過！（2019年8月資訊）

北九州市漫畫博物館嘅開放時間從朝早11點到下午7點，最後入館為閉館前30分鐘。休館日為逢星期二（遇日本公眾假期的話，則順延至隔日休館)、日本新年假期、以及整理維修日。依情況，開館時間可能會延長，或者夏季可能會有不定時取消休息日子。

北九州市漫畫博物館嘅門票，成人每人480円。特展需另外購票。（2019年8月資訊）

距離北九州市漫畫博物館最近嘅車站係JR小倉站。從福岡機場乘搭高速巴士，約1小時20分鐘到JR小倉站後，再步行2分鐘就到北九州市漫畫博物館。