西表島係沖繩八重山群島島嶼之一，島上大部分地區都被亞熱帶森林所覆蓋。遊客可以喺島上體驗叢林探險、健行等各式各樣戶外活動。島上亦棲息著多種動植物，當中包括國家指定天然紀念物嘅「西表山貓」。
西表島小檔案
西表島係沖繩縣內嘅第二大島，面積僅次於沖繩本島。島嶼具有非常貴重嘅學術研究價值，事關島上有15種國家指定天然紀念物生存於其中，整座島嶼被指定為國家公園。
西表島氣候溫暖潮濕，一年平均氣溫約為23°C，遊客無論幾時到訪都可以體驗各種活動。但如果您嘅主要目的係海水浴或海上運動，建議喺水溫介乎27℃到31°C嘅夏季期間前往旅遊會係最合適！
5月到6月係西表島嘅雨季，7月到10月則係颱風季。如果您正準備喺呢段期間前往旅遊，就請您出發前一定要先睇清楚天氣預告喇。
西表島必去景點
西表島可主要分為大原港所在嘅東部區域以及上原港所在嘅西部區域。以下就要為大家介紹各地區特色、推薦觀光景點及活動。
東部區域：日本最大規模紅樹林等多元化亞熱帶植物
東部地區係「前良川」、「Yutsun川」等紅樹林生長嘅地方。其中，「仲間川」就係被指定為日本國家天然紀念物、日本最大規模嘅紅樹林。遊客可以透過乘搭遊艇、划獨木舟或徒步健行等方式近距離觀賞紅樹林。
而島上另一設施「西表野生生物保護中心」內，則展出咗西表山貓等於西表島上棲息嘅動物嘅標本。館內亦有介紹西表島自然環境及地理嘅展板。
西部地區：「星砂之濱」等美麗海灘及叢林風光名勝
西部地區內遍佈著多個水清砂幼嘅海灘，例如擁有細沙嘅「Todomari之濱」、由珊瑚碎片形成嘅「Barasu島」等。其中「星砂之濱」就係一個以星型細砂聞名嘅海灘。由於海灘屬淺海地帶，因此非常適合浮潛，遊客於潛水期間可以欣賞到100種以上五顏六色嘅魚類。
西部地區除咗蔚藍大海，仲有多個其他充滿魅力嘅景點。西表島最大河流「浦内川」坐擁廣闊紅樹林；西表島森林內嘅「Mariyudwu瀑布」則係一個兩段式嘅瀑布，瀑布底下水潭呈圓形；而島內嘅「Pinaisara瀑布」則屬沖繩最大規模嘅瀑布，高低差最高可達55米。
有唔少遊客都鍾意喺上述景點內叢林徒步探險、又或享受划獨木舟等活動㗎！
西表島美食及餐廳
西表島以多種海鮮類美食見稱。例如以於紅樹林生長嘅「三疣梭子蟹」製成嘅「三疣梭子蟹義大利麵」及「三疣梭子蟹湯」，又或西表島極具代表性嘅「島鳳梨」及「完熟芒果」等水果。
島上餐廳大多集中於東部地區及南部地區各港口周邊，您亦可以喺沿海地區或西部地區上原港周邊搵到唔少餐廳。
西表島酒店及旅館
西表島上嘅住宿設施數量和類型依地區而異。
以大原港為中心嘅東部地區內有多間民宿、旅館等，風格走溫馨家庭路線。
而上原港周邊嘅西部地區，則林立島上最大嘅度假酒店、時尚別墅，民宿、公寓式酒店等各式各樣嘅住宿設施。
西部地區有唔少經濟實惠嘅住宿選擇，一晚費用大約每晚5千到1萬日圓之間。
前往西表島嘅交通方式
遊客如欲前往西表島，可以從八重山群島嘅主要島嶼「石垣島」搭船。先從香港機場搭飛機前往石垣島，然後從石垣港轉乘高速船或渡輪前往西表島。西表島東部及西部各有一個作為玄關口嘅港口，各位不妨可以根據行程目的地以再選擇碼頭。
搭乘高速船前往東部地區大原港約需35到40分鐘、搭乘渡輪則約需1小時20分鐘；搭乘高速船前往西部地區上原港約需40到45分鐘、搭乘渡輪則約1小時40分鐘。
由於島上每個景點都同港口有一段距離，因此建議可善用當地嘅巴士前往各景點。
景點資訊
- 名稱：西表島（上原港旅客候船處）
- 地址：〒907-1541 沖繩縣八重山郡竹富町上原
- 交通方式：石垣港→[高速船]約35分鐘～40分鐘→大原港 / 石垣港→[高速船]約40分鐘～45分鐘→上原港
- Wi-Fi：有（Taketomi Free Wi-Fi）
- 語言：英文
- 信用卡：可以使用VISA, MasterCard, JCB, AMERICAN EXPRESS, Diners Club International（依設施而異）
Comments