土肥金山係位於静岡縣西伊豆嘅知名人氣觀光景點。館內展出列入健力士世界紀錄「世界最巨大嘅金磚」，仲有「溫泉淘金」等其他地方無嘅特別體驗，無論大人小朋友都可以玩得開心。同時，土肥金山亦作為一個可以提升運勢嘅「能量景點」而聞名。
關於土肥金山
土肥金山過去曾係日本全國礦產生產量排行第二嘅礦山，擁有相當著名嘅歷史，傳聞採礦出達40噸金同400噸銀！礦山及後於昭和40年（1965年）關閉，現時則作為主題公園對外開放，吸引眾多觀光客造訪。另外，土肥金山亦係伊豆市指定史蹟之一。
土肥金山嘅睇頭同推薦體驗活動
喺土肥金山，遊客可以參觀展覽、體驗活動、品嚐美食、購買紀念品等，以下為大家介紹土肥金山嘅各種玩法。
展示列入健力士世界紀錄巨大金磚嘅「黃金館」
黃金館內有展示巨大金塊、金礦石同貨幣等等展覽品。其中最唔可以走寶嘅就係欣賞一下鎮館之寶 ——「巨大金塊」！總重量達250公斤，並列入健力士世界紀錄為世界最巨大嘅金磚。遊客唔只可以近距離觀賞黃金閃耀嘅光輝，仲可以實際觸摸！另外，館內仲有展示12.5公斤嘅金塊，遊客亦可以實際拎起手感受吓黃金重量。荷包唔夠厚嘅小編都好想去親自去體驗吓，睇吓黃金有幾重呢！
重現江戶時代採礦場景嘅「觀光坑道」
總長100公里嘅坑道當中，現時開放咗350米作為觀光坑道供遊客參觀。坑道內設置真人大小嘅人形公仔，重現昔日採礦風景。呢個仲有個「山神社的黃金鳥居」同「黃金之泉 洗錢場所」等傳聞可以能提升財運嘅「能量景點」，行過路過點都拜拜先！參觀所需時間大約30分鐘左右。
體驗溫泉淘金 成為「淘金名人」？
喺「砂金館」，遊客可以用專用器皿體驗「掏砂金」。如果可以喺30分鐘體驗時間內掏出30粒以上砂金，就可以拎到「淘金名人」證書啊。淘出嘅砂金可以直接拎返屋企，亦可以加工製成鎖匙扣等紀念品留念。
土肥金山嘅餐廳同紀念品商店
設施內設有餐廳同紀念品商店。餐廳提供烏冬、蕎麥麵、海鮮丼等日本料理，仲有使用伊豆當地名產「伊豆鹿肉（イズシカ）」嘅特色食物，數量有限，建議有興趣嘅朋友可能到埗後就快啲去買啦。
而紀念品商店內首推最受歡迎嘅商品「金箔蜂蜜蛋糕」。其他仲有加咗金箔嘅日式饅頭、静岡縣產嘅高級煎茶「純金茶」等。另外，仲會有化妝水或高爾夫球等特別商品。你睇，啲商品幾咁豐富多元，去行吓睇吓都好嘛！
土肥金山嘅門票收費及營業時間
土肥金山嘅開放時間為09:00至17:00，最後入園時間至16:30為止，但淘金體驗最後報名時間僅至16:20止，如果想參觀埋黃金館同觀光坑道，咁就要15:50前去到添！另外，請注意每年12月第二週左右約有大約3至4日休息日，去之前建議先去官網查清楚最新消息。
土肥金山嘅門票收費隨參與項目而有所不同，觀光坑道同黃金館共通門票為成人每人1,000日圓；只參與淘金體驗嘅話，則為成人每人750日圓。（2019年10月資訊）
去土肥金山嘅交通方式
要去土肥金山，首先要搭車去到伊豆箱根鐵道嘅修善寺站，之後轉搭往堂之島、松崎方向嘅東海巴士，車程約50分鐘，到土肥金山站落車，眼前毫係入口處。
景點資訊，
- 名稱：土肥金山
- 地址：〒410-3302 静岡縣伊豆市土肥2726
- 交通方式：修善寺站→[東海巴士] 車程約50分鐘→土肥金山巴士站…下車後即達
- Wi-Fi：無
- 語言：英文、繁體中文、簡體中文、韓文
- 門票：於入口處購票
- 信用卡：可使用MasterCard、AMERICAN EXPRESS、Diners Club International、UnionPay
Comments