宮古島位於沖繩縣那霸市西南方約300公里處。宮古島擁有堪稱全日本最靚嘅海灘，係遊客享受海上活動嘅絕佳地點。拜其南國溫暖氣候與大自然環境所賜，島嶼同時亦孕育出芒果以及珍貴罕見嘅宮古牛等唔少特產。
宮古島小檔案
宮古島係沖繩縣宮古群島嘅主要島嶼。該島由隆起珊瑚礁構成、地形平坦，以平良港以外一帶為主要市區。宮古島上有三座與同屬宮古群島離島相連嘅大橋，其中連接宮古島與伊良部島嘅「伊良部大橋」全長3,540米，屬日本免費通行嘅橋樑中距離最長嘅一道橋。
宮古島氣候・最佳旅遊季節
宮古島氣候高溫多濕，一年平均氣溫約為攝氏23.3度，全年氣候溫暖宜人。特別係6月〜8月時海水溫度達攝氏28度，造就體驗海水浴或海上活動嘅最佳季節。惟5月中旬到6月下旬屬梅雨季、夏天到秋天則屬颱風季，上述期間前往宮古島旅遊的話記緊多多留意天氣預告。
以觀光目的為主嘅遊客，建議於平均氣溫20到25度之間嘅春季、或10月後秋、冬季再前往當地旅遊。皆因呢段期間內遊客會比較少，您有更大機會到各個景點享受難得悠閒清淨嘅一刻。
宮古島必睇景點及必玩活動
宮古島擁有無敵靚海景以及多元化觀光景點。以下將為大家介紹宮古島必去景點、必玩活動以及傳統節慶等。
於宮古島海灘享受海水浴或海上活動
遊客可以於宮古島海灘體驗海水浴及各式各樣海上活動。例如「與那霸前濱海灘」就以翠綠色淺灘到深藍色海面嘅迷人漸變色彩見稱，海灘上嘅水上摩托艇、香蕉船及滑翔傘等海上運動都大受遊客歡迎。
而喺「Shigira海灘（シギラビーチ）」上，您則可以透過浮潛或潛水近距離欣賞各式各樣嘅珊瑚以及色彩繽紛嘅熱帶魚。
鍾乳洞等宮古島絕景景點
宮古島同時亦有多個絕景景點，例如茂密紅樹林、可以眺望大海嘅海角及展望台等，而其中有「南瓜禮堂（パンプキンホール）」之稱嘅鍾乳洞就屬必睇景點。遊客將先透過浮潛嚟到位於海中嘅鍾乳洞入口，再以水中漫步方式探險洞穴內部。提到鍾乳洞最大睇頭，就非形狀及顏色都有如南瓜嘅巨型鐘乳石莫屬。漆黑洞穴內居然出現橙色鐘乳石，您話係咪非常神秘呢？
「上野德國文化村」、「宮古島市綜合博物館」等宮古島熱門觀光設施
宮古島唔只絕景景點，島上亦有眾多觀光設施值得各位參觀。例如「上野德國文化村」，就係一個向遊客傳揚德國文化及宮古島自然嘅主題公園。園區內有以德國「馬克斯堡」造型為藍本而設計而成嘅紀念館以及展出德國玩具嘅「Kinder House」等豐富景點。
除此之外，「宮古島市綜合博物館」亦會透過各種展覽，向大家介紹宮古島嘅自然、歷史、民俗、文化等。
參加「潘突節」等傳統節慶
宮古島上至今仍保留著唔少傳統文化，例如有被指定為日本國家無形民俗文化財嘅傳統團體舞蹈「宮古kuitya (クイチャー)」，以及透過歌舞祈求農作物豐收及人民幸福嘅「野原masutoriya (マストリヤー)」等。
其中，「宮古島潘突節 (パーントゥ)」就係一個非常獨特嘅傳統節慶。戴著面具、全身包裹著魚藤蔓草並塗滿泥濘嘅神明「潘突」會喺街上追逐路人並喺眾人身上塗滿泥濘以消災解厄。有興趣參加嘅朋友，建議一定要帶定唔介意整污糟嘅衫褲方便更換啊！
宮古島美食・餐廳
於粗實麵條中加入豬肉、魚板等食材整成嘅「宮古蕎麥麵」係宮古島知名料理之一。宮古島另外亦有宮古牛燒肉、牛排，以芒果、菠蘿等水果製成嘅甜品，以及「水雲 (もずく)」及海葡萄等海藻類等豐富多元美食。
想要品嚐當地美食的話，可以前往以北部嘅平良港為中心嘅市區街道上嘅多間餐廳。
宮古島酒店・旅館
宮古島住宿設施散佈於島上各地，當中以南部沿岸及北部市區等地嘅酒店、旅館較為集中。
南部沿岸上有多間可以眺望海景嘅度假酒店及別墅；而北部市區內則有唔少每晚5千円左右、以住宿為主嘅經濟實惠酒店及民宿。
前往宮古島嘅交通方式
遊客可以從沖繩那霸機場乘搭飛機前往宮古機場，飛行時間大約45分鐘。要留意嘅係呢條航線航班較少，因此您亦可以考慮選擇從東京羽田機場或大阪關西國際機場出發嘅直飛航班。
宮古島上各觀光景點都距離市區有一段距離，如果想要去各個景點觀光，建議從宮古機場乘搭當地巴士。
相關資訊
- 名稱：宮古島（宮古機場）
- 地址：〒906-0013 沖繩縣宮古島市平良字下里1657−128
- 交通方式：那覇機場→[飛機]約45分鐘→宮古機場
- Wi-Fi：有（Miyakojima-City Free Wi-Fi）
- 語言：中文、英文、韓文
- 信用卡：可使用VISA、MasterCard、JCB、AMERICAN EXPRESS、Diners Club International、銀聯卡
Comments