位於日本三重縣伊勢市嘅歷史主題公園「伊勢忍者王國」，以原尺寸複製重現咗以安土城為中心嘅城下町。園區內有各種設施同景點，例如有「忍者森林探險」，佔地非常大，設置咗好多忍者競技設施，遊客可以喺呢度體驗點樣成為忍者；亦有可以欣賞忍者表演嘅劇場；同埋其他有關忍者、武士嘅體驗同景點。另外，呢度仲設有餐廳同溫泉，真係樣樣齊備，喺玩主題樂園之餘，亦可以休息使用呢啲設施。
關於伊勢忍者王國
「伊勢忍者王國」分為第一層、第二層、第三層，共有三個主要區域。第一層最熱鬧，匯集咗遊戲、景點設施、劇場、餐廳、紀念品店、溫泉等。而第二層就有忍者修行嘅體驗型設施同埋劇場。第三層就係雄偉嘅安土城。但由於安土城目前整修中，第3層區域暫時唔對外開放。（2019年8月資訊）
「伊勢忍者王國」嘅必睇景點，必玩設施
「伊勢忍者王國」園區內嘅設施同景點非常豐富，亦有好多體驗活動，以下為大家介紹推薦必睇景點同埋一定要玩嘅設施。
可以體驗日本傳統文化嘅遊戲＆設施
園區內有各式各樣可以體驗日本傳統文化嘅活動同埋設施：例如換上忍者服裝，拎住手裡劍飛鏢或者弓箭體驗忍者修行；玩忍者迷宮(忍者からくり迷路)；喺忍者劇場觀賞時代劇；聘請刀匠進行日本刀嘅鍛造表演（僅限星期六、日）。
另外，仲有喺園區內一邊探索一邊解開歷史謎團嘅「實境解謎遊戲 (リアル謎解きゲーム)」；亦有共4條路線、全長1,000米嘅戶外設施「忍者森林探險」，可以體驗各種忍者訓練，例如橫渡圓形木頭、溜索等森林競技運動。
租借日本傳統服裝，喺城下町散步
喺園區內，您可以租借忍者服裝或者和服，喺城下町嘅古老街道中漫步。其中一種門票—「通行手形」（1日通行券）係包咗免費租用忍者服裝或者簡易和服。
另外，喺「裝扮照相館」到，就可以租借正統嘅盔甲、花魁衣裳等。工作人員協助您著好衫後，就好似入咗戲變咗時代劇嘅一部份咁，仲可以影相留念，為旅程留下難忘嘅回憶！
名物美食、各式各樣紀念品
喺第一層區域，除咗設施景點外，仲有好多餐廳同紀念品店，無論係食嘢定購物都可以盡情享受。喺餐廳入面，可以品嚐到三重縣品牌和牛嘅「燒肉」、伊勢產嘅「海鮮炭火燒烤」、伊勢名物「伊勢烏龍麵」等當地嘅出名美食。
而紀念品店入面，則有原創商品、伊勢志摩嘅珍珠、和菓子、和風生活雜貨等，各式各樣商品齊備，千祈唔好錯過！
伊勢忍者王國嘅營業時間與票價
「伊勢忍者王國」全年無休，開放時間為9時到22時（最後入園時間為21時）。遊戲、設施營業時間到17時。17時之後，第一層會有部分區域免費開放，可以觀賞夜間劇場（星期六、日），亦可以前往餐廳同溫泉。餐廳最後點餐時間係20時，而溫泉設施最後入場時間係21時。
有多款唔同嘅套票同票價，大家可以去官方網站睇吓包咗啲咩，選最適合自己嘅。其中「通行手形」（1日通行券），就包咗除咗餐廳同埋贈品遊戲以外嘅所有設施，費用為成人每位4,900円。（截至2019年8月資訊）
前往伊勢忍者王國嘅交通方式
前往「伊勢忍者王國」有好多唔同方法，其中，由近鐵「伊勢市站」乘搭三重交通「CAN巴士」最方便。由伊勢市站到「伊勢忍者王國」嘅車程約30分鐘，落車就即刻行到去主題樂園嘅入口大門。
另外，喺近鐵「伊勢市站」有免費接駁巴士，上午有一班，而三重交通「CAN巴士」運行結束嘅17時之後，亦有一班，如想乘搭，需事先電話預約。（預約僅限日文）（截至2019年8月資訊）
景點資訊
- 名稱：伊勢忍者王國
- 地址：〒519-0603 三重縣伊勢市二見町三津1201-1
- 交通方式：伊勢市站→[三重交通 CAN巴士]或者[免費接駁巴士]約30分鐘→伊勢忍者王國...下車即達
- Wi-Fi：有（Free Wi-Fi MIE）
- 語言：中文、英文、韓文
- 購票方式：現場售票處、日本當地便利商店
- 信用卡：可以使用VISA, MasterCard, JCB, AMERICAN EXPRESS, Diners Club International, 銀聯卡
Comments