到伊豆修善寺一次過嘆哂溫泉、大自然、神社寺廟、主題公園！

修善寺位於静岡縣伊豆市北部，係以伊豆半島最古老嘅溫泉「修善寺溫泉」為中心嘅旅遊區。喺溫泉街上有好多具歷史性嘅建築物林立，仲有唔少自然景觀名勝、神社寺廟、主題公園等唔同種類嘅景點。

關於修善寺

修善寺有豐裕嘅溫泉同觀光等資源。修善寺發展成為溫泉區嘅歷史可追溯到西元807年，以同真言宗開山祖師——弘法大師有關嘅「獨鈷之湯」為契機，而發展至今日嘅溫泉勝地。另外，修善寺川沿岸有溫泉旅館、餐廳、商店，因為形成「修善寺溫泉街」，而喺溫泉街週邊亦有唔少觀光景點。

※「獨鈷」為佛教法器「金剛杵」嘅一種。

修善寺夏季涼爽、冬季溫暖且多晴朗嘅日子，一年中都適宜觀光。另外，隨著四季更迭，大自然景色都有唔同，而且會舉辦唔同嘅祭典同活動等，唔同季節都有唔同魅力。

春季可以欣賞櫻花、夏季賞螢火蟲或參加祭典、秋季有轉紅嘅楓葉、冬季可賞梅同浸溫泉，有好多推薦嘅旅遊方式。

修善寺有好多種類豐富嘅觀光景點，以下同大家介紹特別推薦必去嘅幾個地方。

喺修善寺地區有「日枝神社」，神社内同參道都有樫樹或杉樹等巨木林立，仲有被認為係伊豆最古老木造建築嘅「指月殿」等，有幾間歷史悠久嘅神社寺廟。

其中，「修禪寺」係弘法大師於西元807年創立，一間歷史悠久嘅寺院。寺內除咗可以欣賞「本堂」同「鐘樓堂」，仲可以鑑賞佛像同古老面具等有多項寺藏寶物嘅「寶物殿」，有機會真係要去參觀一下呀！

修善寺地區有幾個獨特嘅主題公園，例如「修善寺虹之鄉」，園內有英國村或加拿大村等唔同國家作為主題嘅街景重現，仲有日本庭園同「匠之村」等等，可以喺度體驗到日本嘅工藝技術。另外，喺園區內可以搭乘「羅姆尼鐵道（ロムニー鉄道）」列車繞行來往各區。仲有英國製嘅蒸氣火車頭都係其魅力之一。

而喺「自行車之國 Cycle Sports Center」則可以玩過山車或水上單車等戶外遊樂設施。要特別注意嘅係，一部分遊樂設施因裝修而暫停開放，建議去園區之前先查看官方網站確認清楚。

喺修善寺亦有好似「竹林小徑」同「嵐山」等美麗自然風景嘅景點。

特別喺「修善寺自然公園」有好多可以欣賞到梅花、櫻花、楓葉等各種花草樹木嘅地方。園內嘅「梅林」有約20種、約1,000棵紅梅白梅，喺每年2月上旬至3月上旬盛開。而「楓葉林」則有約2,000棵楓樹，每年約11月下旬至12月上旬樹葉將轉成紅色、橙色、黃色等唔同深淺嘅楓紅顏色。

喺園內嘅展望台都可以欣賞到雄偉嘅富士山，相當推薦一遊！

修善寺出名生產香菇同黑米等農產品。使用當地食材做成嘅香菇蕎麥麵、黑米炒飯、黑米甜點等當地特產美食，都可以喺修善寺地區嘅餐廳食得到，嚟呢度旅遊就唔好錯過喇。另外，餐廳多數聚集喺溫泉街上。

修善寺嘅住宿設施集中喺溫泉區，有好多日式溫泉旅館，亦有西式酒店。平均住宿費用大約多為10,000至30,000日圓左右，但其中都有低於10,000日圓嘅平價住宿。如果想搵比較經濟實惠嘅住宿，都可以搭約15分鐘伊豆箱根鐵道電車到「伊豆長岡站」附近搵，附近有唔少5,000日圓以內嘅住宿。

去修善寺地區觀光，首先以伊豆箱根鐵道「修善寺站」作為目標。從東海道新幹線途經站「三島站」轉搭伊豆箱根鐵道，約40分鐘車程可抵達伊豆箱根鐵道修善寺站。

從伊豆箱根鐵道修善寺站去各個觀光景點，建議搭當地路線巴士。如果預計會去溫泉街，可以搭往修善寺溫泉方向嘅巴士，去修善寺溫泉站約約8分鐘車程。

另外，車站設有觀光旅遊資訊中心，有識講英文嘅工作人員常駐，可協助外國旅客相關諮詢。