静岡縣富士宮富士山附近的知名觀光景點

静岡縣東部嘅富士宮係位於世界遺產「富士山」南西山麓嘅城鎮。富士宮有多個自然風景名勝景點，而且有好多同富士山相關嘅神社寺廟同觀光設施。美食方面，除咗豐饒嘅大自然環境所孕育出嘅茶葉、稻米、蔬菜等特產品，仲有「富士宮炒麵」等在地美食亦相當出名。

關於富士宮

富士宮嘅南部地區為平原，市中心鬧區亦位於此；而北部則係標高3,776米嘅富士山同毛無山等山區。另外，因富士宮係富士山信仰之地——「富士山本宮淺間大社」附近嘅熱鬧地區，所以富士宮自古以來都興盛繁榮。

富士宮市內嘅海拔高低落差可以講係日本第一，所以隨著地域唔同，氣候都有所不同。南部嘅平原地區為整年相對較為溫暖嘅地域。另一方面，北部地區有高聳入雲嘅富士山，喺山頂就算係夏季都同嚴冬一樣咁凍。

因為南北地區溫差大，如果又想登上富士山，又想喺富士宮觀光嘅話，推薦喺夏季登山季節去就好。

富士宮有白絲瀑布同朝霧高原等具魅力嘅旅遊景點，以下為大家介紹特別推薦嘅觀光景點同體驗活動。

去富士宮旅行，可以同時體驗滑翔傘、激流泛舟同行山遠足等唔同種類嘅戶外活動。

其中以富士山登山最受歡迎。可搭巴士到登山口所在嘅「富士宮五合目」，沿「富士宮路線」爬上富士山山頂。從山頂可眺望市區、湖景同群山等壯麗風景。

另外，富士宮路線每年約喺7月10日至9月10日左右開通。海拔高度差距約1,300米，登山所需時間為約5鐘個、落山則為約3個鐘左右。

富士宮有「大石寺」同「村山淺間神社」等歷史悠久嘅神社寺廟。其中，「富士山本宮淺間大社」係全國1,300間以上淺間神社嘅總本社，受到廣泛信仰者支持。隨著季節有唔同祭典活動，尤以多部擁有豪華装飾嘅山車繞行市區，最後集合到神社，喺11月舉辦嘅「富士宮祭典」最為出名。

喺富士宮有幾間博物館，如介紹市內出土品同史跡等嘅「富士宮市埋藏文化財中心」，或展示有關富士宮歷史同富士山相關資料嘅「富士宮市立鄉土資料館」等。

特別推薦嘅係「靜岡縣富士山世界遺產中心」。根據唔同主題可以睇到展示嘅相同影片，仲有可以體驗富士山登山嘅斜坡行人路，仲有可以眺望富士山展望台等等。嚟到呢度，就算唔使真正去爬富士山，都可以充分體驗富士山嘅魅力！

富士宮嘅當地特色美食有富士宮炒麵、虹鱒魚料理、同使用名為「LYB豬（ルイビ豚）」嘅高級品牌豬肉所做嘅料理等等。去富士宮旅行時不妨去搵吓各豐富種類嘅當地美食呀！

南部同北部各地都有餐廳，但以JR富士宮站為中心嘅南部市區較多。

富士宮嘅住宿設施多分佈喺南部嘅市區，數量眾多，種類有西式旅館、日式旅館、民宿、青年旅舍等等。特別JR富士宮站附近有唔少平均3,000至5,000日圓、單純提供住宿服務嘅旅館。另外，數量雖較少，但喺北部都有幾間旅館、別墅、小木屋等唔同類型嘅住宿設施。

要去富士宮，可以首先去落腳點嘅JR富士宮站。從新幹線停經嘅「JR新富士站」落車後，搭7分鐘富士急静岡巴士，到「JR富士站」轉搭JR身延線，車程約20分鐘就到「JR富士宮站」。

之後從JR富士宮站可以搭電車或巴士到各個觀光景點。巴士方面，除咗當地路線巴士之外，仲有繞行市區踲循環巴士「宮巴士（宮バス）」、僅於週末假日行駛嘅定期觀光巴士「強力君號（強力くん）」、同春季至秋季行駛至富士山五合目嘅「富士登山巴士（富士登山バス）」等等。（截至2019年8月資訊）