熱海溫泉：日本三大溫泉街之一

熱海位於靜岡縣伊豆半島北部沿岸，係一個被群山大海包圍、自然環境豐饒嘅溫泉度假形區域。除咗擁有各式觀光景點，每年仲會舉辦10次以上「熱海海上煙花大會」等祭典、活動。

靜岡縣熱海簡介

熱海係位於因被多賀火山侵蝕而形成嘅傾斜土地上嘅城鎮。受惠於火山，熱海有豐富自然湧出嘅溫泉泉源，自古以來作為溫泉鄉而繁榮發展起嚟。另外，距離熱海約10公里嘅「初島」亦係一個熱門度假勝地。

熱海嘅夏天涼爽、冬天和暖，降雨量較少，一年四季都適合觀光旅遊。而且仲有欣賞到季節性花卉嘅賞花名勝景點、各種祭典同活動等，唔同季節嚟到都充滿魅力！

尤其推薦夏天去熱海，可以體驗各種活動。除咗煙花大會同各種祭典，仲可以享受海中暢泳，玩大型水上遊樂設施或各種水上活動，可以體驗多種活動。

「熱海Marine Spa」有溫泉同泳池，可以著泳衣入內，而且有足浴設施「家康之湯」等各種可以輕鬆體驗溫泉嘅景點。除咗溫泉之外，仲有各式各樣嘅觀光設施。

熱海仲有好多觀光景點，例如有著名賞花地點「熱海梅園」同「AKAO香草玫瑰園」、綿延的斷崖風景「錦浦」等等。當中「陽光海灘（Sun Beach）」嘅蔚藍大海、白色沙灘、椰林樹影嘅海岸風景非常美麗。甚至夜晚點亮燈飾後，可以喺被染成淡藍色、充滿夢幻氣氛嘅沙灘上散步，非常浪漫。

喺熱海都有藝術嘅景點，例如喺「MOA美術館」可以欣賞東洋藝術嘅繪畫、陶器、佛像彫刻等作品；喺「熱海Trick Art迷宮館」可以欣賞立體嘅視覺藝術作品。

另外，「熱海藝妓見番歌舞練場」逢星期六、日都會舉辦表演，藝妓會著上華麗和服為大家表演優雅嘅藝妓舞蹈。

講起熱海旅行，建於錦浦山頂嘅「熱海城」、擁有一棵樹齡兩千年以上神木嘅「來宮神社」都係必去景點。

喺六層樓高嘅熱海城天守閣中，有一層係展示武器同浮世繪，又有穿著殿下同公主服裝嘅體驗活動，仲有一個足浴景點。另外，從六樓嘅展望台可以俯瞰大海同伊豆半島嘅廣闊景色，簡直靚到哇哇聲！

熱海著名嘅海鮮美食有海鮮丼、醬煮魚、竹莢魚乾等。其他仲有蛋包飯等西式料理、以熱海命名嘅日式及西式甜品等都出名。以熱海車站為中心，沿海嘅街上都有好多餐廳同甜品店。

熱海嘅熱海港同網代港係竹莢魚、鮪魚、紅甘等各種魚類嘅卸貨港。熱海市內，好多壽司店都使用呢啲捕獲返嚟嘅海產嚟製作壽司，咁新鮮就一定要試吓啦！

熱海特產柑橘類水果「DAIDAI」具有清爽嘅香味同酸味，常於製作肉類料理、魚類料理及日式或西式甜品時使用。有好多餐廳同甜品店都可以食到使用「DAIDAI」製成嘅料理，有時間就喺觀光景點附近搵吓有無呢啲餐廳啦！

熱海嘅住宿設施建於沿海地區。特徵係大部分都附設溫泉設施，或者客室可以一望大大個美麗海景！平均價格大約10,000〜20,000日圓。而價格比較經濟實惠、約5,000～10,000日圓嘅酒店多數建於JR熱海站附近。

從東京去熱海，以觀光據點JR熱海站為目標。由JR東京站乘搭東海道新幹線「HIKARI」約35分鐘抵達JR熱海站。另外，亦可以乘搭「KODAMA」約50分鐘到達。去到JR熱海站就可以搭電車或熱海市內名勝巡遊「湯～遊～巴士」去其他觀光景點。