日本三重縣嘅餐廳有好多使用肉類、海鮮類製作嘅菜式，仲有和菓子，特產美食種類豐富多元。今次小編就同大家介紹5種三重縣必吃美食，要去三重遊行嘅朋友唔好錯過喇。
松阪牛
松阪肉指嘅係三重縣松阪市及其周邊地區所飼育嘅牛肉，別稱「松阪牛」，係國際知名度好高嘅和牛品牌。最大特色係入口即融！因為松阪牛富含優質脂肪，柔軟肉質帶出極致口感。而且一擺入口，濃郁嘅牛味同甜甜嘅香味隨即蔓延開來係其一大特徵。松阪牛嘅料理種類豐富，有牛扒、Shabu Shabu（涮涮鍋）同壽喜燒等食法。但如果想直接品嚐松阪牛嘅美味，就推薦Shabu Shabu！
松阪肉喺松阪市、三重縣各地都可以食得到。其中推薦松阪市嘅松阪牛專門店「松阪Maruyoshi（松阪まるよし）」，而其他城市就推薦名店「壽喜燒涮涮鍋 松重（すき焼きしゃぶしゃぶ 松重）」。午餐丼飯價格約3,000円，套餐約15,000円。 (截至2019年8月資訊)
伊勢烏冬
伊勢烏冬（伊勢うどん）係三重縣伊勢市嘅特產美食。而且係從古至今去參拜伊勢神宮時都會食嘅食物，伊勢烏冬以口感軟腍嘅粗烏冬麵，加入濃郁又甜又咸嘅醬汁為特色。通常會撒上蔥花同七味粉一齊食。
伊勢烏冬嘅店集中喺JR或近鐵伊勢市車站附近。其中推薦嘅有為伊勢烏冬命名嘅 「Chitose（ちとせ）」，同埋出名有豐富配料嘅「名代 伊勢烏冬 山口屋」。
價格方面，基本一份伊勢烏冬約500円，加配料的話約800～1,200円。（截至2019年8月資訊）
手捏壽司
手捏壽司（てこね寿司）係三重縣伊勢志摩地區嘅鄉土料理，將醬油製成嘅醬汁醃製過嘅鰹魚（柴魚）及鮪魚（吞拿魚）等赤身魚（紅肉魚），鋪喺醋飯上，再加上大葉、生薑、海苔等藥味香料。據說最初係用手將紅肉魚、醋飯同調味料撈捏而成嘅一道料理。
供應手捏壽司嘅店鋪，分佈於志摩市、伊勢市、鳥羽市等各地。其中，志摩市沿岸同JR鵜方站周邊有好多名店。推薦「志摩之食處 磯子」、「王子（プリンス）」等店，除咗可以食到一般料理，仲有可以品嚐到當地捕獲嘅魚類所製作嘅豪華手捏壽司。價格方面，只放赤身魚嘅手捏壽司約1,000円以下。除咗赤身，再加入埋其他魚類嘅手捏壽司約1,000至1,400円。（截至2019年8月資訊）
伊勢龍蝦
三重縣嘅志摩半島盛產伊勢龍蝦（伊勢えび）。呢種龍蝦大大隻，外表華麗，肉質又彈牙，一食啲龍蝦鮮甜味出哂嚟！有多種食法，以燒、煮、蒸等煮法，製作日式或西式料理都得。
三重縣內各地都有好多餐廳都可以食到伊勢龍蝦。其中以伊勢市同志摩市選擇最多。如果想試西餐，推薦伊勢市嘅「燒烤片山（グリル片山）」餐廳；想食日式嘅，就推薦志摩市嘅「磯料理遊艇（磯料理ヨット）」餐廳。價錢因店而異，用餐預算大約6千至1萬円之間。（截至2019年8月資訊）
返馬餅
返馬餅（へんば餅）係「返馬屋商店本店（へんばや商店本店）」賣嘅一種和菓子。以米粉製作嘅餅皮煙韌，包入紅豆蓉餡，將兩面餅皮稍為煎至金黃色後，散發著陣陣甜香，味道樸素但好味！
關於返馬餅嘅由來。據聞係200多年前，當時從日本各地騎馬去伊勢神宮嘅參拜者們會落馬飲茶吃麻糬稍作休息，再去神宮參拜。及後呢個美味麻糬就被稱為「返馬餅」。
返馬餅售價為160円兩個。另外，因為返馬餅屬於水份含量較高嘅生菓子，建議購買後盡快享用，或者去揀可以堂食嘅店都比較好。（截至2019年8月資訊）
Comments