山形縣有「美食王國」之稱，喺山形縣嘅餐廳可以食到使用當地特產例如海鮮、野菜、牛肉、水果等食材製作嘅美食。另外，仲有好多起源於山形嘅當地美食都好豐富。呢篇文章就為大家精選5大山形美食嚟為大家做介紹啦。
蒟蒻丸子
蒟蒻丸子（玉こんにゃく）係將一口大小嘅粒狀蒟蒻丸子，加入魷魚乾同醬油燉煮，可以講係山形縣具代表性嘅名產美食。入哂醬油味嘅蒟蒻丸子，口感彈牙為其特徵。蒟蒻丸子當初最先係由山形當地製作蒟蒻嘅「YAMACON食品（ヤマコン食品）」所研發出嘅，之後喺山形當地祭典同觀光景點擺賣時獲得好評，進而推廣到山形縣全縣各地。
如果想試吓食蒟蒻丸子，可以喺各觀光景點嘅商店或蒟蒻專門店買到。其中以位於山形市嘅「千歲山蒟蒻店」同上山市嘅「蒟蒻番所」較為出名。1份為100〜150円日圓，價錢相當平易近人，一試無妨！（2019年8月時資訊）
山形冷拉麵
山形冷拉麵（冷やしラーメン）係起源於山形市內拉麵店「榮屋本店」嘅當地美食。因為客人一句「夏天想食凍嘅拉麵」而誕生咗呢個冷拉麵。而家喺山形縣內有好多拉麵店都可以食得到，部分店鋪全年都會提供冷拉麵，而部分店為夏季限定推出。
山形縣內可以食到冷拉麵嘅店有好多，其中以起源店「榮屋本店」或「城西阿金拉麵（城西金ちゃんラーメン）」等店相當受歡迎。根據唔同店有唔同嘅湯頭，例如醬油、味噌、鹽味等任君選擇，配料都會有所不同，價錢大約係800至900円左右。（2019年8月時資訊）
山形だし（Dashi）
「だし（Dashi）」喺日本一般講嘅係「出汁」，即係日本高湯。而家介紹嘅呢個特產雖然都係叫だし，但就唔係湯，而係位於山形縣內陸山村地方嘅鄉土料理，將蘘荷（薑科草本植物。）、青瓜、茄子、蔥等蔬菜切成碎粒，用醬油同柴魚片調味。新鮮夏季蔬菜嘅清爽口感為其特徵，係好適合喺炎熱夏季品嚐嘅一道料理。淋喺豆腐、白飯同麵等食物上一齊食係當地人嘅基本食法。
「だし」可以喺山形市嘅「野豬家 山形田（いのこ家 山形田）」或「香味庵 丸八（香味庵 まるはち）」等日本料理店食得到，不過有好多餐廳都只會喺夏季期間限定提供。預算方面，「だし」搭配豆腐等單嗌冷菜式大約每道1,000円以下。另一方面，包含呢道菜嘅會席料理或套餐大約3,000〜5,000円。（2019年8月時資訊）
各種水果：車厘子、西洋梨、西瓜、葡萄等等等等
山形有「水果王國」之稱，受惠於大自然環境同適合栽培水果嘅氣候，當地能種植出各式各樣嘅水果。例如生產量日本第一嘅車厘子，仲有西洋梨（啤梨）、尾花澤西瓜、葡萄等等，種類豐富。
此外，去位於上山市嘅「高橋水果樂園（高橋フルーツランド）」等果園直營嘅咖啡店，或鶴岡市嘅「水果專賣店青森屋（フルーツショップ青森屋）」等水果店附設嘅咖啡店，都可以品嚐到使用當地生產嘅水果製成嘅甜品或果汁。去山形旅行時就千祈唔好錯過新鮮嘅日本產水果啦。
售價因每款食品而唔同，但單品每款大約500円左右。（2019年8月時資訊）
山形白米特產「美姬米（つや姫）」
山形縣有「最上川」河流、肥沃嘅土地、日夜冷暖溫差大嘅氣候，利用呢種咁好自然環境條件，就能生產出品質優良嘅白米品種。其中更以「美姬米（つや姫）」品牌最受歡迎，唔只喺日本國內，就連喺亞洲地區都以「美味的白米」而聞名。白米嘅口感同黏度適中，又可以品嚐到米嘅甜味同精髓，就算攤凍咗都好好味，呢個都係美姬米嘅特徵。
旅客可以喺山形縣內嘅日本料理或各式餐廳食到美姬米。特別係山形市嘅「伊呂波壽司（いろは寿司）」或長井市嘅「ICHIWA食堂（いちわ食堂）」等堅持使用美姬米嘅食店，小編都好推薦你去試試呀。
根據唔同店鋪，普通套餐或全套套餐嘅價錢都唔同，不過大致上預算為1,000〜3,000円左右。（2019年8月當前資訊）
Comments