秋季去福岡可以觀賞到紅色或黃色等美麗多彩嘅紅葉，並且能體驗日本傳統嘅秋季祭典，魅力滿載。去到福岡，除咗要好好享受當地美食或購物之樂，仲唔可以錯過季節美景同活動。秋季嘅福岡有幾吸引？快啲入嚟睇吓啦。
福岡秋季嘅天氣及氣溫
福岡9月嘅平均氣溫為24.4度，暑氣仲未散。但係10月、11月氣溫會降到20度左右，涼爽舒適，建議出街帶埋薄外套。另外，即使到10月左右都仲可能會有颱風，需要留意多啲天氣報告啦。
福岡秋季必訪景點
福岡秋季嘅賞楓好去處
福岡嘅著名賞楓景點首推有「筑前的小京都」之稱嘅秋月城下（「筑前」為福岡古代時嘅稱呼）。江戶時代曾經係馬匹訓練場嘅「杉馬場通」，現在變身成為受遊客歡迎嘅人氣景點。沿途有茶屋或手信紀念品店林立，可以一邊欣賞楓紅美景，一邊散步行街。秋月城遺跡嘅黑門，同染上紅色嘅楓葉形成之對比都相當美麗。
根據往年經驗，2016年福岡嘅最佳欣賞楓葉時期為11月底，2017年同2018年則為12月頭為佳。所以11月底至12月頭去遊福岡應該可以欣賞到最靚嘅楓葉啦。
景點資訊
- 名稱：秋月城跡
- 地址：福岡縣朝倉市秋月野鳥
- 交通：博多站→［JR鹿兒島本線］23分鐘→基山站→［福岡市營地下鐵］28分鐘→甘木站→［甘木觀光巴士］20分鐘→博物館前…徒步10分鐘
- Wi-Fi：沒有提供
福岡秋季嘅祭典
位於福岡市內嘅「筥崎宮」係有著千年以上歷史嘅神社。每年喺度舉辦嘅「放生會」、春季嘅「博多咚打鼓節」、夏季嘅「博多祇園山笠」並列為博多三大祭典。「放生」即係將生物放歸大自然，祭典嘅目的在於表達對萬物生命慈悲為懷、戒殺生、並感謝秋季嘅豐收。所以喺祭典期間，在神社舉辦放生法事嚟祭祀嗰啲不得不殺生嘅動植物，接受信眾們嘅供養。
祭典共舉辦7日，參道兩旁有500間以上嘅攤檔林立，每年約有10萬人以上造訪，相當熱鬧。其中不能錯過嘅攤檔有博多人形公仔工匠職人親手製作嘅可愛玩具「おはじき（Ohajiki，類似玻璃珠嘅扁平圓形）」同巫女繪製嘅玻璃製樂器「チャンポン（Chanpon，玻璃工藝品）」。呢兩項都只係喺呢個祭典先買得到嘅特別商品。數量有限，有興趣嘅朋友要把握機會，唔係好快賣哂！
景點資訊
- 名稱：筥崎宮
- 地址：〒812-0053 福岡縣福岡市東區箱崎1-22-1
- 交通：天神站→［福岡市營地下鐵］約9分鐘→筥崎宮前站…徒步3分鐘
- Wi-Fi：無提供
到國營海之中道海濱公園休閒渡過
位於博多灣北部海上嘅志賀島同九州本土之間，有個全長約8公里、稱為「海之中道」嘅沙洲。正如其名，就好似一條喺大海中嘅道路一樣。
呢度有個「國營海之中道海濱公園」。秋季時，約150萬株紅色、白色、粉紅色嘅波斯菊，以及青葙、 掃帚草、玫瑰等植物遍佈整片山丘。景色相當壯觀。另外，喺海濱公園有條約12公里長嘅單車徑，並且提供單車租借服務。喺秋高氣爽嘅時節，迎著海風沿岸踩單車，一定好舒適愜意喇！
景點資訊
- 名稱：國營海之中道海濱公園
- 地址：〒811-0321 福岡縣福岡市東區大字西戶崎18-25
- 交通方式：博多站→［JR鹿兒島本線］約10分鐘→香椎站→［JR香椎線］約20分鐘→海之中道站→［JR香椎線］約5分鐘→西戶崎站…徒步10分鐘
- Wi-Fi：有提供
Comments