九州最大！IO WORLD鹿兒島水族館直望櫻島活火山

「IO WORLD鹿兒島水族館」位於鹿兒島市嘅鹿兒島灣（錦江灣）。可以喺館內睇到各式各樣嘅海洋生物，包括世界上最大嘅魚類——鯨鯊。另外，仲有海豚表演等活動。

IO WORLD鹿兒島水族館嘅簡介

「IO WORLD鹿兒島水族館」主要展示棲息喺鹿兒島嘅海洋生物，約有500種、3萬條魚類。（2019年7月資訊）

水族館有5層樓，每一層都有大大小小唔同嘅水族箱，仲有主題展示區。從5樓嘅展望廳可以欣賞到鹿兒島灣（錦江灣）同櫻島火山嘅雄偉景色。

IO WORLD鹿兒島水族館內展示嘅內容同活動都好豐富，而且仲設有紀念品商店、餐廳等設施。以下要為你介紹一啲必睇嘅特色。

二樓嘅「黑潮大水槽」係館內最大嘅水族箱，寬25米、深13米、深5米，裏面有悠游嘅鯨鯊，仲有鮪魚、鰹魚、魟魚等魚類。而且每日朝早10:15後，會有鯨鯊餵食秀可以睇，每次表演5分鐘左右。（2019年7月資訊）

館內有各式各樣嘅展示主題，內容非常豐富，例如有「南西群島之海」展示色彩鮮豔嘅熱帶魚同珊瑚嘅、「水母迴廊」提供治癒人心嘅空間、「鹿兒島的深海」好似潛入深海般體驗非日常嘅感覺等等。

二樓嘅「海牛研究所」展出唔易飼養嘅海牛，讓人可以欣賞到好多體型小巧、色彩鮮艷嘅海牛。海牛研究所介紹有關海牛不可思議嘅生態，並且進行育種研究，係世界上難得一見嘅設施。

IO WORLD鹿兒島水族館每日都會舉辦各種活動，例如胡麻斑海豹或電鰻嘅餵食解說及導覽等。特別係同海豚有關嘅活動更加係唔可以錯過嘅受歡迎項目。例如會與觀眾互動嘅「海豚的時間」，透過解說過程，可以了解海豚嘅身體結構同能力。

另外，仲有一個全長275米嘅「海豚水路」，圍繞著水族館嘅海邊，喺度可以睇到從水族館游出來嘅海豚在此自由活動。另外仲有精采嘅「藍天海豚表演」，喺訓練師指示之下，海豚喺你面前展現華麗嘅跳躍姿態。

IO WORLD鹿兒島水族館嘅營業時間為09:30至18:00，最後入館時間為17:00。但係日本黃金周假期或夏季休假期間嘅星期六及星期日、日本盂蘭盆節、平安夜嘅開館時間延長至夜晚9點。每年12月第一個星期一起閉館四日進行保養維護。

另外，IO WORLD鹿兒島水族館嘅門票為大人1,500円。（2019年7月資訊）

要去IO WORLD鹿兒島水族館，可以從JR鹿兒島中央站乘搭市營電車或市營巴士前往。

電車的話，搭開往鹿兒島站前方向嘅市營電車，約15分鐘後於水族館口站落車行8分鐘即達。

巴士的話，搭乘開往IO WORLD鹿兒島水族館方向或往Dolphin Port（ドルフィンポート）方向嘅巴士，車程約15分鐘，KAGOSHIMA水族館前站落車後行3分鐘即達。

Wi-Fi：有提供
語言對應：英文
購票方式：水族館現場購票或於當地便利店購買
可否使用信用卡：購買門票不可使用；商店可使用VISA、MasterCard、JCB、AMERICAN EXPRESS、Diners Club International