喺琴平嘅食店，以香川縣著名「讚岐烏冬」為首，仲有其他和菓子、以蒜頭等當地特產製作嘅美食。今次就為大家推介三款去琴平就一定要食嘅著名美食啦。
到琴平必試日式饅頭及糕狀和菓子
喺香川縣琴平町有好多和菓子老舗，其中喺琴平觀光名勝之一嘅金刀比羅宮嘅參道周邊，特別多創業100年以上嘅店舖。喺參道兩旁之所以有咁多和菓子店，有人話係因為要入金刀比羅宮嘅本宮，要行上成785級嘅階級，為咗俾一個地方參拜者休息一下，就設立各式店舖。直到現今，因為和菓子店提供嘅甜食可以消除疲勞，非常治癒，所以得到好高評價。
和菓子嘅種類眾多，有日式饅頭、日式糕品、羊羹等等。價錢每間店唔同，但大約一件和菓子為100円以下，連茶品嘅套餐係1,000円以下。（2019年7月資訊）
當中小編推薦嘅店係「金灸まん本舗石段や」，可以食到向皇室進貢過嘅銘菓（高級和菓子）「灸饅頭」；亦推介好出名嘅「浪花堂餅店」所販賣嘅五色餅即係白皮、蒿皮、黍皮、粟皮、黑豆皮五種口味嘅皮包餡糕點；仲有喺「へんこつや」賣嘅日式饅頭「へんこつまん」，係用蛋黃製作扎實外皮，與小豆餡配搭妙絕嘅樸素和菓子，都值得你一試。
琴平其實係烏冬店發源地？必食讚岐烏冬
琴平被認為係烏冬店發源之地，亦因將讚岐烏冬發展至全國而聞名，所以喺琴平都有好多讚岐烏冬嘅名店。其中開業至今超過50年嘅「こんぴらうどん」同「てんてこ舞」，以及1989年創業「うどんや井上」等都好出名。
其實讚岐烏冬都有好多唔同種食法。例如，將高湯倒入烏冬嘅「ぶっかけ烏冬」同烏冬撈生雞蛋再淋上麵汁嘅「釜玉烏冬」係最例牌嘅食法。其他仲有直接加醬油嚟食嘅「生じょうゆうどん」喺琴平町多間食店都品嚐得到。價錢方面每款烏冬唔同，但大約都係400円起，實在係又平價又抵食！
使用Konpira蒜頭製作琴平特產美食
「Konpira蒜頭」係香川縣琴平町嘅特產，大大粒白色蒜頭為其特徵，被認為有好高營養價值。使用Konpira蒜頭製作嘅醬油、味噌等調味料及料理如咖哩。使用Konpira蒜頭製作嘅咖哩可以喺「琴平格蘭酒店櫻之抄」等酒店都可以食得到。如果唔住喺該酒店，就咁買佢個咖啡醬包「こんぴらにんにくカレー」，用微波爐叮熱嚟試吓都好呀！價錢大約為600円，喺町內嘅特產店或者酒店嘅賣店都買得到。
另外，作為手信都好推薦「ガァリック娘」同「ガーリック侍」等調味料，以蒜頭香味帶出料理嘅精華，用喺肉類或魚類嘅餸菜都好適合呀。價錢方面，「ガァリック娘」大約係1,400円同「ガーリック侍」係約1,000円以下。（2019年7月資訊）
Comments