奄美大島屬鹿兒島嘅離島，位於最南端嘅「THE SCENE amami spa&resort」係奄美大島第一嘅渡假酒店，以提供海景客房同擁有私人海灘自豪。今次就由小編為你介紹有關酒店——THE SCENE amami spa&resort嘅四大魅力啦。
推介奄美大島酒店嘅魅力之一：全酒店都係海景房！
從2樓至4樓（SKY層）都係客房嘅樓層，每一層有7間房，總共21間。全部房間都有無敵靚海景，特別在於床嘅正面就係落地玻璃，瞓喺床上望出去就見到一片大海景，遠啲仲可以望埋加計呂麻島添。真係極致嘅海景房！試想像一起身睜開雙眼就係無敵大海景，幾咁奢侈豪華呀！
房間室內設計就採用白色為主，唔只能凸顯蔚藍嘅大海同天空，仲營造出一個清爽明亮嘅環境。房間類型有「Standard」、「Deluxe」、「Deluxe White」三款。酒店除咗提供迎賓飲品、茶品、24小時管家式服務等服務外，仲有礦物沐浴露及棉花棒等齊全護理用品，務求帶給你賓至如歸嘅感覺！
推介奄美大島酒店嘅魅力之二：玩樂充實 活動多樣化！
第二個推薦入住THE SCENE amami spa&resort嘅原因就係體驗活動非常充實。有浮潛活動、吊床、製作夜光貝殼飾物、穿著「大島紬」（奄美大島高級和服）體驗等等，有多種不同嘅活動可以參與。
當中小編最推薦嘅就係瑜伽活動，有伴隨日出而開始嘅「Morning Yoga（モーニングヨガ）」、亦有沉穩寧神嘅「Evening Yogo（イブニングヨガ）」，仲有滿月時夜晚舉行嘅「Meditation Yoga（メディテーションヨガ）」，費用為3,240円、60分鐘。
其他收費方面，將大大隻貝殼磨成有光澤嘅夜光貝殼，並製成飾物嘅「夜光貝殼飾物製作活動」嘅參加費用為3,240円、90分鐘；划透明皮艇，近距離接觸海洋世界都好推薦，費用為3,240円、60分鐘。（全部費用為已含稅費用）
推介奄美大島酒店嘅魅力之三：講究嘅餐廳為你提供最正美食
第三個魅力就係餐廳使用嘅食材，全部都係同當地農家簽約提供有機食物。餐廳製作料理時，完全唔用大蒜、辣椒等調味，提供嘅料理包括只用鹽嚟帶出食物本身鮮味嘅意大利料理、好好運用日本產食材製作嘅「和食」（日式料理），仲有可以根據住客身體狀況而製作冷壓果汁（Cold Pressed Juice）嘅淨化（健康）餐等三款選擇。
推介奄美大島酒店嘅魅力之四：奄美大島唯一海景天然溫泉
奄美大島上唯一嘅天然溫泉就喺THE SCENE amami spa&resort內浸得到。一邊浸，面前一邊欣賞大海景，夠唒開揚帶出空間感。黃金色嘅溫泉水含鹽量高，泉水唔易降溫，而且有保濕、美肌功效，而最推薦就喺日落時浸呀！仲有，2018年3月開幕嘅天台花園「Ama-Terrace」都係重點！喺嗰度睇日出或者夜晚觀星景觀都係至高無上嘅享受呀！
酒店資訊
- 名稱：THE SCENE amami spa&resort（ザ シーン ～アマミ スパ アンド リゾート～）
- 地址：〒894-1523 鹿兒島縣大島郡瀬戸内町蘇刈970
- 交通：奄美機場→［巴士］→約3小時 或 奄美機場→［租車開車］→約2小時
- Wi-Fi : 有提供
- 語言對應：只有日文
- 可使用信用卡：VISA, MasterCard, JCB, AMERICAN EXPRESS, Diners Club International
- 住宿費用：一人一晚約5萬円起
- 入住時間：15:00
- 退房時間：11:00
- 溫泉、風呂數量：露天溫泉、室内溫泉）、桑拿（全部都係男、女性各一個）
Comments