福岡嘅櫻花開花季節係3月底。由於位於日本較南方位置，因此相對其他地域會較早迎接櫻花盛開。福岡民眾都會把握櫻花盛開嘅短短幾日，喺市內各個知名賞櫻景點欣賞美麗櫻花。今次就為大家推薦三大福岡賞櫻名勝景點！
福岡最佳賞櫻季節與開花預測
想知福岡嘅最佳賞櫻期，可根據過往開花紀錄做參考，近幾年嘅開花日為2018年3月19日、2019年3月21日、2020年3月21日，而2021年就係3月12日，足足早咗成9日！通常開花10日後左右，就係盛開時期，計算好喺呢段期間遊福岡就最好啦。
如果想查詢更詳細嘅資料，各位可以參考日本氣象協會嘅「櫻花開花情報」，網站會從2月至5月之間發表相關資訊。另外，日本氣象株式會社嘅網站亦提供中文及英文資訊可供查看。
福岡3月氣溫有可能低至10度左右，尤其係夜晚比較凍。建議帶埋外套或頸巾，做好防寒對策再出門賞櫻啦。
福岡賞櫻名勝①福岡城櫻花祭
福岡縣內最受歡迎嘅賞櫻景點首推舞鶴公園。呢到係一個以福岡城本丸遺跡為中心嘅公園，每年都會舉辦「福岡城櫻花祭」。城內有約1,000株櫻花盛開，夜晚仲有夜間燈飾，以城牆為背景，可以欣賞到夢幻美麗嘅景色，所以都係一個著名影相景點。喺額外付費嘅夜間點燈特別區域內，您仲可以欣賞到别出心裁且充滿魅力嘅光景，真係要親身去先知睇到有幾「滾動」啊！
另外，櫻花祭期間都有各種美食攤檔，出售串燒、炒麵、啤酒等等，熱鬧非常，同場仲可以欣賞到街頭表演或體驗騎馬等活動添。（溫馨小提示：公園內到處都係賞花人士，小心人潮過多令小朋友容易走失喔。而且人太多，都唔建議約朋友直接喺公園等！）
景點資訊
- 名稱：舞鶴公園
- 地址：福岡縣福岡市中央區城内1
- 交通：天神站→［福岡市地下鐵］車程約2分鐘→赤坂站…徒步8分鐘
- Wi-Fi：沒有提供
福岡賞櫻名勝②西公園
西公園係福岡縣內唯一獲選為「日本櫻花名勝100選」嘅景點。除咗主要嘅染井吉野櫻，仲種有大島櫻、山櫻、枝垂櫻等多種類嘅櫻花，總共加埋有成1,300株！呢度係相當受當地民眾喜愛嘅賞櫻名勝地，好適合喺櫻花樹包圍嘅公園裡渡過一段愜意賞櫻時光。另外，從公園內嘅展望廣場仲可以眺望到福岡嘅街景，博多灣同志賀島亦一覽無遺。
景點資訊
- 名稱：西公園
- 地址：福岡縣福岡市中央區西公園13
- 交通：天神站→［福岡市地下鐵］車程約4分鐘→大濠公園站…徒步約15分鐘
- Wi-Fi：沒有提供
福岡賞櫻名勝③淺井一本櫻
筆直矗立嘅一本櫻亦相當有睇頭！淺井嘅呢棵「一本櫻」山櫻花樹齡約為100年、樹幹圓周圍一圈約4.3米、高18米。大樹較一般櫻花遲約一星期開花，開花時綻放出淡粉紅色嘅花朵，喺池塘水面倒映出嘅「逆櫻花」更係靚到令人窒息呀！特別係喺黃昏日落前嘅magic hour，可以欣賞到如幻似真嘅美景，就算係當地都一度成為熱話。
景點資訊
- 名稱：淺井一本櫻
- 地址：福岡縣久留米市山本町耳納1151
- 交通：久留米站→［西鐵巴士］車程約30分鐘→中泉巴士站…徒步約20分鐘
- Wi-Fi：沒有提供
Comments