女木島係一個位於高松港碼頭對開4公里嘅小島。以古以來傳聞有鬼住喺島上嘅洞窟內，所以有「鬼之島」嘅別稱。女木島集合自然景觀、藝術作品、村落風景等多樣化魅力於一身，而且仲有同鬼怪相關嘅觀光景點！你，又夠唔夠膽去女木島探險呢？
女木島嘅簡介
女木島係屬於香川縣高松市嘅小島，環島海岸線總長約9公里，南至北比較長嘅長條形島。女木島以碼頭為中心地帶，村落沿海伸延開去，被稱作「オーテ（大手）」嘅高石牆包圍。「大手」係為咗防禦冬天吹來嘅強風而設置，令女木島嘅村落風景變得更加特別。
另外，女木島亦係每3年舉辦一次嘅瀨戶內國際藝術祭嘅其中一個會場，所以島上都可以欣賞到各種各樣嘅藝術作品。
去女木島環島遊 有咩好玩？
女木島上有多種觀光景點，主要集中喺中部地區。以下就為大家介紹遊女木島嘅推薦好去處啦。
鬼島大洞窟等同鬼怪有關嘅傳說名勝
女木島上有幾個同鬼怪有關，好特別嘅觀光景點，好值得一去㗎！例如喺鷲峰嘅「鬼島大洞窟」，相傳以前有鬼怪住喺呢個約4,000平方米大，400米入嘅洞內。洞窟入口及內部都有鬼怪模型擺設。而且洞內重現鬼怪大廳同看守室等，不妨去探吓險啦。
其他推薦必睇嘅，仲有喺碼頭一個展示日本各地有關鬼怪傳說嘅資料及鬼面具等等展品嘅「鬼之館（おにの館）」，以及高約2米嘅鬼怪捧著燈塔形金棒嘅「鬼之燈塔（おにの灯台）」添。
鷲峰展望台等可以欣賞美麗自然景觀嘅景點
女木島上靠近海邊或山地上都有可以欣賞到美麗自然景觀嘅地方。當中以鷲峰展望台係島上欣賞絕景嘅最佳地點。從標高188米嘅山頂上嘅展望台望出去，以360度全景欣賞瀨戶內海嘅各個小島及穿梭其中嘅船隻，風景令人嘆為觀止！而且女木島仲係一個賞櫻好出名嘅地方，一到春天周圍都開滿櫻花。粉嫩櫻花、藍天白雲、汪洋大海，夾埋一齊嘅呢幅風景畫非常美豔，係呢個時期，嚟呢一度先睇得到！
島上欣賞特色藝術作品
作為藝術節嘅其中一個會場，喺女木島以碼頭為中心嘅地區，或鬼島大洞窟內等地都可以欣賞到常設美術作品。例如喺碼頭一帶，防波堤上有300隻海鷗並排嘅藝術品「海鷗的停車場」，海鷗因應風向而一下子轉向某一面係一大睇頭！其他仲有利用青銅製三角鋼琴創作音效藝術品「20世紀的回想」、和室內利用鏡創作「不在的存在」嘅視覺藝術等等，有眾多獨特嘅作品於島上展示。
而喺鬼島大洞窟內，就有用異常多數量嘅瓦片製作模仿鬼怪嘅臉孔，營造出壯觀嘅畫面。呢個「鬼瓦」係由中學生製作，重點係一個個鬼怪嘅面貌都唔同㗎。
去女木島嘅交通資訊
要去女木島觀光，可以從高松港碼頭搭20分鐘船就到。
而島上嘅移動方式，基本上都係以行路或踩單車為主。不過去鬼島大洞窟的話，可以從鬼之館搭接駁巴士。暫時只有喺冬季行駛，或者不定期運行，去之前可以先Check清楚先呀。
景點資訊
- 名稱：女木島
- 地址：〒760-0092 香川縣高松市女木町15-22
- 交通：高松港碼頭→[船]約20分鐘→女木島
- Wi-Fi：有提供（KAGAWA Wi-Fi）（只可於鬼之館使用）
- 語言對應：英文
- 可否使用信用卡：不可以
Comments