藝文青出走到男木島欣賞多個如WallAlley等藝術作品

男木島係一個離高松港口7.5公里外，處於瀨戶內海上嘅小島。男木島有美麗海灣風光，島上村莊排列複雜，猶如一個迷宮。島雖然細，但有好多值得一睇嘅嘢，例如藝術作品同絕美風景。

男木島的簡介

男木島係一個圓周約4公里，屬於香川縣高松市嘅海上小島。島上大部份都係山地，平地唔多，所以村莊主要落在碼頭附近並延伸開去。階級式嘅道路上，一個個房屋於兩邊排成一列列，加上中間上斜落斜嘅石路，形成一個恰似迷宮嘅村景。而呢個景色正正就係男木島嘅特色。

另外，男木島作為每3年一度嘅瀨戶內國際藝術祭嘅會場，島上有多個常設藝術作品，仲有一部份係藝術節期間先會展示嘅作品嚟添。適逢2019年現時係瀨戶內海藝術節嘅舉行期間，有機會去高松旅行就唔可以錯過啦！

男木島上大多數觀光景點都落喺南部嘅村落上。以下就為你介紹最值得去嘅景點同著名美食俾你參考吓啦。

去到男木島，你可以喺村上或沿岸見到擺放著好多常設藝術展品。例如，喺岸邊就有一個名叫「男木島の魂」（日文嘅魂即係中文嘅靈魂、精神），係一個製作成雀巢般嘅白色屋頂嘅建築物；另外仲有「行走的方舟（歩く方舟）」，係一個以挪亞方舟為主題嘅3D作品，以白色底同代表天空同大海嘅藍色帶出色彩上嘅對比。

島上仲有其他眾多地方有藝術品可以欣賞。當中最吸引人嘅莫過於色彩繽粉嘅「wallalley」。呢個係一個喺木板上塗上橙色、藍色、綠色等「colourful」色彩設計後，再將木板貼到房屋外牆上。

以上作品都喺村莊附近睇得到，不妨去漫步男木島做吓「藝文青」啦。

除咗欣賞藝術作品，喺男木島上仲可以睇到絕美嘅風景。小編推薦去豐玉姬神社，呢度可以講話係全個男木島擁有最靚景嘅地方。從碼頭沿路走向神社，你可以睇到男木島獨有嘅景色，例如鱼鳞一樣伸展開去嘅民房，盡頭仲可以望到遼闊嘅大海添。

喺島上北部仲有個被選為「日本之燈台50選」之一嘅燈塔，叫做「男木島燈台」。特別在於整個燈塔都係以花崗岩製成，喺日本比較罕見。燈塔加上瀨戶內海及拍打過來嘅浩瀚浪花作為背景，畫面非常壯觀美麗。

男木島出名八爪魚，島上有好多以新鮮八爪魚製作嘅美食，例如咬落柔軟嘅八爪魚天婦羅、將八爪魚精華滲透入飯嘅八爪魚飯、利用八爪魚獨特質感製作口感不同嘅大阪燒等等。鐘意食八爪魚嘅你一定唔可以錯過！喺男木島嘅餐廳、Guesthouse等多個地方都有供應。

如果想去男木島觀光，咁可以從高松港瑪頭搭40分鐘船，經女木島後再到達終點男木島。男木島上無公共交通工具，不過係個細島，行都好易行到去目的地。

男木交流館，即係被建成藝術作品其中之一嘅「男木島の魂」，其實都係一個船飛售票處同候船室嚟㗎。