小豆島寒霞溪絕美風景被譽為「日本三大溪谷美」之一

寒霞溪係瀨戶內海嘅其中一個島嶼，小豆島上嘅溪谷，垂直高聳而立嘅山岩，加上各種不同形狀嘅岩石為其一大特徵。加上山林長滿樹木嘅部份因季節轉換而染成不同色彩，一年到尾都有唔同嘅溪谷風光景色可以欣賞得到。

有關寒霞溪

寒霞溪位於小豆島幾乎中央位置，被稱為「日本三大溪谷美」之一嘅著名景點。現時豐富多變嘅風景係由1,300萬年前嘅火山活動所產生嘅岩石、地殼移動、被風雨侵蝕等等天然現象而形成嘅。

想欣賞寒霞溪，可以乘搭纜車或從行山路經去到山頂。山頂有展望台可以一覽小豆島壯麗風光，仲有食店、手信特產店及洗手間等設施。

喺寒霞溪可以睇到雄壯嘅溪谷風景，以下就為你介紹寒霞溪嘅特別之處。

寒霞溪嘅山頂有兩處展望台，都可以欣賞到溪谷雄壯嘅風光景色、山腳延伸開去嘅小豆島街景，而且仲可以一眼橫掃瀨戶內海上多個小島。嚟到呢度，一定要用全景模式先影得出呢種震撼！

特別係聳立嘅岩壁以及各種形形色色嘅岩石，每個季節呈現不同色彩嘅樹林所製造嘅風景都令人嘆為觀止！春天時山頭係一片櫻粉或嫩綠色、夏天時變為深綠、秋天佈滿又紅又黃嘅紅葉、冬天化身白茫茫雪景。隨著不同季節可以欣賞到被染上不同色彩嘅溪谷美景。另外，冬天時因落葉而令岩石顯露，呢個景致都非常壯觀。

喺寒霞溪山頂嘅餐廳同特產店，可以品嚐到小豆島特產及寒霞溪限定美食。餐廳有提供小豆島特產嘅手延素麵、橄欖拉麵等使用小豆島特產嘅橄欖油製作嘅食品。

而喺特產店嘅輕食部可以食到充滿橄欖風味嘅橄欖軟雪糕（オリーブソフトクリーム）同寒霞溪限定嘅「橄欖牛可樂餅漢堡包（オリーブ牛コロッケバーガー）」，當中夾喺可樂餅內嘅橄欖牛仲要係用橄欖飼料喂大嘅添！而且份量十足，有機會就同朋友一齊開始Share啦。

寒霞溪有三條登山路經，有繞過山頂嘅「寒霞溪表登山道」同「寒霞溪裏登山道」，仲有從山頂伸延至小豆島最高峰「星城」山嘅「星城登山道」。

特別係「寒霞溪表登山道」中經過12處及「寒霞溪裏登山道」經過8處名勝景點最充實。每個登山路經沿途所見到嘅景色都唔同，而且都係好獨特嘅風光，例如形似法螺貝嘅螺貝岩等等各種形狀嘅岩石，仲有崁入岸壁而建嘅寺院石門洞等，都係好獨特嘅景色。

而且道路中有小豆島獨有自力生長嘅「連翹屬」春花等等四季盛開唔同嘅花卉都值得注目。

想去寒霞溪欣賞絕景，首先要搭到去寒霞溪纜車站「こううん駅」。可以從草壁港碼頭搭「小豆島Olive Bus（小豆島オリーブバス）」嘅神懸線，搭15分鐘到終點「紅雲亭」落車。行1分鐘到「こううん駅」然後搭5分鐘纜車就上到山頂。

請留意「小豆島Olive Bus」根據唔同時間可能只會於星期六及星期日行駛或者只有冬季行駛嘅情況，所以去之前記得事先Check好官網先呀。（2019年7月資訊）