想喺高松搵好東西食，最好就去JR高松站或琴平電氣鐵道瓦町站附近，呢度有好多食肆都有提供香川縣嘅名產美食。呢篇文章就為你介紹「去到高松就要食」嘅3款特產啦。
高松特產：烏冬（うどん）
「讚岐烏冬」相信大家都唔陌生，咁你又知唔知讚岐烏冬其實係源自香川縣？一開始係由真言宗嘅空海僧人將讚岐烏冬從中國帶到日本，有咬勁為其特徵。而喺香川縣嘅高松當然都有好多讚岐烏冬店啦。唔只有高湯烏冬，仲有沾醬油食嘅「醬油烏冬」、打隻生蛋撈嚟食嘅「釜玉烏冬」等多款讚岐烏冬可以任君選擇。
而且喺高松嘅烏冬店有個特徵，就係每間店嘅落單流程可能都唔同，基本上可以分為3種：「一般店」就係從落單至食完執嘢都由店舖嘅人負責；「自助店（セルフ店）」係落單後食客拎嘢食，食完後都係由食客執好餐盤；仲有「製麵所」只提供麵，食客需要自備碗、筷同高湯送麵。雖然最易落單食嘢嘅係一般店，但係通常出名嘅烏冬名店都係自助店比較多。而一般店推薦去「川福」，自助店推薦去「宮武」呀。唔知唔去邊食好就試吓呢2間啦！
而價錢方面，雖然每間店都唔同，但係單嗌烏冬大約500円左右，非常抵食！
高松特產：連骨雞脾（骨付き鳥）
連骨雞脾嘅發源地就喺鄰近高松市嘅丸龜市，所以喺高松市都聚集好多有提供連骨雞脾嘅食肆。連骨雞脾即係完整一隻雞脾拎去烤窯燒焗嘅料理。爆香蒜頭嘅特製香料帶出雞肉精華，非常惹味！連骨雞脾有老嫩兩種雞肉可以揀。唔係話老啲肉就唔好食呀，老雞肉（親どり）係比較有咬口，而嫩雞肉（若どり）係比較軟腍，整出嚟嘅味道都有唔同，嗌哂兩款連骨雞脾嚟食，睇吓自己鐘意食邊款多啲～
小編都去過食，真係好好食㗎！高松市內推薦嘅有「蘭丸本店」同「Tosaka（とさか）」。價錢方面1人份大約1,000円；想同人Share，揀份量多啲嘅話就大約2,000円左右。（2019年7月資訊）
高松特產：醬油蠶豆（しょうゆ豆）
醬油蠶豆係香川縣嘅鄉土料理，係將蠶豆放落燒瓦鑊炒，再加以砂糖、唐辛子混製而成嘅醬油醬汁後醃製而成嘅食物，炒香後帶甜味係特徵之一。之所以有呢款食物，被認為係因為香川縣盛產蠶豆，而且係醬油產地。
喺高松有「黑川加工食品」、「豆芳」等等製作醬油蠶豆嘅店舖，真空包裝嘅產品大約2,000円就買得到。如果想即場食的話，高松市內都有居酒屋提供醬油蠶豆，例如「酒和料理的Natsu（酒と料理のなつ）」同「Fuji家 古新町（ふじ家 古新町）」等，嗌一份400円左右嘅試吓都好吖。（2019年7月資訊）
Comments