丸龜市係位於香川縣，面向瀨戶內海嘅一個地區。古時因作為丸龜城嘅城下町（以領主城堡為中心向外發展嘅城市地帶）而繁榮發展起來。除咗保留咗好多歷史建築物，仲有其他現代化嘅觀光設施。美食方面都唔少得香川縣好出名嘅讚岐烏冬同連骨雞脾啦！
香川縣丸龜的簡介
丸龜自古以來喺海上交通佔據一個好重要嘅地位。17世紀興建丸龜城後，附近地方作為城下町亦蓬勃發展起來。另外，丸龜對出瀨戶內海海域仲有本島、廣島等離島作為旅遊目的地都充滿魅力。
丸龜有咩旅遊景點？
丸龜市中有古今並存嘅旅遊景點，例如有具歷史性嘅建築物，仲有美術館、主題公園、有山有水嘅自然風景名勝等多樣化嘅景點。以下就為大家推介各種丸龜市中值得一遊嘅景點。
丸龜城等歷史性建築物
丸龜市內有古時遺留下來嘅建築物，讓人能接觸及了解更多日本歷史。例如有被選為日本百大名城之一嘅丸龜城、廣大日式庭園中設置茶室、畫館等嘅中津萬象園等等。但係既然去到丸龜，不得不去嘅就係丸龜城！被譽為「石牆名城（石垣の名城）」之一、日本第一高嘅石牆上，建設美麗純白天守閣，呢個畫面夠唒宏偉壯觀！而且當時建造石牆，係以高水準嘅技術製作，成品非常出色，唔同地方嘅石牆所使用石嘅形狀都唔同，去到一定要睇吓。
丸龜市豬熊弦一郎現代美術館、團扇之港美術館等有關日本傳統藝術嘅景點
去到丸龜市，另一個唔可以錯過嘅就係有關美術館同博物館嘅景點。例如丸龜市豬熊弦一郎現代美術館，就係一個以同丸龜有淵源嘅畫家，豬熊弦一郎嘅作品為主，並展示各種現代美術作品。
另外，仲可以去團扇之港美術館，館內展示丸龜嘅傳統工藝品—丸龜團扇，仲可以參觀及體驗團扇製作。
本島等丸龜離島觀光名勝
想玩盡丸龜，除咗去以上景點，仲好推薦去埋附近離島。丸龜所屬嘅離島總共有5個，其中以本島最多觀光景點。島上有充滿傳統日式民房排列街上，亦有國家指定史跡—舊市政辦事處嘅「塩飽勤番所」等歷史性景點。其他仲有木烏神社、東光寺等日本寺廟神社，仲有可以望到瀨戶內海同瀨戶大橋景色嘅遠見山，有各式各樣嘅觀光景點。
丸龜嘅美食同餐廳
喺丸龜可以食到香川縣特產嘅讚岐烏冬同源自丸龜嘅連骨雞脾等美食。雖然喺香港食雞脾多數都係連骨，好平常，但喺日本其實比較少連骨雞脾，都係食雞脾肉嘅料理比較多。而丸龜嘅帶骨雞脾係以蒜頭同香料等調味後再拎去燒嘅，啖啖肉又惹味，超級好食！
丸龜酒店、旅館住宿
丸龜嘅酒店、旅館住宿集中喺以JR丸龜站為中心嘅沿岸地區。而客房價位喺大約係3,000至5,000円左右嘅平價住宿都有好多選擇。
而離島方面雖然唔多住宿設施，但都有少量民宿同旅館喺丸龜嘅本島同廣島上經營。
丸龜嘅交通資訊
去丸龜玩的話，最好以JR丸龜站作為中心，因為有好多由其他日本地方開出嘅列車都會停經此站，例如JR岡山站開出嘅特急列車過去JR丸龜站都係40分鐘就到。
而去到JR丸龜站，搭區內巴士就可以好方便去到其他景點。如果想去丸龜嘅離島玩就要去丸龜港碼頭搭船。
景點資訊
- 名稱：丸龜（JR丸龜站）
- 地址：〒763-0045 香川縣丸龜市新町6
- 交通：岡山站→[JR 特急列車]約40分鐘→丸龜站
- Wi-Fi支援：有（KAGAWA Wi-Fi）
- 語言對應：中文、英文、韓文、泰文 English, Chinese, Korean, Thai
- 可使用信用卡：VISA, MasterCard, JCB, AMERICAN EXPRESS, Diners Club International
Comments