薩摩半島有多個溫泉地，溫泉設施同酒店住宿都好多選擇。當中喺指宿市有提供可以欣賞絕景嘅露天溫泉及砂蒸溫泉等設施，仲有種類多樣化嘅溫泉可以享受。今次就為大家推薦三個溫泉景點同溫泉住宿啦。
露天温泉「玉手箱温泉」：放眼望絕景嘅露天溫泉
露天温泉 玉手箱温泉（露天風呂 たまて箱温泉）係一個面向海，以絕景露天風呂（露天溫泉）聞名嘅溫泉設施。館內有兩個露天溫泉浴池，以日計梅花間竹咁作為男性或女性用溫泉。「和風露天風呂」可以欣賞到日本三大名山之一、雄壯嘅「開聞岳」；而「洋風露天風呂」則可以近距離望到岩石表面粗嚡嘅火成岩竹山。兩個浴池都可以讓人沉醉於山海交織嘅美景中！如果天清氣朗時，仲可以一次過望哂屋久島、竹島同硫黃島添呀。
因為呢個溫泉設施並無提供住宿空間，如果想搵附近嘅住宿設施，建議可以搵JR指宿站作為中心及沿海地區嘅。此處有好多標榜靚溫泉嘅酒店、旅館同民宿，而且入住時仲可以一嚐使用當地食材製作嘅名產料理，住一晚包兩餐嘅住宿選擇都有好多。（2019年7月資訊）
設施資訊
- 名稱：露天温泉「玉手箱温泉」（露天風呂 たまて箱温泉）
- 地址：〒891-0511 鹿兒島縣指宿市山川福元3292
- 交通：山川站→[鹿兒島交通巴士]約12分鐘→「Healthy Land入口（ヘルシーランド入口）」巴士站...徒歩約5分鐘
- Wi-Fi：有提供（IBUSUKI CITY FREE Wi-Fi）
- 語言對應：英文
- 可否使用信用卡：不可
以海景溫泉及客房自豪嘅酒店：夫婦露天風呂之宿 吟松
「夫婦露天風呂之宿 吟松」係一間面向錦江灣，地理位置極好嘅溫泉酒店。本館頂樓嘅露天溫泉，將天空、大海、溫泉三為一體嘅靚大美景盡收眼簾。而2樓嘅大浴場都可以欣賞到眼前無敵大海景，邊聽海浪聲邊浸溫泉，會唔會嘆到瞓著㗎！
客房方面有和室、洋室、和洋室可以選擇，幾乎全部都係海景房，其中仲有幾間夫婦、情侶專用嘅客室，內附露天溫泉，空間感十足。
除咗溫泉同客房之外，酒店提供嘅料理都好吸引。「食事処」（用餐地方）嘅飯枱中央有溫泉水湧出嘅設計，而且可以用泉水煮熟雞蛋同豆腐等食物添，非常特別。晚餐可享用到薩摩炸魚餅（薩摩揚げ）等鹿兒島嘅特產美食組合而成嘅會席料理；早餐方面，酒店提供多種當地食材所製成嘅日式定食（套餐）。除此之外，館內仲有手信商品店及椰子樹裝飾、飄逸著成南國風情嘅花園甲板等等，都可以讓住客渡過悠閒時光。
酒店資訊
- 名稱：夫婦露天風呂之宿 吟松
- 地址：〒891-0406 鹿兒島縣指宿市湯之濱5
- 交通：鹿兒島中央站→[JR特急列車（指宿のたまて箱）]約1小時→指宿站...徒歩約25分鐘
- Wi-Fi：有提供
- 語言對應：英文
- 可使用信用卡：VISA, MasterCard, JCB, AMERICAN EXPRESS, Diners Club International
日本最著名嘅天然砂蒸風呂之地：指宿砂蒸溫泉
砂蒸溫泉係自300年前喺指宿就開始有嘅砂蒸風呂。入浴方法係首先換上專用嘅浴衣，然後去岸邊用熱砂覆蓋頭以外嘅身體部份，最後沖身洗走身上嘅砂。呢個溫泉係利用熱砂嘅重量及地熱溫暖全身，令血液運行順暢，仲可以舒緩痛症，亦有大量流汗以達排毒之功效。體驗過就知有幾精神爽利！
提供砂蒸溫泉嘅住宿設施喺JR指宿站附近都可以搵到好多。住宿費大約係10,000至20,000円。如果想平啲嘅話，可以去指宿最大嘅砂蒸溫泉專用設施——「砂蒸會館 砂樂（砂むし会館 砂楽）」或其他設施體驗，費用大約係1,000円。因為此類設施唔包住宿，所以都係建議住喺JR指宿站附近嘅Guest House及民宿，房價大約係5,000円以下。（2019年7月資訊）
Comments