喺鹿兒島餐廳就係要嗌呢啲美食！必食推介！

喺鹿兒島餐廳，唔只可以食到海鮮、牛肉、豬肉、雞蛋等多種鹿兒島產所製作嘅美味料理，仲有當地特產、甜品等豐富美食任君選擇！胃就得一個，太多選擇唔知點揀？以下為你推介五款去到鹿兒島就必食嘅特產美食！

鹿兒島必食① 「白熊」刨冰

「白熊」係源自1947年鹿兒島食店「天文館むじゃき」所開發嘅刨冰。喺入口溶化得剛好嘅刨冰上，淋上甜甜的煉奶及放上車厘子、提子乾、柑橘類等各種水果。因為當時加上配料嘅製成品好似一隻「白熊」嘅樣，因而得名。

發源店「天文館Mujyaki（天文館むじゃき）」之外，「SANDECO COFFEE 數學CAFE（SANDECO COFFEE 数学カフェ）」等鹿兒島市中心嘅咖啡店都食得到。唔同店嘅刨冰製成品都唔同樣，簡簡單單製作出白熊樣嘅又有，放上好多配料嘅都有。價錢方面大約500至900円。（2019年7月資訊）

鹿兒島必食② 黑豚Shabu Shabu（涮涮鍋）

鹿兒島縣嘅「鹿兒島黑豚（かごしま黒豚）」呢個品牌豬肉好出名。加入縣特產嘅番薯喂飼豬隻，喺大豐富自然環境中培養嘅黑豚軟腍易咬，肉質上盛，清爽嘅豬肉味為特徵。

用鹿兒島黑豚製作嘅料理有好多，例如吉列豬扒飯、角煮（日式東坡肉）等等多種款式。而當中小編最推介嘅係，能直接帶出黑豚嘅豬肉味嘅黑豚Shabu Shabu！薄切嘅豬肉喺高湯中攪兩攪，稍微煮熟後，沾柚子醋、胡麻醬等調味料就最好味！

喺鹿兒島市內有多間提供黑豚Shabu Shabu嘅食店，例如「華蓮鹿兒島店」等日式食店內，包括麵、蔬菜等套餐係大約2,000至5,000円嘅價位。另外，喺「KAGOSHIMA屋台村（かごしま屋台村）」聚集多間飲食店舖，其中有啲店例如「SATSUMA」等，用1,000円都食到一餐。有興趣請一定要去搵間試吓啦！（2019年7月資訊） 

鹿兒島必食③ 鰹魚魚生片

鹿兒島嘅枕崎市有一段以捕獲鰹漁產發展嘅悠長歷史，市內多間食店都有提供多款鰹魚料理。當中被稱為「鰹のたたき」嘅料理好出名，係一道將鰹魚表面用炭火輕微燒過嘅魚生料理。炙燒過嘅魚生表面帶出陣陣火炙香味，加上鰹彈牙有咬口，真係色香味俱全！

提供「鰹のたたき」嘅店舖當中，枕崎市嘅「枕崎鮮魚中心內嘅「展望餐廳BUEN（展望レストラン ぶえん）」同「魚處Manbou（魚処 まんぼう）」都好出名。單嗌的話約600至900円就品嚐得到。午市套餐的話約1,000至2,000円。（2019年7月資訊）

鹿兒島必食④ 温Tamaran丼飯

「温Tamaran丼飯（温たまらん丼）」係指宿市當地嘅著名美食。呢款料理係利用市內「砂蒸溫泉」嘅泉源，將市內養雞場所養殖嘅雞蛋蒸成半熟狀態，然後開殼放到丼飯上。而丼飯嘅餸菜有得揀地雞、鰹魚、黑豚等，每間店都唔同，但共通點都會放隻溫泉蛋上去。震騰騰嘅蛋白、粘粘地嘅濃厚蛋黃係一大重點，簡單睇見都引死人啦！

指宿市內有多間食店可以食到温Tamaran丼飯，當中提供黑豚丼飯嘅食店有「黑豚及鄉土料理 青葉」；製作鰻魚丼飯嘅有「Una和（うな和）」，就睇你想食咩餸而揀邊間店試啦。價錢方面每個丼飯都唔同，普遍就係700至1,500円左右。

鹿兒島必食⑤ 唐船峽流水素麵

唐船峽流水素麵係喺1962年利用指宿市內唐船峽呢個地方豐富嘅湧水所創嘅美食。使用冬甩型嘅「自動素麵流動器」食用係一大特色。夾起順著水勢流過嘅素麵，沾麵汁食用。浸過湧水而冰凍咗嘅素麵食落口好順滑，食落夠哂爽呀！

想食流水素麵的話，喺鹿兒島縣內各地都有食肆可以品嚐得到。當中位於唐船峽嘅「市營唐船峽流水素麵（市営唐船峡そうめん流し）」及「長壽庵 開聞唐船峽店（長寿庵 開聞唐船峡店）」等都係知名食店。以上提及嘅店一年中都食得到，但亦有其他店可能只會喺春至秋季期間限定提供。價錢方面，單嗌的話大約600円左右；如果嗌埋鹽燒鱒魚、鯉魚味噌湯、白飯跟餐大約1,300至2,000円。（2019年7月資訊）