薩摩半島「開聞岳」日本百名山之一

薩摩半島位於鹿兒島縣西南部，自然景觀豐富，有開聞岳等山景，亦有美麗嘅海景。除咗美景同觀光景點，仲有好多溫泉。溫暖嘅南國氣候，孕育出豐富多樣嘅特產。

薩摩半島小簡介

薩摩半島係鹿兒島縣嘅兩個主要半島之一，氣候溫暖多雨。特別係6月至7月嘅雨季期間降雨量特別多，建議避開呢段時間去觀光呀。

薩摩半島大致上分為北部、南部兩個地區。從市區景點到風景名勝，觀光景點豐富多元。以下為你介紹各地區嘅推薦必去景點。

薩摩半島北部地區，以鹿兒島市為中心，觀光景點豐富，例如IOWORLD鹿兒島水族館、鹿兒島市立美術館等觀光設施，亦有好多歷史景點或古蹟。其中比較出名嘅有鹿兒島最大嘅神社——照國神社、借櫻島活火山及鹿兒島灣嘅景而建嘅仙巖園等等。

喺西部嘅山區，可以去到有好多神社、寺院聚集嘅靈峰「冠岳」登山健行。海岸沿線一帶，有日本三大砂丘之一嘅「吹上砂丘」，仲有著名睇日落景點及海水浴場「江口濱海濱公園」。

薩摩半島南部地區，以指宿市為中心，擁有大海、山脈同湖泊等美麗嘅自然景觀。其中，日本三大名山之一嘅「開聞岳」海拔924米、山形係均整嘅圓錐形，從山頂可以俯瞰火山口湖——池田湖、遠方嘅海景同屋久島。另外，值得一看嘅仲有知覧武家屋敷庭園，可以欣賞傳統嘅武士住宅同日本庭園。

指宿市係日本著名嘅溫泉區。有好多溫泉設施，同免費足浴，觀光之餘仲可以順道享受溫泉！

薩摩半島嘅美食豐富，有採用新鮮嘅海鮮、豬、牛、雞等肉類製成嘅丼飯、拉麵等。枕崎市出名嘅美食有鰹魚料理，市來串木野市則以吞拿魚料理聞名。

喺薩摩半島嘅各個城鎮都可以試到好多唔同嘅地道料理。喺鹿兒島市區亦有各種唔同料理嘅餐廳匯集於此，飲食選擇豐富又多元。

薩摩半島北部嘅住宿設施大部分集中喺鹿兒島市嘅市區，尤其以JR車站、鹿兒島市電車站附近為多。有好多價格合理、每晚約5,000円嘅住宿選擇。如果想慳啲，建議可以喺呢個區搵酒店呀。（2019年7月資訊）

另外，薩摩半島南部嘅指宿市沿岸，都有好多可以享受天然溫泉嘅旅館、民宿等。指宿市市區外嘅海岸沿線，都有一啲海景民宿。

JR鹿兒島中央站位置適中，係薩摩半島觀光嘅據點。從JR博多站乘搭新幹線去JR鹿兒島中央站，車程約1小時17分鐘。到JR鹿兒島中央站後，再利用電車、巴士、鹿兒島市電，就可以輕鬆去到各個觀光景點。另外，JR鹿兒島中央站有旅客服務中心，出發去各景點前可以喺度蒐集旅遊資料先！