香川縣高松市嘅「高松城跡」係面向瀨戶內海嘅日本城堡。可以進內欣賞好多被列為國家重要文化財嘅建築物。同時亦被稱作「玉藻公園」，係個深受市民喜愛嘅景點。去到高松就絕對要去「到此一遊」啦！
有關高松城跡
高松城係面向瀨戶內海而建嘅日本城堡，有別名「玉藻城」之稱，由生駒親正於1588年建立。於1642年起松平家成為藩主後， 高松城作為11代松平家嘅居城。昔日雖然城內建有本丸、御殿、天守等日本城堡建築物，及後因老化而被拆。高松城曾經被三面護城河包圍，現時內護城河及中護城河嘅一部份作為史跡被保存起來。另外，海水透過水門流入護城池，所以可以喺度睇到鯛魚等海洋生物，係個好難得一見嘅日本城堡景點。
乘船遊美麗庭園？高松城嘅景點特色
高松城有櫓等多個被列為國家重要文化財嘅日本城堡建築物及眾多特色景點。特別推薦係春天時盛開櫻花時過嚟賞櫻。
高松城必睇：松平家嘅別邸「披雲閣」
喺大正時代建立嘅「披雲閣」係作為松平家嘅別邸，亦被列為重要文化財。大家可以去呢度欣賞美麗日本庭園。
高松城必遊：搭船遊護城河
可以搭船遊覽高松城嘅護城河，一次需時大約30分鐘。坐船可以望到雄壯嘅天守台，又可以近距離睇到護城河內嘅海洋生物。費用方面，大人（中學高中生或以上）為500円，小朋友（5歲或以上）300円。12月至2月會暫停運行，行程編排方面要注意喔。一艘船坐5人，小學生以下，5歲以上嘅幼兒需要家長或監護者陪同才可乘船。（未滿5歲嘅幼兒不可乘船）
高松城必睇：護城河喂魚體驗
高松城內嘅護城河有海洋生物游嚟游去，甚至難得地可以喺護城河體驗喂鯛魚添！之所以有咁多赤鯛魚，其實係因為從幼魚開始就喺池內放養。另外，因為水門所引入嘅水係100%對出嘅海水，潮汐漲退時水位亦會有所變化。
高松城跡嘅遊覽資訊
有關高松城跡嘅入園費，大人（16歲或以上）為200円、小朋友（6歲或以上）係100円、6歲未滿的話係免費。
高松城跡嘅入園時間
高松城跡嘅入園時間方面，西門同東門嘅開放時間唔同。西門係日出就開門，到日落關門。東門的話，4至9月係從朝早7點至傍晚6點，10至3月就係從朝早8點半至傍晚5點。每年12月29日至12月31日會關園休息。
去高松城跡嘅交通
從高松機場搭40分鐘機場巴士到高松站落車，行3分鐘就到，咁易去到，去高松就一定要加入行程啦！
景點資訊
- 名稱：高松城跡
- 地址：香川縣高松市玉藻町2番1號
- 交通：高松機場→[巴士]約40分鐘→高松站…徒步3分鐘
- Wi-Fi：有提供
- 語言對應：只有日文
- 購票：購票窗口
- 可否使用信用卡：不可
Comments