福岡有好多當地特產都好適合做手信，今次FUN! JAPAN小編要為大家推介五種精選必買嘅福岡手信，全部都係編輯部親口試過先推薦㗎！
1. 明貝（めんべい）
「明貝」（めんべい）係福岡明太子仙貝老店「福太郎」嘅招牌商品，使用「福太郎」自家生產高級明太子配搭花枝同八爪魚而製成。「辛口」口味仙貝內裡加咗唐辛子，帶點辣味，有助除去仙貝腥味，將海鮮嘅鮮味濃縮其中。
「明貝」係福岡博多必買嘅手信，因為呢個仙貝一食就會上癮，經過大家一傳十、十傳百，現時已成為廣受歡迎嘅手信！
價格依容量而異，大約200至1,000円左右。其中最多人買嘅係8袋裝、540円嘅「明貝」。（資訊截至2021年2月）
除咗一般基本款口味之外，仲有香蔥、蛋黃醬，明太牛油、咖哩口味等，用基本款口味先「打底」後再加埋其他食材同調味料，自己DIY口味變化都得！店家亦推出2袋一組嘅輕便包裝，買嚟試唔同味，荷包都唔會太出血呢！
另外，品牌亦有同日本人氣動畫龍珠、寵物小精靈等合作推出聯名包裝。JR博多站等地福太郎直銷店有售，有興趣嘅話記得咪錯過！
2. ニ◯加煎餅
ニ◯加煎餅由「ニ◯加煎餅 本店 東雲堂」販賣，使用優質小麥粉、蛋、砂糖、芝麻、油等製作而成，風味樸實、口感爽脆。
生產商「東雲堂」將「博多仁和加」傳統元素融入和菓子中，創造出極具福岡特色嘅紀念品。「博多仁和加」係歷史悠久嘅福岡傳統鄉土藝能表演，係一種反映當代情況嘅即興喜劇，「二〇加煎餅」就係以劇中所使用嘅半臉面具為造型而製作嘅煎餅。
ニ◯加煎餅嘅價格依容量而定，價格約500至2,000円之間。另外，煎餅尺寸都有分小、中、特大，任君選擇。（資訊截至2021年2月）
3. 南蠻往來
由福岡老字號「Sakaeya」（さかえ屋）推出嘅「南蠻往來」夾心蛋糕都係好受歡迎嘅手信。蛋糕部分使用大量杏仁粉同忌廉製作，同外側酥脆嘅西式批皮、內餡嘅覆盆子果醬形成完美結合。外皮酥脆、內裡綿密嘅口感、配搭得恰到好處嘅酸甜，唔只好味，以金色裝飾嘅包裝外觀都非常精緻優美，真係令人忍唔住想影多幾張相！不愧為福岡超高人氣手信！
「南蠻往來」嘅外觀以南蠻船為造型，命名取自古時從長崎街道傳入嘅南蠻文化。售價一個約為160円，亦有以季節限定口味配搭嘅組合發售，售價約1,000円以上。（資訊截至2021年2月）
4.「Fukuya」明太子仙貝
明太子仙貝係來自福岡明太子專門店「Fukuya」（ふくや）嘅商品。「Fukuya」創始人川原俊夫係一位喺韓國長大嘅日本人，二戰結束後返到日本故鄉福岡，將童年喺韓國食到嘅「明卵漬」（以泡菜醃製技術醃漬魚卵）經過一番改良後，因而創造出明太子。
雖然其他店都有賣明太子仙貝，但係「Fukuya」仙貝嘅外觀製成明太子嘅形狀，原料採用「Fukuya」原創、口感溫和嘅明太子，柔和嘅味道中帶點微辣。
明太子仙貝產品有20片裝540円，以及40片裝1,080円兩種包裝。（資訊截至2021年2月）
5. S'MORE烤棉花糖
S'MORE燒棉花糖係一種創新甜品，先喺酥鬆塔皮鋪上一層燒過嘅朱古力，再擠上棉花糖而成。燒棉花糖有多種口味，其中特別推薦採用福岡甜王草莓果醬製作嘅「甜王草莓口味」。（介紹返，「甜王草莓」係福岡先有嘅草莓品種，甜味豐富又多汁，屬福岡旅行必試！）
另外，S'MORE燒棉花糖就算喺常溫下都可以食到彈牙口感，如果用微波爐叮5秒，更可以享受到融化口感。新鮮出爐嘅燒棉花糖非常有幸福感，一定要試吓呀！
S'MORE燒棉花糖包裝設有4個裝650円，以及8個裝1,200円兩種款式。（資訊截至2021年2月）
去邊度買福岡手信好？
以上介紹嘅福岡手信，大部分都可以喺福岡機場同JR博多站嘅紀念品店買到。如果你喺機場或車站買，仲可以好方便咁一次過買到多種商品，一定要把握機會呀！
Comments