門司港位於北九州市，係一個開埠咗120年嘅海港。現時嘅門司港懷舊區係九州知名嘅觀光景點之一。保存咗好多具歷史價值嘅西式風格建築，係個充滿懷舊風情嘅地區。
關於門司港
門司港隔著關門海峽，對面就係日本本州嘅山口縣下關市。過去曾係國際貿易嘅據點，與神戶、橫濱並列為日本三大港口之一，相當繁榮興盛。現時則係著名觀光勝地，設備完善，有好多觀光設施聚集於此。
門司港嘅推薦之處及必訪景點
門司港有好多種類豐富嘅觀光景點，都有好多可以品嚐到當地美食嘅餐廳。在此介紹推薦嘅必訪景點同必嚐美食。
喺充滿懷舊氣氛嘅門司港區散步
門司港有好多歷史古蹟建築物，如舊大阪商船大樓、舊門司三井俱樂部、舊門司稅關、門司港車站等等。好多建築內部都開放參觀，有相關文物資料展示，仲有餐廳提供餐點。
其中更以「舊門司稅關」作為門司港嘅地標。復原後嘅舊稅關廳舍，紅磚瓦片屋頂嘅西式洋風建築富有特色。內部設有展望室，可以眺望往來關門海峽嘅船隻同橋梁等具有港都風情嘅景色。
美術館及博物館等觀光景點
嚟到門司港，不妨去參觀美術館或博物館。例如喺「出光美術館」，一年中會舉辦5至6次展覽會，展出日本書法、繪畫或中國及日本嘅陶磁器，相當出名。
另外，喺「九州鐵道紀念館」可以欣賞到載客列車、鐵路用具、文獻資料等展示品，戶外區域又有蒸氣火車頭等九州各地實際使用過嘅歷年車輛可以入內參觀。
從門司港眺望嘅夜景
門司港中仲有出名欣賞夜景嘅景點。橙色燈光照射在傳統歷史建築物上，加上街道嘅燈火通明反射喺海面上閃閃爍爍，形成一幅幻想般嘅美景。
特別係從「門司港懷舊區展望室」望出去嘅夜景就更推薦。從位於大樓31樓嘅展望室，可以欣賞到眼前門司港嘅街景、橫跨關門海峽上嘅關門橋，以及對岸沿岸綿延嘅市區燈光，眺望呢個璀璨嘅夜景一定可以為你旅程留下深刻美好嘅回憶！
品嚐當地美味料理
喺門司港有日本料理店、西式餐廳、咖啡店等各式各樣嘅食肆，仲可以品嚐到如「河豚」等海鮮料理同當地知名美食添。
其中特別推薦起源於門司港嘅「燒咖哩（焼きカレー）」，可以講係去遊門司港嘅指定動作！「燒咖哩」其實即係咖哩飯，喺咖哩飯上加芝士或蛋等配料，放到焗爐焗，非常惹味！當地有好多餐廳都有提供呢款美食，仲有加埋河豚嘅「河豚燒咖哩」添，或者使用大量當地生產蔬菜嘅燒咖哩。唔同餐廳所提供嘅咖哩都會可能配搭上唔同配料，味道都會有所不同，試多幾間餐廳比較吓都好有趣吖！
去門司港嘅交通資訊
要去門司港，首先從福岡機場乘搭1小時20分鐘西鐵巴士去JR小倉站。再從JR小倉站搭約15分鐘電車即可到達JR門司港站。從JR門司港站行到門司港懷舊區只需要約2分鐘。
JR門司港站設有旅遊資訊中心，如有需要可以喺呢度拎觀光導覽手冊，再去門司港區觀光。
景點資訊
- 名稱：門司港
- 地址：〒801-0852 福岡縣北九州市門司區港町9
- 交通：福岡機場→[西鐵巴士] 約1小時20分鐘→小倉站→[JR電車] 約15分鐘→門司港站...徒步約2分鐘
- Wi-Fi：有提供（Kitakyushu City Free Wi-Fi）
- 語言對應：中文、英文、韓文
- 可使用信用卡：VISA、MasterCard、JCB、AMERICAN EXPRESS、Diners Club International、銀聯（依設施而定）
Comments